اەس سالۋدى قولداۋ جونىندەگى حالىق شتابىنىڭ مۇشەلەرى ماڭعىستاۋ وبلىسىندا بولدى. مۇندا ولار مۇنايشىلارمەن, ءوڭىر حالقىمەن كەزدەسۋلەر وتكىزىپ, سەنەك اۋىلىنىڭ تۇرعىندارىمەن ايماقتى دامىتۋ باعىتىن تالقىلادى.
اقتاۋدا حالىق شتابى مۇشەلەرى «ماڭعىستاۋمۇنايگاز» اق قىزمەتكەرلەرىمەن جۇزدەستى. ءىس-شاراعا 150-دەن اسا ادام قاتىستى. جيىن بارىسىندا مەملەكەت باسشىسى ەڭبەك ادامىنا ايرىقشا باسىمدىق بەرەتىنى, ولاردىڭ اراسىندا ەل دامۋىنا ولشەۋسىز ۇلەس قوسىپ كەلە جاتقان مۇناي-گاز سالاسىنىڭ قىزمەتكەرلەرى ويىپ تۇرىپ ورىن الاتىنى ەرەكشە اتالىپ ءوتتى.
سونىمەن قاتار شتاب مۇشەلەرى پرەزيدەنت باستاماسىمەن كونستيتۋتسياعا تۇزەتۋلەر ەنگىزىلگەنىن, سوعان سايكەس جەر مەن ونىڭ قويناۋىنداعى قازبا بايلىق حالىققا تيەسىلى ەكەنىن ەسكە سالدى. پارلامەنت دەپۋتاتتارى جەر قويناۋىن پايدالانۋ تۋرالى جاڭا زاڭ قابىلدانعانىن اتاپ ءوتتى. ەندى ەلىمىزدە جاڭادان اشىلعان بارلىق ءىرى كەن ورنى ۇلتتىق كومپانيالاردىڭ 50% جانە ودان جوعارى ۇلەسىمەن يگەرىلۋگە ءتيىس. سونداي-اق جەر قويناۋىن پايدالانۋشى كومپانيالار ەندى قازبا بايلىعى ازايىپ بارا جاتقان كەن ورىندارىندا جۇمىس جۇرگىزۋدى جالعاستىرۋعا نەمەسە ورنالاسقان ايماقتى دامىتۋعا قاراجات قۇيۋعا مىندەتتى. سونىڭ ناتيجەسىندە «وزەنمۇنايگاز» جانە «ماڭعىستاۋمۇنايگاز» كومپانيالارىندا مىڭداعان جۇمىس ورنى ساقتالادى.
«پرەزيدەنت بيىلعى جولداۋىندا اەس سالۋ بويىنشا تاڭداۋدى حالىقتىڭ ءوزى جاساۋعا ءتيىس ەكەنىن باسا ايتتى. بۇل – مەملەكەت باسشىسىنىڭ بۇلجىماس ۇستانىمى. قازىر ەلدەگى ەڭ ماڭىزدى شەشىمدەردىڭ بارلىعى دا حالىقتىڭ تالقىسىنا سالىنادى. بۇل قوعامدا جاڭا ساياسي مادەنيەت قالىپتاسقانىن كورسەتەدى. ءار ازامات ەل تاعدىرى الدىنداعى جاۋاپكەرشىلىكتى سەزىنۋى قاجەت», دەدى ءماجىلىس دەپۋتاتى, «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ.
سونىمەن قاتار اەس سالۋدى قولداۋ جونىندەگى حالىق شتابى مۇشەلەرى ايماقتاعى ەڭ وزەكتى ماسەلەنىڭ ءبىرى اۋىزسۋ تاپشىلىعىنا توقتالدى. ماسەلەن, بيىل فورت-شەۆچەنكوداعى سۋ تازارتۋ قۇبىرى ستانساسىنىڭ قۇرىلىسىن اياقتاۋعا 2,5 ملرد تەڭگە ءبولىندى. سونداي-اق 2025 جىلعا قاراي «كەندىرلى» كۋرورتتىق ايماعىندا جاڭا سۋ تۇشىتۋ زاۋىتى سالىنادى. «كاسپي» سۋ تۇشىتۋ زاۋىتىن كەڭەيتۋ جۇمىسى جالعاسىپ جاتىر. بۇل ماڭىزدى جوبالار تۇراقتى قۋات كوزىن قاجەت ەتەدى.
سەنەك اۋىلىندا اەس سالۋدى قولداۋ جونىندەگى حالىق شتابى مۇشەلەرى جەرگىلىكتى تۇرعىندارمەن وڭىردەگى وزەكتى ماسەلەلەردى تالقىلادى. بۇل رەتتە اۋىلدا جاڭا جۇمىس ورىندارىن قۇرۋ, نەسيە الۋ, جاڭا ءوندىرىس ورىندارىن اشۋ جانە باسقا دا ماسەلەلەر ءسوز بولدى. مەملەكەت «اۋىل اماناتى» باعدارلاماسى اياسىندا اۋىل تۇرعىندارىنا جەكە كاسىپ اشۋ ءۇشىن 2,5%-دىق قوماقتى قاراجات بولەدى.
وسى كۇنى اەس سالۋدى قولداۋ جونىندەگى حالىق شتابى مۇشەلەرى ءوڭىردىڭ بەلسەندى ازاماتتارىمەن كەزدەستى. بۇگىندە اتالعان وبلىس ەڭ جوعارى جۇكتەمە كەزىندە شەتەلدەن ەلەكتر ەنەرگياسىن ساتىپ الادى. ەنەرگيا تاپشىلىعى ءوندىرىس ورىندارىن اشۋ, جاڭا جۇمىس ورىندارىن قۇرۋ, كوممۋنالدىق ينفراقۇرىلىمدى دامىتۋ جۇمىسىن تەجەيدى. وسى تاپشىلىققا بايلانىستى كوپتەگەن ءوندىرىس تەك قاعاز جۇزىندە قالىپ قويادى. شتاب مۇشەلەرى اتاپ وتكەندەي, بۇگىندە ماڭعىستاۋدى ەلىمىزدىڭ بىرىڭعاي ەنەرگيا جۇيەسىنە قوسۋ جۇمىسى جۇرگىزىلىپ جاتىر.
بۇل كەزدەسۋلەر بارىسىندا ماڭعىستاۋلىقتار الداعى رەفەرەندۋمعا بەلسەندى قاتىسۋعا نيەت ءبىلدىردى.