الماتى وبلىسىنىڭ دارىگەرلەرى بوسانعاننان كەيىن قابىنۋ ۇدەرىسى سالدارىنان بۇيرەگى ىستەن شىعىپ, ءتورت تاۋلىك كوماعا تۇسكەن انانىڭ ءومىرىن امان الىپ قالدى.
الماتى كوپسالالى كلينيكالىق اۋرۋحاناسىنا رايىمبەك اۋدانىنان جاڭا بوسانعان ايەلدىڭ جاعدايى ناشارلاعانى تۋرالى شۇعىل حابارلاما كەلىپ تۇسكەن بويدا اككا دارىگەرلەرى مەن ماماندارى ۋاقىت سوزباي سانيتارلىق اۆياتسيامەن نارىنقول اۋىلىنا ۇشىپ جەتكەن.
جەرگىلىكتى دارىگەرلەردىڭ ايتۋىنشا, ايەل جۇكتىلىكتىڭ 36 اپتاسىندا بەل ايماعىنداعى جانە ءىشتىڭ تومەنگى بولىگىندەگى قاتتى اۋىرسىنۋ تۋرالى شاعىممەن اۋرۋحاناعا تۇسكەن. دارىگەرلەر شۇعىل كەسار تىلىگى وپەراتسياسىن جاساپ, ايەل سالماعى 3390 گرامم قىزدى دۇنيەگە اكەلگەن. وپەراتسيادان كەيىن سەگىزىنشى كۇنى ناۋقاس بالاسىمەن قاناعاتتانارلىق جاعدايدا اۋرۋحانادان شىعارىلعان. الايدا ءبىر اپتادان كەيىن جاس انا اۋداندىق اۋرۋحاناعا قايتا ءتۇستى. ايەلدىڭ كۇيەۋىنىڭ ايتۋىنشا, كەنەتتەن ەسىنەن تانىپ, ۇيدە قۇلاپ قالعان.
نارىنقول اۋداندىق اۋرۋحاناسىنا جەدەل جەتكەن بوساندىرۋ ورتالىعىنىڭ ديرەكتورى گ.جۇمادۋللاەۆا, رەانيماتسيا جانە قارقىندى تەراپيا بولىمشەسىنىڭ مەڭگەرۋشىسى م.بالتاەۆ, تامىر حيرۋرگى ع.باقتىباەۆ, گەمودياليز بولىمشەسىنىڭ مەڭگەرۋشىسى م.قاعازباەۆا, كارديولوگ دارىگەر ا.تۇرساعاتوۆا ەس-ءتۇسسىز جاتقان ناۋقاسقا مەديتسينالىق كومەك كورسەتەدى.
«قىسقا ۋاقىت ىشىندە ناۋقاستىڭ جۇرەگى ءتورت رەت توقتادى. جۇرگىزىلگەن رەانيماتسيالىق ءىس-شارانىڭ ناتيجەسىندە, جەرگىلىكتى رەانيماتولوگ پەن الماتى كوپسالالى كلينيكالىق اۋرۋحاناسىنىڭ ماماندارى پاتسيەنتتىڭ جۇرەك-قانتامىر قىزمەتىن ءساتتى قالپىنا كەلتىردى», دەيدى اككا كارديولوگ دارىگەرى ايگۇل تۇرساعاتوۆا.
ناۋقاستىڭ جۇرەك قىزمەتى قالپىنا كەلتىرىلگەننەن كەيىن رەسپۋبليكا كولەمىندە بەيىندى شتاتتان تىس ماماندارىنىڭ قاتىسۋىمەن تەلەمەديتسينالىق كونسيليۋم ۇيىمداستىرىلدى.
«ناۋقاستا قابىنۋ ۇدەرىسى تەز دامىپ, اعزاداعى كوپتەگەن مۇشەلەردىڭ اسقىنۋى بايقالىپ, سونىڭ سالدارىنان بۇيرەك جەتكىلىكسىزدىگى پايدا بولدى. ناۋقاس بىردەن «prismaflex» گومەوستازدى ەكستراكورپورالدى تۇزەتۋ اپپاراتىنا قوسىلدى. بۇل – سەپتيكالىق شوكتىڭ اۋىر جاعدايىندا بۇيرەكتىڭ زاقىمدانۋى بار ناۋقاستارمەن جۇمىس ىستەۋگە ارنالعان ارنايى قۇرىلعى. اپپارات بىزگە 72 ساعات بويى تەراپەۆتىك پلازمالىق الماسۋدى جانە بۇيرەكتى الماستىرۋ تەراپياسىن ۇزارتۋعا مۇمكىندىك بەردى, ونىڭ ىشىندە: مەتابوليزم ونىمدەرىن جويۋ, سۇيىقتىقتى شىعارۋ, قىشقىل-نەگىز بالانسىن باقىلاۋ, ەلەكتروليت بالانسىن قالپىنا كەلتىرۋ جۇمىستارى جۇرگىزىلدى», دەيدى نەفرولوگ دارىگەر مايرا قاعازباەۆا.
ماماندار اۋداندىق اۋرۋحانادا ءتورت تاۋلىك بويى مەديتسينالىق كومەك كورسەتىپ, ۆازوپرەسسورلاردىڭ دوزالارىن ازايتىپ, جەلدەتكىشتە سانيتارلىق اۆياتسيا جەلىسى بويىنشا بەسىنشى تاۋلىكتە گەموديناميكانى تۇراقتاندىرۋ ءۇردىسى انىقتالعاننان كەيىن ناۋقاس اككا رەانيماتسياسىنا اۋىستىرىلدى.
«الماتى وبلىسى دەنساۋلىق ساقتاۋ باسقارماسى باسشىسىنىڭ ورىنباسارى ل.سەرىكباەۆادان اۋىر حالدەگى ايەل تۋرالى اقپارات العان ساتتەن باستاپ قاجەتتى دياگنوستيكالىق ادىستەرمەن, دارىلىك زاتتارمەن جانە ماماندارمەن قامتاماسىز ەتۋگە قاتىستى شارالاردى بىرلەسىپ ۇيىمداستىردىق. مامانداردىڭ ۇيلەسىمدى جۇمىسى مەن كاسىبيلىگىنىڭ ارقاسىندا قازىرگى ۋاقىتتا ناۋقاس ءوزىن جاقسى سەزىنىپ, جالپى پالاتاعا اۋىستىرىلىپ, حاتتاماعا سايكەس ەمدەۋدى جالعاستىرىپ جاتىر. مۇنداي جاعدايلاردا, ادەتتە, ءولىم-ءجىتىم قاۋپى وتە جوعارى بولادى. ارىپتەستەرىمىزبەن بىرلەسە بىلىكتىلىك تانىتىپ, كۇش-جىگەرمەن ناۋقاستى قۇتقارا العانىمىزعا قۋانىشتىمىز, ول كوپ ۇزاماي اۋىر زارداپتارسىز بالالارىنا ورالاتىن بولادى», دەدى اككا ديرەكتورى ەلميرا بەرىكوۆا.
جالپى مەديتسينالىق قىزمەت كورسەتۋدىڭ ساپاسى مەن قولجەتىمدىلىگىن قامتاماسىز ەتۋدىڭ ماڭىزى زور. سول ورايدا ءوڭىر دارىگەرلەرىنىڭ ءولىم اۋزىندا جاتقان اناعا تەز ارادا كومەككە كەلىپ, جان-جاقتى بىلىكتىلىك تانىتۋى بۇگىنگى مەديتسينانىڭ جەتىستىگى ەكەندىگى ءسوزسىز.
الماتى وبلىسى