اتوم ەلەكتر ستانساسى قۇرىلىسى ماسەلەسىن ءتۇسىندىرۋدى ماقسات تۇتقان حالىق شتابى ەسىك قالالىق گۋمانيتارلىق-ەكونوميكالىق كوللەدجىنىڭ ستۋدەنتتەرىمەن كەزدەسۋ وتكىزدى. كەزدەسۋدىڭ ماقساتى – جاستارعا اتوم ەلەكتر ستانساسىن سالۋ تۋرالى اقپارات بەرۋ, ەنەرگەتيكا سالاسىنداعى قازىرگى جاعدايدى تالقىلاۋ. وڭىرلىك حالىق شتابى مۇشەسى باعدات راحيموۆ اەس سالۋدىڭ ەنەرگەتيكالىق سالاسىنا ىقپالى تۋرالى باياندادى.
«قازىر ەلىمىزدەگى ەلەكتر ەنەرگياسىنىڭ شامامەن 70 پايىزى كومىردەن الىنادى. ەنەرگەتيكا مينيسترلىگىنىڭ مالىمەتىنشە, 2035 جىلعا قاراي ەلەكتر ەنەرگياسىن تۇتىنۋ 152,4 ملرد كۆت/ساعاتقا جەتۋى مۇمكىن, ال قولدانىستاعى ستانسالار بۇل قاجەتتىلىكتى تولىق قامتاماسىز ەتە الماۋى ىقتيمال. بۇل جاعداي ەلىمىزگە قوسىمشا ەنەرگەتيكالىق شەشىمدەردى قاراستىرۋ قاجەتتىلىگىن تۋعىزادى», دەدى ول.
كەزدەسۋدە اەس قۇرىلىسىنىڭ تەحنولوگيالىق ەرەكشەلىكتەرى مەن قاۋىپسىزدىك شارالارى تالقىلاندى. حالىقارالىق ستاندارتتارعا ساي III جانە III+ بۋىن رەاكتورلارىنىڭ قولدانىلۋى, ولاردىڭ قاۋىپسىزدىك جۇيەسى جانە اپاتتاردىڭ الدىن الۋعا ارنالعان تەحنولوگيالار تۋرالى ءتۇسىندىرىلدى. ستۋدەنتتەر تاراپىنان قويىلعان سۇراقتارعا جاۋاپ بەرىلىپ, رەاكتورلاردىڭ جۇمىس قاعيداتتارى جانە قاۋىپسىزدىك تالاپتارى جان-جاقتى قارالدى.
حالىقتىق شتابتىڭ تاعى ءبىر مۇشەسى گۇلنار قۇرامەتوۆا اەس سالۋ جوباسىنىڭ ەكونوميكالىق جانە الەۋمەتتىك اسەرلەرى تۋرالى ءوز ويىمەن ءبولىستى.
«اەس سالۋ جوباسى ەلىمىزدىڭ ەنەرگەتيكا سالاسىنا جاڭا تەحنولوگيالاردى ەنگىزۋدى تالاپ ەتەدى جانە بۇل جوبانىڭ ەلدىڭ ەنەرگەتيكالىق بالانسىنا اسەرى ماڭىزدى بولماق. 6 قازاندا وتەتىن رەسپۋبليكالىق رەفەرەندۋمدا بۇل ماسەلە قوعامنىڭ نازارىنا ۇسىنىلادى», دەپ اتاپ ءوتتى گ.قۇرامەتوۆا.
كەزدەسۋ سوڭىندا ستۋدەنتتەر مەن وقىتۋشىلار اەس قۇرىلىسىنا قاتىستى سۇراقتارىن قويىپ, پىكىرلەرىمەن ءبولىستى. جاستار ەنەرگەتيكا سالاسىنداعى وزەكتى ماسەلەلەردى تالقىلاپ, اەس سالۋدىڭ الەۋەتتى اسەرى تۋراسىندا مول ماعلۇماتقا قانىقتى.
الماتى وبلىسى