الەم ەلدەرى اتوم ەنەرگەتيكاسىنا بەت بۇرىپ جاتىر. كورشى وزبەكستان دا ءبىر شەشىمگە كەلىپ, رەسەيلىك تەحنولوگيامەن اتوم ەلەكتر ستانساسىن سالاتىن بولدى. سەبەبى قاجەتتى ەنەرگياسىنىڭ 80 پايىزدان استامىن گازدان ءوندىرىپ وتىرعان كورشى ەل گاز تاپشىلىعىنا ۇرىنعان سوڭ, ەڭ سەنىمدى ءارى قاۋىپسىز ەنەرگيا كوزى رەتىندە اەس-ءتى تاڭدادى.
وسىدان ەكى جىل بۇرىن كوگىلدىر وتىننىڭ ءتۇبى كورىنە باستاعان وزبەكستان قازىر رەسەيدەن گاز يمپورتتاپ, ونى جاعىپ, ەنەرگياعا اينالدىرىپ وتىر. باعا بولجاۋسىز قىمباتتاي بەرەتىن سەكىلدى. وزىندە اجەپتاۋىر ۋران قورى بار ەل اەس سالىپ قامدانباسا, الداعى 25 جىلدا ەنەرگياعا دەگەن قاجەتتىلىگى 2 ەسە ارتاتىن كورىنەدى. ولار سول مۇقتاجدىقتى بولدىرماۋ ءۇشىن اتوم ەنەرگياسىن يگەرۋگە كىرىسپەك.
جاقىندا ەرەۆاندا وتكەن دۇنيەجۇزىلىك ارمياندار ءسامميتى بارىسىندا ارمەنيا پرەمەر-ءمينيسترى نيكول پاشينيان دا اتوم ەلەكتر ستانساسى بويىنشا ستراتەگيالىق شەشىم قابىلدانعانىن جاريالادى. ونىڭ ايتۋىنشا, جاڭا اەس قۇرىلىسى ەلدىڭ ەنەرگەتيكا سالاسىنداعى ماڭىزدى جوبالاردىڭ ءبىرى بولادى.
ارمەنيا بيلىگى مودۋلدىك ستانسا سالۋدى قاراستىرىپ وتىر. قازىر الەمدە جۇمىس ىستەپ تۇرعان مودۋلدىك اتوم ەلەكتر ستانساسى جوق. دەگەنمەن اياقتالۋدىڭ ءارتۇرلى كەزەڭىندە تۇرعان بىرنەشە جوبا بار. بۇل سالادا اقش ۇلكەن جەتىستىكتەرگە يە. سونداي-اق بۇل باعىتتاعى جۇمىستاردى فرانتسيا, ال سوڭعى ۋاقىتتا رەسەي مەن وڭتۇستىك كورەيا دا ىلگەرىلەتە باستادى.
بيىل 1 تامىزدا ارمەنيا ۇكىمەتىنىڭ شەشىمىمەن جاڭا اتوم ەلەكتر ستانساسىنىڭ قۇرىلىسى ءۇشىن جەكە كاسىپورىن قۇرىلدى. جوبانىڭ نەگىزدەمەسىن دايىنداپ, ەل ۇكىمەتىنىڭ ماقۇلداۋىن العان كومپانيا حالىقارالىق سەرىكتەستەرمەن كەلىسسوز جۇرگىزىپ, جاڭا اەس قۇرىلىسىن دايىنداۋ جانە قارجىلاندىرۋعا قاتىستى ۇيىمداستىرۋشىلىق ماسەلەلەردى شەشۋى كەرەك.