سىبايلاس جەمقورلىققا قارسى ءىس-قيمىل اگەنتتىگىنىڭ جاڭارتىلعان قوعامدىق كەڭەسىنىڭ ءبىرىنشى وتىرىسى ءوتتى.
كەڭەس قۇرامىنا پارلامەنت ءماجىلىسىنىڭ دەپۋتاتتارى – مارات ءباشىموۆ, نيكولاي ارسيۋتين, ايدوس سارىم, سونداي-اق بەيبىت مامراەۆ, ديحان قامزابەك ۇلى, كاكىمجان بيشمانوۆ, اينۇر سابيتوۆا, مەلس سەمگاليەۆ, ەربول ۇستەمىروۆ, سەرىك ساپيەۆ, عاني نىعمەتوۆ, ميحايل كولومين سىندى قوعام قايراتكەرلەرى مەن عالىمدار كىردى.
وتىرىستا قوعامدىق كەڭەستىڭ توراعاسى بولىپ اشىق داۋىس بەرۋ ارقىلى ءبىراۋىزدان مارات ءباشىموۆ قايتا سايلاندى.
سىبايلاس جەمقورلىققا قارسى قىزمەت باسشىسى اسحات جۇماعالي ءوز سوزىندە اگەنتتىك جۇمىسى تيىمدىلىگىنىڭ نەگىزگى كورسەتكىشى ازاماتتاردىڭ سەنىم دەڭگەيى ەكەنىن جانە بۇعان قوعاممەن بەلسەندى ءوزارا ءىس-قيمىل ارقىلى عانا قول جەتكىزۋگە بولاتىنىن اتاپ ءوتتى.
«جەمقورلىققا قارسى ماڭىزدى باستامالار قوعامدىق كەڭەس مۇشەلەرىمەن تالقىلانادى. كەڭەس زاڭنامانى جەتىلدىرۋ بويىنشا ۇسىنىستار ەنگىزۋگە, ستراتەگيالىق قۇجاتتاردى تالقىلاۋعا قاتىسۋعا, اگەنتتىكتىڭ جۇمىسىنا مونيتورينگ پەن باعالاۋ جۇرگىزۋگە, سونداي-اق ونى ودان ءارى جاقسارتۋ ءۇشىن ۇسىنىمدار ازىرلەۋگە قۇقىلى», دەدى ا.جۇماعالي.
قوعامدىق كەڭەستەر جەمقورلىققا قارسى ساياساتتى ىسكە اسىرۋ ۇدەرىسىندە ماڭىزدى ءرول اتقارادى. ولاردىڭ ىقپالى مەن وكىلەتتىگى جىل سايىن ارتىپ كەلەدى. كەڭەس مۇشەلەرى ۇكىمەتتىك ەمەس ۇيىمداردىڭ, بۇقارالىق اقپارات قۇرالدارىنىڭ جانە عىلىمي توپتاردىڭ ساراپشىلارىن تارتا وتىرىپ, وزەكتى ماسەلەلەردى زەرتتەۋ ءۇشىن جۇمىس توپتارىن قۇرا الادى.
قوعامدىق كەڭەستىڭ جاڭادان سايلانعان توراعاسى مارات ءباشىموۆ ارىپتەستەرىنە سەنىم بىلدىرگەنى ءۇشىن العىس ايتىپ, ەلدىڭ جەمقورلىققا قارسى ساياساتىن جاقسارتۋ باعىتىندا بەلسەندى جۇمىستى جالعاستىرۋعا دايىن ەكەنىن ءبىلدىردى.
وتىرىستى قورىتىندىلاي كەلە, اسحات جۇماعالي قاتىسۋشىلارعا العىس ءبىلدىرىپ, جەمقورلىققا قارسى ءىس-قيمىلدى كۇشەيتۋگە باعىتتالعان جاڭا باستامالاردى ازىرلەۋدە ساتتىلىك تىلەدى.