تابيعاتى تامىلجىعان تالعار قالاسىنداعى مادەنيەت ۇيىندە ارداگەر سپورتشىلار مەن ونەرپازداردىڭ قاتىسۋىمەن «سالاماتتى ءومىر سالتى» اتتى ونەر فەستيۆالى ءوتتى. ءىس-شارانىڭ اشىلۋ سالتاناتىندا تالعار اۋدانىنىڭ اكىمى تانات ايداربەكوۆ, «ارداگەرلەر ۇيىمى» رەسپۋبليكالىق قوعامدىق بىرلەستىگى الماتى وبلىستىق فيليالى توراعاسىنىڭ ورىنباسارى ءىلياس سۇگىروۆ ونەردى ومىرىنە وزەك ەتكەن ارداگەرلەردى قۇتتىقتاپ, اقجارما تىلەكتەرىن اقتاردى.
«ەل ءىشى – ونەر كەنىشى» دەگەن. حالقىمىزدىڭ ۇلتتىق باي مۇراسىن, وشپەس ونەرىن ۇرپاقتان-ۇرپاققا دارىپتەپ, ناسيحاتتاپ جۇرگەن اقسامايلى ارداگەرلەردىڭ ەل مادەنيەتىنىڭ دامۋىنا قوسار ۇلەستەرى وراسان. وسى سەبەپتى, ارداگەرلەر مەن زەينەتكەرلەردىڭ قوعامدىق بەلسەندىلىگىن نىعايتىپ, ولاردى مادەني-بۇقارالىق ءىس-شارالارمەن قامتۋ, شىعارماشىلىققا قۇلشىنىسىن ارتتىرۋ – «ارداگەرلەر ۇيىمىنىڭ» باستى ماقساتى.
بۇعان دەيىن اۋىل, اۋدانارالىق بايقاۋلاردان توپ جارعان ارداگەرلەر وبلىستىق باسەكەدە دە جۇزدەن جۇيرىك تانىلۋعا تىرىستى. ءوڭىردىڭ بارلىق اۋدانى قامتىلعان ونەر دوداسىندا ارداگەر ونەرپازدار ۆوكالدى انسامبل, تريو, دۋەت, جەكە ورىنداۋشى, مانەرلەپ وقۋدان سىنعا ءتۇستى.
حالىق كومپوزيتورلارى ءشامشى قالداياقوۆ پەن اسەت بەيسەۋوۆتىڭ اندەرىن ناقىشىنا كەلتىرە ورىنداعان «قوس جۇلدىز» بايقاۋىندا وبلىسقا قاراستى 9 اۋدان, 1 قالادان 10 كوماندا قاتىسىپ, ساحنادا بارلىعى 60 قاريا ونەر كورسەتتى. ونەرپازداردىڭ ارقايسىسى ءتۇرلى سالادا قىزمەت اتقارعان ارداگەرلەر. ءبىرى ۇستاز, ەندى ءبىرى دارىگەر, كەلەسىسى تاربيەشى, باسقا دا سان سالادا تاباندى ەڭبەك ەتىپ, بۇگىنگى تاڭدا قۇرمەتتى دەمالىسقا شىققان ارداقتى اتا-اجەلەر.
بايقاۋعا قاتىسقان قازىنالى قاريالار مۋزىكالىق اسپاپتىڭ سۇيەمەلدەۋىمەن تابيعي داۋىستا تامىلجىتا ءان شىرقاپ قانا قويماي, كوركەمسوز وقۋداعى شەبەرلىكتەرىمەن كورەرمەندەردى ءتانتى ەتتى. ءىس-شارا جەڭىمپازدارى «ۇزدىك ۆوكالدىق انسامبل», «ۇزدىك تريو», «ۇزدىك دۋەت», «ۇزدىك جەكە ورىنداۋشى», «مانەرلەپ وقۋ» اتالىمدارى بويىنشا ماراپاتتالدى. بارلىق جەڭىمپاز اقشالاي سىيلىقتارعا يە بولدى.
حالىقتىق ءان شاشۋمەن باستالعان ونەر فەستيۆالى ارداگەرلەر اراسىندا سپورتتىق ويىندارعا ۇلاستى. وندا وبلىستىق شاحمات جانە ۇستەل ويىندارىنان مامانداندىرىلعان سپورت مەكتەبىنىڭ ادىسكەرى مەرەي اينەكوۆ ويىن ەرەجەسىمەن تانىستىرىپ, قاتىسۋشىلارعا ساتتىلىك تىلەدى. شاحمات جارىسى – تەرەڭ اقىل مەن ەپتى ستراتەگياعا قۇرىلعان ويىن, سونىمەن قاتار وي-ءورىستى ماشىقتاندىراتىن, جىلدام ءارى دۇرىس شەشىم قابىلداۋعا باۋليتىن, ەستە ساقتاۋ قابىلەتىن جاقسارتۋعا ۇلەس قوساتىن سپورت ءتۇرى بولعاندىقتان, ارداگەرلەردىڭ بۇقارالىق سپورتتىڭ بۇل تۇرىنە قىزىعۋشىلىقتارى ەرەكشە ەكەندىگىن اڭعاردىق.
ء«ومىر بويى ەڭبەك ەتىپ, ەل دامۋىنا ۇلەس قوسقان اقسامايلى قاريالاردىڭ قوعام نازارىندا بولۋى ورىندى. ولاردىڭ شىعارماشىلىقپەن اينالىسىپ, ونەرلەرىن كورسەتۋدە مۇنداي ءىس-شارالار ءجيى ۇيىمداستىرىلىپ, قولداۋ ءبىلدىرىلىپ تۇرۋىن قالايمىز. جاسى 80-گە جەتسە دە سپورتتان قول ۇزبەگەن قاريالارىمىز بار. ولاردىڭ ومىرلىك ۇستانىمدارى مەن ويىن شەبەرلىكتەرى وسكەلەڭ ۇرپاققا ونەگە بولارى ءسوزسىز», دەيدى جارىسقا قاتىسۋشى ارداگەر جۋرناليست تۇرسىنبەك جالعاسباەۆ.
ارداگەرلەر اراسىنداعى شاحمات, دويبى ءتۋرنيرىنىڭ قورىتىندىسى بويىنشا شاحماتتان قاراساي اۋدانى بويىنشا اماندۋللا ابديمۋراتوۆ I ورىن يەلەنسە, قوناەۆ قالاسىنان قاتىسقان جاقسىلىق احمەتجانوۆ II ورىندى قانجىعالادى. ءوز كەزەگىندە يەمبەردى تاستانوۆ, وسمان گاپپاروۆ III ورىنعا تابان تىرەدى.
دويبى جارىسى بويىنشا بالقاش اۋدانىنان مارات قاشقىنباەۆ I ورىن, قوناەۆ قالاسىنان ە.قابىلوۆ II ورىندى يەلەنسە, تالعار اۋدانىنان ق.احمەتوۆ پەن ىلە اۋدانىنىڭ ارداگەرى ر.ساداباەۆ III ورىن جەڭىمپازى اتاندى. جەڭىمپازدارعا اقشالاي سىيلىقتارمەن قوسا, ديپلوم, العىسحاتتار تابىستالدى.
الماتى وبلىسى