سونىمەن, ءسىز ۆاشينگتون قالاسىنداعى ۇلكەن كىتاپحانانىڭ ءبىرى – گەلمان كىتاپحاناسىندا وتىرسىز. جاي وتىرماي, اقش سىندى الپاۋىت ەلدىڭ گازەتى مەن جۋرنالى قالاي شىعادى ەكەن, ولار نەنى جازىپ, وقىرمانىنا قانداي رۋحاني ازىق بەرەدى ەكەن دەگەن سۇراقتارعا جاۋاپ ىزدەيسىز. ادەتتەگىدەي, الىپ امەريكادا ماڭىزدى دا كەڭ تارالاتىن گازەتتىڭ ءبىرى – «The New York Times». وسى گازەتتىڭ بۇرىنعى ساندارىن پاراقتاپ وتىرىپ, «ىشىندە قازاق, قازاقستان تۋرالى نە بار ەكەن؟» دەگەن وي دا مازالاعانى راس.
ءبىزدى قىزىقتىرعانى – اتالعان گازەتتىڭ 1961 جىلعى 28 ماۋسىمداعى سانى. 35-بەتىنە سول ۋاقىتتا قايتىس بولعان ماڭىزدى تۇلعالار تۋرالى قازانامالار بەرىلىپتى. سونىڭ ءبىرى – ءبىزدىڭ زاڭعار جازۋشىمىز مۇحتار اۋەزوۆ حاقىندا. اقش گازەتىنىڭ قازاق جازۋشىسىنا ارناعان قازاناماسىنىڭ تولىق ءماتىنى مىناداي:
«1959 جىلى ەكى تومدىق شىعارماسىمەن لەنين اتىنداعى سىيلىقتى يەلەنگەن كەڭەس جازۋشىسى مۇحتار اۋەزوۆ قايتىس بولدى. ول قازاقتىڭ اقىنى, فيلوسوفى. ونىڭ «اباي» جانە «اباي جولى» اتتى ەكى تومنان تۇراتىن شىعارماسى ەكى جىل بۇرىن لەنين اتىنداعى سىيلىقتى جەڭىپ العان. تاسس اگەنتتىگىنىڭ حابارلاۋىنشا, ول كەشە الماتىدا قازا تاپتى. جاسى 63-تە» دەي كەلە, مۇحتار اۋەزوۆتىڭ شىڭعىستاۋدا تۋىپ-ءوسىپ, كەيىن كەلە ابايدىڭ ءومىرى جونىندە كەسەك شىعارما جازعانىن, لەنينگراد ۋنيۆەرسيتەتىندە ءبىلىم العانىن, كوپتەگەن شىعارمالاردىڭ اۆتورى جونىندە دەرەك كەلتىرەدى. سونىمەن بىرگە ونىڭ 1960 جىلى كەڭەس جازۋشىلارىمەن بىرگە اقش-تىڭ كەي شتاتتارىندا ارنايى ساپاردا بولعانىن, ەلىنە قايتىپ بارعان سوڭ, سۇحباتتارىندا نيۋ-يوركتەگى ءزاۋلىم عيماراتتارعا قىزىققانىن ايتتى دەگەندى دە قوسادى.
قالاي دەسەك تە, امەريكا توپىراعىنا ەڭ العاش تابانى تيگەن قازاق جازۋشىسى مۇحتار ومارحان ۇلى ەكەنى شىندىق. ونىڭ ارنايى ساپارى تۋرالى اقش قوعامى مەن ءباسپاسوزى حاباردار. سول ءۇشىن دە الپاۋىت باسىلىم ول جونىندە ارناۋلى قازاناما جاريالاپ, كۇللى الەم جۇرتىنا قازاقتىڭ ءبىر ۇلى جازۋشىسى مىنا دۇنيەدەن كوشكەنىن حابارلاعانىنىڭ ءوزى ۇلكەن قۇرمەتتىڭ, ايىرىقشا ءىلتيپاتتىڭ بەلگىسى. ءتىپتى, «The New York Times» مۇحتار اۋەزوۆتىڭ سۋرەتىن دە بىرگە جاريالاعانى كوڭىلىمىزگە قۋانىش سىيلاعانداي بولدى. بۇل دەگەنىمىز, وتكەن عاسىردىڭ 60-جىلدارىنىڭ وزىندە اقش قوعامىنىڭ, ادەبي ورتاسىنىڭ قازاق جازۋشىسىن مويىنداپ, وعان نازار اۋدارعانىنىڭ دالەلى بولماق. بىلايشا ايتقاندا, اۋەزوۆتىڭ دە امەريكا جۇرتىنا اسەر قالدىرعانى داۋسىز. ول تۋرالى الپاۋىت ەلدىڭ باسپاسوزدەرى ءارتۇرلى ماقالالار جاريالعان دا شىعار, ال ازىرگە ءبىزدىڭ قولىمىزعا تۇسكەنى – وسى ءبىر قازاناما.