كوگىلدىر وتىنمەن قامتۋ ۇلعايدى

تەكەلىدەگى «دوستىق» شاعىن اۋدانى تۇرعىندارى كوگىلدىر وتىنعا ءبىرىنشى بولىپ قوسىلدى. ول جەردە 1 200 ابونەنت بار. تابيعي گازعا ەسكەلدى, قاراتال اۋداندارىنىڭ بىرنەشە اۋىلىنىڭ تۇرعىندارى دا قول جەتكىزدى. كوگىلدىر وتىن 1 700-دەن اسا ادام تۇراتىن وتەناي, جاڭالىق, ورتاتوبە اۋىلدارىنا بەرىلدى.

«ەسكەلدى اۋدانىندا 33 ەلدى مەكەننىڭ 21-ءى گازداندىرۋعا جاتادى. ونىڭ 10-ى بۇگىندە گازداندىرىلدى, 9 ەلدى مەكەندە گاز تاراتۋ جەلىلەرىن سالۋ جۇمىستارى ءجۇرىپ جاتىر. قاينارلى اۋىلىنا گاز تاراتۋ جەلىلەرىنىڭ قۇرىلىس-مونتاجداۋ جۇمىستارىنىڭ كونكۋرستىق پروتسەدۋرالارى اياقتالدى. جالعىزاعاش اۋىلىن گازبەن قامتۋ بويىنشا جوبالىق جۇمىستار جۇرگىزىلىپ جاتىر. سونىڭ ناتيجەسىندە 2025 جىلى اتالعان بارلىق جوبا ىسكە اسىرىلعاننان كەيىن اۋدان 100% گازداندىرىلادى», دەدى اۋدان اكىمىنىڭ ورىنباسارى ايدىن يسابەكوۆ.

قاراتال اۋدانى تۋرالى ايتاتىن بولساق, بۇگىندە كوكدالا, دوستىق, قانابەك, جاڭاتالاپ, كالپە, ويان, باستوبە, ورتاتوبە اۋىلدارىندا گاز تاراتۋ جەلىلەرىنىڭ قۇرىلىسى اياقتالدى. ۇشتوبە قالاسى تۇرعىندارىنىڭ 40%-ى نەمەسە قالانىڭ باتىس بولىگىنىڭ 8 مىڭنان اسا تۇرعىنى كوگىلدىر وتىنعا قول جەتكىزدى. جىل سوڭىنا دەيىن 11 مىڭعا جۋىق ادام تۇراتىن قالانىڭ قالعان شىعىس بولىگىن دە گازبەن قامتۋ جوسپارلانعان. سونىمەن قاتار اۋداننىڭ 5 اۋىلىندا گازداندىرۋ جۇمىستارى ءجۇرىپ جاتىر. بۇل ەلدى مەكەندەردى گازعا قوسۋ جىل سوڭىنا دەيىن كەزەڭ-كەزەڭىمەن جۇزەگە اسىرىلادى. اۋدان 2025 جىلدىڭ سوڭىنا دەيىن تولىق گازداندىرىلادى.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنە سۇيەنسەك, ەسكەلدى اۋدانىنىڭ ەلدى مەكەندەرى مەن تەكەلى قالاسىن گازداندىرۋ ءۇشىن 2018 جىلى ۇزىندىعى 31,3 كم «تالدىقورعان-تەكەلى» جوعارى قىسىمدى گاز قۇبىرى سالىنعان.

بۇگىندە وبلىستاعى گازداندىرۋ دەڭگەيى – 47,6%, ال جىل سوڭىنا دەيىن بۇل كورسەتكىش 50%-دان اسادى. 2025 جىلدىڭ سوڭىنا دەيىن ءوڭىردىڭ 506,6 مىڭ تۇرعىنى بار 126 ەلدى مەكەنىن گازداندىرۋ جوسپارلانعان.

جەتىسۋ وبلىسى