«استانا بالەت» تەاترىنىڭ ترۋپپاسى اسپەندوستا (تۇركيا) وتكەن XXXI حالىقارالىق وپەرا جانە بالەت فەستيۆالىنە قاتىسىپ, زور ىقىلاسقا بولەندى. ايتا كەتەيىك, ەلوردالىق ونەر ۇجىمى اتالعان فەستيۆالعا شاقىرىلعان جالعىز شەتەلدىك ترۋپپا.
ونەر مەرەكەسى, شامامەن ەكى مىڭ جىل بۇرىن سالىنعان ەجەلگى امفيتەاتردىڭ ساحناسىندا ءوتتى. ونەر ۇجىمى كورەرمەنگە «كارمەن-سيۋيتا» (البەرتو الونسو حورەوگرافياسى) جانە «A Fuego Lento»/ «باياۋ وت» (ريكاردو امارانتە حورەوگرافياسى) ءبىر اكتىلى بالەتتەرىن ۇسىندى. كارمەننىڭ وقيعاسى سۋرەتتەلگەن قويىلىم مەن تانگو ىرعاعىنداعى بيىنە ءتانتى بولعان كەلۋشىلەر ىستىق ىقىلاسىن ءبىلدىردى. بەكزات ونەردىڭ كورەرمەنى ارتىستەردىڭ كاسىبيلىگى مەن تەحنيكالىق شەبەرلىگىن عانا ەمەس, سونىمەن قاتار ونەرگە ادالدىعى مەن سەزىمدى جەتكىزە الاتىن قابىلەتى ءۇشىن دە جوعارى باعالادى.
سپەكتاكلدەرگە تەاتردىڭ جەتەكشى سوليستەرى قالامقاس ورىنباساروۆا, سۇندەت سۇلتانوۆ, ۋەسلي كارۆالو, باسقالار قاتىستى.
ايتا كەتەيىك, «استانا بالەت» تەاترى تۇركيادا وتكىزىلەتىن تانىمال فەستيۆالدارعا ەكىنشى رەت شاقىرىلىپ وتىر. بودرۋم فەستيۆالىندە استانالىق ارتىستەردىڭ ونەرىنە ءتانتى بولعان ۇيىمداستىرۋشىلار بالەت ۇجىمىن اسپەندوس فەستيۆالىنە دە ارنايى شاقىرعان.
ساراپشىلاردىڭ ايتۋىنشا, بۇل ونەر دوداسى الەمدەگى ۇزدىك وندىققا كىرەدى. تۇركيا رەسپۋبليكاسىنىڭ مادەنيەت جانە تۋريزم ءمينيسترى مەحمەت نۇري ەرسوي اتاپ وتكەندەي, ونەر, تاريح جانە تابيعات توعىسقان وسى بەلدى فەستيۆال انتيكالىق تەاتردىڭ عاجاپ ءبىر اتموسفەراسىندا ءوتىپ, الەمنىڭ تۇكپىر-تۇكپىرىندەگى ونەرسۇيەر قاۋىمنىڭ نازارىن اۋدارتا الدى. ءيا, فەستيۆالدا ماڭگىلىك ونەر تاريحپەن قاۋىشىپ, تىلسىم ونەردىڭ قۇدىرەتىن پاش ەتەدى.
مەملەكەتتىك وپەرا جانە بالەت تەاترىنىڭ باس ديرەكتورى ءارى كوركەمدىك جەتەكشىسى, ۇيىمداستىرۋشىلاردىڭ ءبىرى B.تان ساقتۇرىكتىڭ ايتۋىنشا, فەستيۆال باعدارلاماسىنا ەنگەن تۋىندىلار ونەردىڭ بىرەگەي تىلىندە سويلەپ, تاريح پەن قازىرگى زاماندى بايلانىستىرىپ تۇر.
ءساتىن سالعانداي جەكسەنبى كۇنى ونەر كورسەتكەن استانالىق ارتىستەردى تاماشالاۋعا بارعان كورەرمەن زالعا لىق تولدى. «استانا بالەتتىڭ» قويىلىمىنا ارنالعان ءۇش مىڭ بيلەت بىردەن ساتىلىپ كەتكەن. دەمەك كارمەننىڭ قاسىرەتتى وقيعاسىن سۋرەتتەۋدىڭ شەبەرلىگى مەن تانگونىڭ وزىندىك ىرعاعى كورەرمەن كوكەيىنەن شىققانى انىق.
اسپەندوستاعى كونە تەاترعا ءۇش مىڭعا جۋىق كورەرمەن سىيادى. ايتا كەتەرلىگى, ەۋروپا مەن سولتۇستىك افريكاداعى باسقا ەجەلگى قۇرىلىستارمەن سالىستىرعاندا جاقسى ساقتالعان.