بۇگىنگى تاڭدا ەلىمىزدىڭ ساياسي, ەكونوميكالىق جانە الەۋمەتتىك سالالارىنا قاتىستى ايتىلعان بارلىق باستاماعا ەرەكشە نازار اۋدارۋ – ءاربىر ازاماتتىڭ پارىزى. پرەزيدەنت قاسىم-جومارت توقاەۆتىڭ جولداۋىن وسى باعىتتاعى ماڭىزدى ستراتەگيالىق قادام دەسەك بولادى.
مەملەكەت باسشىسى اتاپ وتكەن ماسەلەلەردىڭ ءبىرى – ءبىلىم جۇيەسىنىڭ زاماناۋي تالاپتارعا ساي بولىپ, وقۋشىلارعا ساپالى ءبىلىم بەرۋ. بۇل تەك قانا ءبىلىم بەرۋ مەكەمەلەرى ءۇشىن ەمەس, سونداي-اق وقۋلىقتار مەن وقۋ-ادىستەمەلىك قۇرالدارىن دايىندايتىن باسپالارعا ۇلكەن جاۋاپكەرشىلىك جۇكتەيدى. ءبىزدىڭ ۇجىم ەلىمىزدەگى ءبىلىم سالاسىندا وقۋلىقتار دايىندايتىن جەتەكشى باسپا رەتىندە پرەزيدەنتتىڭ ءبىلىم بەرۋ سالاسىنداعى رەفورمالارىن تولىق قولدايدى.
«جايلى مەكتەپ» جوباسى – ەلىمىزدىڭ بولاشاق ۇرپاقتارىنىڭ زاماناۋي, ساپالى ءبىلىم الۋىنا جاسالعان اسا ماڭىزدى باستاما. باسپامىز وسى جوباعا قاتىسۋ ارقىلى مەكتەپتەرگە قاجەتتى وقۋلىقتار مەن وقۋ ماتەريالدارىن ازىرلەپ, ساپالى بىلىمگە ءوز ۇلەسىمىزدى قوسىپ جاتقانىمىزدى ماقتان تۇتادى. ءبىلىم ۇيىمدارىنا وقۋلىقتار دايىنداۋ ۇرپاقتىڭ كەمەل بولاشاعىنا ينۆەستيتسيا سالۋ دەپ بىلەمىز.
سونىمەن قاتار مەملەكەت باسشىسى اتاپ وتكەن الەۋمەتتىك ماسەلەلەر, اسىرەسە, بالالاردى قورعاۋ ءىسى دە باستى نازاردا بولۋعا ءتيىس. وسى ورايدا قوعامداعى ماڭىزدى ماسەلەلەردى كوتەرىپ, مەكتەپتەر مەن ءبىلىم مەكەمەلەرىنە بالالاردىڭ قۇقىقتارى مەن قاۋىپسىزدىگىن قامتاماسىز ەتەتىن ماتەريالدار دايىنداۋعا ارقاشان دايىنبىز.
باسپا قىزمەتىنىڭ نەگىزگى باعىتتارىنىڭ ءبىرى – تسيفرلىق ءبىلىم بەرۋ رەسۋرستارىن دامىتۋ. ءبىز جاساندى ينتەللەكتىنى ءبىلىم بەرۋ جۇيەسىنە ەنگىزۋدى بەلسەندى جۇزەگە اسىرىپ جاتىرمىز. پرەزيدەنت جولداۋىندا ايتىلعانداي, ەلىمىز جاساندى ينتەللەكت تەحنولوگيالارىن دامىتۋدا الدىڭعى قاتاردا بولۋى كەرەك.
الينا ديدارا سۇلتان-ماحمۋدقىزى,
Arman-PV باسپاسىنىڭ ديرەكتورى