الماتى وبلىسى الەمدىك ءبىلىم بەرۋ ارەناسىندا ءوز ورنىن نىعايتىپ, «ساپالى ءبىلىم» اتالىمى بويىنشا «World Innovation Award 2024» جۇلدەسىن جەڭىپ الدى. 128 ەل قاتىسقان بۇل بايقاۋدا وبلىستىڭ جەتىستىكتەرى ءبىلىم سالاسىنداعى يننوۆاتسيالىق تاسىلدەر مەن تيىمدىلىكتى كورسەتە ءبىلدى.
ايماقتا زاماناۋي مەكتەپتەر سالۋ مەن ساپالى ءبىلىم بەرۋدى دامىتۋعا ەرەكشە كوڭىل ءبولىنىپ وتىر. سوڭعى جىلدارى 19 جاڭا مەكتەپ اشىلىپ, 18 مىڭنان استام وقۋشى ورنى پايدا بولدى. جەكە ينۆەستيتسيا ارقاسىندا ءۇش اۋىسىمداعى مەكتەپتەردىڭ سانى 52-دەن 39-عا دەيىن قىسقاردى.
حالىقارالىق ىنتىماقتاستىقتىڭ كوكجيەگى كەڭەيىپ, 12 دارىندى وقۋشى قىتاي ۋنيۆەرسيتەتتەرىنە وقۋ گرانتىن ۇتىپ السا, 4 وقۋشى حالىقارالىق لاگەردە تاجىريبە جيناقتادى. شەتەلدىك جوعارى وقۋ ورىندارىنىڭ فيليالدارىن اشۋ جونىندە مەموراندۋمدار دا جاسالدى.
دارىندى بالالاردى قولداۋ ماقساتىندا «تابىستى 50 مەكتەپ» جوباسى ىسكە اسىرىلىپ, وقۋشىلاردىڭ وليمپيادالارداعى جەتىستىكتەرى ارتىپ كەلەدى. ءبىلىم ساپاسىن ارتتىرۋعا باعىتتالعان جوبالار 3 مىڭنان اسا مۇعالىمنىڭ تاجىريبەسىن شىڭداپ, 42 مىڭنان اسا وقۋشىنىڭ ءبىلىم كوكجيەگىن كەڭەيتتى. وتكەن جىلى وڭىردەگى 207 مەكتەپتە 236 زاماناۋي كابينەت اشىلسا, وسى جىلعا بۇل باعىتقا 590 ميلليون تەڭگە بولىنگەن.
وبلىس وقۋشىلارىنىڭ ءبىلىم دەڭگەيى 75,5 پايىزعا, ال وقۋشىلاردىڭ ءبىلىم ساپاسى 66,1 پايىزعا ارتتى. وتكەن وقۋ جىلىنداعى وليمپيادالاردا 14 وقۋشى حالىقارالىق دەڭگەيدە جۇلدەلى ورىندارعا يە بولسا, رەسپۋبليكالىق وليمپيادالاردىڭ جەڭىمپازدار سانى دا ارتا تۇسكەن.
ستۋدەنتتەر مەن جاستار اراسىندا كاسىپتىك باعدار بەرۋ, پەداگوگيكالىق كادرلاردى دايارلاۋ جانە وليمپيادالىق رەزەرۆ ءۇشىن وقۋ-جاتتىعۋ جيىندارىن وتكىزۋ باعىتىنداعى جۇمىستار جۇيەلى جالعاسىپ وتىر.
الماتى وبلىسى