بۇگىندە الەمگە ايگىلى ليونەل مەسسي, كريشتيانۋ رونالدۋ, كيليان مباپپە سىندى تەڭبىل دوپ شەبەرلەرىمەن قاتار, ءوزىمىزدىڭ باقتيەر زاينۋتدينوۆ, باۋىرجان يسلامحان, ايبول ابىكەن, اسحات تاعىبەرگەندەي ۇلتتىق قۇرامانىڭ كىل مىقتىلارىن ماقتانىش سانايتىن, ۇلگى تۇتاتىن جاسوسپىرىمدەر كوپ. اسىرەسە اۋىل-ايماقتاعى بالالاردىڭ بۇل ورايداعى ارمانى اسقاق. وسىنى قاپەرگە العان «اۋىلفۋتبول» جوباسى جۇزدەگەن بالانىڭ جاسىل الاڭدا تەڭبىل دوپ تەۋىپ, شىڭدالۋىنا بىردەن-ءبىر باستاماشى بولىپ كەلەدى.
جاقىندا الماتى قالاسىنداعى «Aport Mall East» ورتالىعىندا ەرەكشە شارا ءوتتى. جوبانىڭ باس دەمەۋشىسى «حالىق» قايىرىمدىلىق قورى جاسوسپىرىمدەردىڭ قابىلەتىن, ولاردىڭ جاتتىقتىرۋشىلارىنىڭ ەڭبەگىن باعالاپ, ۇزدىكتەردى اتا-انالارىمەن بىرگە ماراپاتتادى.
«2018 جىلى «اۋىلفۋتبول» جوباسىنا ەنىپ, سودان بەرى بالالاردى فۋتبول ويناۋعا باۋلىپ, شەبەرلىكتەرىن شىڭداپ كەلەمىز. بىلتىر «ۇزدىك جاتتىقتىرۋشى» اتاندىم. سونداي-اق شاكىرتىم, 13 جاسار ماعجان بازارباي «ۇزدىك شابۋىلشى» اتانىپ, مەرەيى ءوسىپ وتىر. ۇيىرمەدە 40-قا جۋىق بالا اپتاسىنا ءۇش رەت فۋتبول الاڭىنا شىعىپ, جاتتىعادى. دەمالىس كۇندەرى جولداستىق كەزدەسۋلەرگە, الماتى قالاسىندا وتەتىن جاسوسپىرىمدەر فۋتبول ليگاسىنىڭ ويىندارىنا قاتىسىپ, توسەلىپ كەلەدى. ناتيجە جامان ەمەس. «اۋىلفۋتبول» جوباسىنىڭ جەتەكشىسى سەرىك مامبەتوۆ پەن «حالىق» قايىرىمدىلىق قورى قامقورلىعىنىڭ ارقاسىندا فۋتبول ۇيىرمەسىنە قاتىسۋشى جاسوسپىرىمدەر تەگىن سپورتتىق كيىممەن, دوپپەن قامتىلىپ, سونداي-اق جارىستارعا تەگىن قاتىسۋعا مۇمكىندىك الىپ, قوردىڭ قامقورلىعىن ايقىن سەزىنىپ كەلەدى», دەيدى ەڭبەكشىقازاق اۋدانى المالى اۋىلىنداعى بالالار مەن جاسوسپىرىمدەر فۋتبول ۇيىرمەسىنىڭ جەتەكشىسى ديدار شىرعاناقوۆ.
«بىلتىر «حالىق» قايىرىمدىلىق قورىمەن مەموراندۋمعا قول قويعان ەدىك. سونىڭ نەگىزىندە الماتى وبلىسىنان فۋتبولدان ۇزدىك بالالاردىڭ باسىن بىرىكتىرىپ, قۇراما كوماندا قۇرىلدى. بۇگىنگى كۇنى 2011, 2013, 2014 جىلعى بالالاردان قۇرالعان 3 كوماندا جاساقتالدى. ونىڭ اربىرىندە 12-13 بالادان بار. ءسويتىپ, 40-قا جۋىق بالا جينالىپ, 3 كوماندا جازدا الماتى قالاسىندا فۋتبولدان وتكەن جاسوسپىرىمدەر اراسىنداعى چەمپيوناتقا قاتىستى. ناتيجەسىندە, 2013 جىلعى فۋتبولشىلارىمىز چەمپيون اتاندى. 2014 جىلعى بالالار 3-ورىندى يەمدەنسە, 2011 جىلعى بالالار دا مىقتى ويىن ۇلگىسىن كورسەتىپ, 2-ورىنعا تۇراقتادى. قۇراما كومانداعا قاتىسۋشى بالالار – الماتى ماڭايىنداعى ەڭبەكشىقازاق, قاراساي, ىلە, تالعار, جامبىل اۋداندارىنداعى «اۋىلفۋتبول» جوباسىنا قاتىساتىن كوماندالاردان ىرىكتەلىپ الىنعاندار», دەيدى اتالعان جوبانىڭ جەتەكشىسى, بەلگىلى جۋرناليست سەرىك مامبەتوۆ.
«اۋىلفۋتبول» جوباسىنا قاتىسۋشى كوماندالارعا «حالىق» قايىرىمدىلىق قورى مەموراندۋم اياسىندا قامقورلىق جاساپ كەلە جاتقاندىعىن ايرىقشا اتاۋ كەرەك. ايتالىق, فۋتبول دەسە ىشكەن اسىن جەرگە قوياتىن جاسوسپىرىمدەر مەن جاتتىقتىرۋشىلاردى ارنايى سپورتتىق كيىم, دوپپەن قامتاماسىز ەتىپ قانا قويماي, قىستا, كوكتەمدە قارعالى اۋىلىنداعى لاگەرگە ورنالاستىرىپ, ءبىر اپتا بويى الاڭسىز جاتتىعۋلارىنا ءارى دەمالىستارىن ءتيىمدى, كوڭىلدى وتكىزۋلەرىنە تولىق جاعداي جاساپ بەرگەن. بۇل ءداستۇر بيىلعى جازدا دا جالعاسىن تاۋىپ, وبلىستىق جاسوسپىرىمدەر قۇراما كومانداسى قاپشاعاي كولىنىڭ جاعاسىندا دەمالدى. كوماندا قۇرامىنداعى بالالاردىڭ تاماقتانۋى, جول ءجۇرۋى, جاتىن ورنى, باسقا دا كەرەك-جاراق شىعىندارىن تولىق «حالىق» قايىرىمدىلىق قورى كوتەردى.
قوناەۆ قالاسى, قارعالى اۋىلىندا وتكەن وقۋ-جاتتىعۋ جيىندارىن ەلىمىزدىڭ جاستار قۇراماسىنىڭ بۇرىنعى ويىنشىسى, سپورت شەبەرى ازات بيتاباروۆ جۇرگىزدى. وعان ۋەفا D ساناتىنداعى جاتتىقتىرۋشىلار سەرجان قاپتاعاەۆ, ديدار شەرعاناقوۆ, ءامىر بولاتوۆ اتسالىستى. ناتيجەسىندە, بۇل تورتكۇل دۇنيە كوز تىگەتىن فۋتبولعا الماتى وبلىسىنداعى جاسوسپىرىمدەردىڭ قىزىعۋشىلىعىن ارتتىرۋعا سەپتىگىن تيگىزىپ وتىر. وسى ورايدا, «اۋىلفۋتبول» جوباسى اياسىندا ەلىمىزدىڭ بارلىق وبلىستارىندا ىرىكتەۋ جارىستارى جالعاسىپ جاتىر. جىل سوڭىندا جەڭىمپاز كوماندالار اراسىندا الماتى قالاسىندا وتەتىن رەسپۋبليكالىق جارىسقا وبلىستىق قۇراما دا قاتىسادى.
«حالىق» قايىرىمدىلىق قورى – ەلىمىزدىڭ ءبىلىم, سپورت, مادەنيەت, الەۋمەتتىك سالالارىن قولداۋ جوبالارىن قارجىلاندىرادى. قور جۇمىس ىستەگەن 8 جىلدىڭ ىشىندە 85 ملرد تەڭگەدەن استام قارجى اۋدارعان.
دودالى جارىستا ۇزدىك ويىن كورسەتىپ, جەڭىمپاز بولعان كوماندالار مەن ولاردىڭ جاتتىقتىرۋشىلارىن, فۋتبولسۇيەر بالالاردىڭ اتا-انالارىن سالتاناتتى ءىس-شارادا «حالىق» قايىرىمدىلىق قورىنىڭ الماتى وبلىستىق فيليالىنىڭ ديرەكتورى عالىمبەك جاقسىلىقوۆ قۇتتىقتادى.
«فۋتبول ويىنى – بالانى توزىمدىلىككە, ەپتىلىككە, ەڭبەككە باۋليدى, بويىندا جاقسى داعدىلار قالىپتاستىرادى. «اۋىلفۋتبول» جوباسىنىڭ بىلتىرعى ماۋسىم ايىندا وتكەن بىرىنشىلىگىنە 24 كوماندا قاتىستى. قازىردە ولاردىڭ سانى 111 كومانداعا جەتىپ وتىر. ەلىمىزدە 4 مىڭعا جۋىق بالا, سونىڭ ىشىندە اۋىل بالالارى وزدەرىنىڭ «جاسىل الاڭ شەبەرى اتانسام» دەگەن ارماندارىن جۇزەگە اسىرا الادى. قور ماماندارىنىڭ تالداۋ ناتيجەلەرى اۋىلدىق جەرلەردە بالالاردىڭ سپورتپەن اينالىسۋىنا قولجەتىمسىزدىگىن انىقتاپ وتىر. وسى كەمشىلىكتى جويىپ, اۋىل بالالارىنىڭ سپورتپەن جۇيەلى شۇعىلدانىپ, جەتىستىككە جەتۋىنە, تۇلعالىق دامۋىنا ۇلكەن مۇمكىندىك بولادى دەگەن سەنىممەن بيىلدان باستاپ قوردىڭ قامقورلىعىمەن «اۋىلسپورت» اتتى جاڭا جوبامىز جۇزەگە اسادى. جوبا شەڭبەرىندە سپورتتىڭ 6 ءتۇرى, اتاپ ايتساق, شاحمات, ۆولەيبول, كۇرەس, بوكس, كاراتە تۇرلەرىنەن وڭىرلىك ليگا باستالادى», دەپ مالىمدەدى ع.جاقسىلىقوۆ.
سالتاناتتى ءىس-شارا بارىسىندا «اۋىلفۋتبول» جوباسىنا ەنۋگە بۇگىندە 60 كوماندا نيەت ءبىلدىرىپ وتىرعانى اتاپ ءوتىلدى. تالاپ ۇدەسىنەن شىعىپ, جوباعا ەنەر بولسا, جىل اياعىنا دەيىن ەلىمىزدە اتالعان جوباعا قاتىسۋشى كوماندالار سانى 171-گە جەتەدى دەپ كۇتىلىپ وتىر.
وتكەن جىلى «حالىق» قايىرىمدىلىق قورى مەن «اۋىلفۋتبول» جوباسى اراسىنداعى ىنتىماقتاستىق شەڭبەرىندە قور اۋىلدىڭ 100 جاستار مەن جاسوسپىرىمدەر كومانداسىن قاجەت قۇرال-جابدىقپەن قامتۋدى, 100 جاتتىقتىرۋشىنىڭ ۋەفا-نىڭ D ساناتىمەن بىلىكتىلىگىن ارتتىرۋدى, 14 وبلىستا تۋرنير ۇيىمداستىرىپ, قورىتىندى رەسپۋبليكالىق ءتۋرنيردى الماتى وبلىسىندا وتكىزۋدى, 3 كوماندانى كاسىبي وقۋ-جاتتىعۋ جيىنىمەن قامتۋدى, ياعني وسى شارالاردى تۇگەلدەي دەرلىك قارجىلاندىرۋدى ءوز موينىنا العان ەدى. جوعارىدا اتالعان جۇمىس – سونىڭ جارقىن دالەلى.
الماتى وبلىسى