«ەڭبەك رەسۋرستارىن دامىتۋ ورتالىعى» اق «مانساپ كومپاسى» اتتى جاڭا پلاتفورمانى ىسكە قوستى. تسيفرلىق شەشىم پايدالانۋشىلارعا ەڭبەك نارىعىنداعى وزەكتى ترەندتەردى زەردەلەۋگە, ءارتۇرلى كاسىپتەردىڭ سۇرانىسىن سالىستىرۋعا جانە وڭتايلى ءبىلىم تراەكتورياسىن تاڭداۋعا بىرەگەي مۇمكىندىك بەرەدى.
پلاتفورما 2019 جىلدان بەرگى ەلىمىزدىڭ ەڭبەك نارىعىنداعى دەرەكتەردى تالدايدى. بۇل پايدالانۋشىلارعا وزگەرىستەر ديناميكاسىن باعالاۋعا جانە بولاشاق ۇردىستەردى بولجاۋعا مۇمكىندىك بەرەدى.
جوبا ازاماتتارعا ەڭ كوپ سۇرانىسقا يە كاسىپتەردى باعدارلاۋعا جانە ەڭ جاقسى ەڭبەك جاعدايى جاسالعان ايماقتاردى تاڭداۋعا سەپتەسەدى. سونىمەن قاتار پلاتفورما جوعارى وقۋ ورىندارى, ماماندىقتار جانە مەملەكەتتىك گرانتتار الۋ مۇمكىندىكتەرى تۋرالى تولىق مالىمەت بەرەدى.
جوبانى باستاۋ ءۇشىن جوعارى ءبىلىم الۋدى تالاپ ەتەتىن 400-دەن اسا كەڭ تارالعان ماماندىقتارعا تەرەڭ تالداۋ جۇرگىزىلدى. كەلەسى كەزەڭدەردە وسىنداي جۇمىس نەگىزگى تەحنيكالىق جانە جۇمىسشى ماماندىقتار بويىنشا, سونداي-اق قوسىمشا ءبىلىم سالاسىندا جۇرگىزىلەدى.
2024 جىلدىڭ سوڭىنا قاراي ماماندىقتار تۋرالى دەرەكتەردى دالىرەك بولجاۋ جانە تالداۋ ءۇشىن ماشينالىق وقىتۋ مودەلدەرىن ەنگىزۋ جوسپارلانىپ وتىر. پورتالدا جاڭا فۋنكتسيونال پايدا بولادى. مىسالى, كاسىپتەر, ءبىلىم باعدارلامالارى مەن جۇمىس ورىندارى تۋرالى اقپاراتتى ساقتاۋعا ارنالعان مالىمەتتەر بازاسى, سونداي-اق پايدالانۋشىلاردىڭ داعدىلارىن باعالاۋ جانە جاقسارتۋ قۇرالدارى سياقتى باسىمدىقتار قاراستىرىلادى.
«مانساپ كومپاسى» جوباسىنىڭ اۋديتورياسى ءوز مانسابىن جوسپارلاۋعا جانە كاسىبي دامۋعا مۇددەلى ادامداردىڭ ءارتۇرلى ساناتىن قامتيدى. ءبىرىنشى كەزەڭدە – مەكتەپ تۇلەكتەرى مەن ستۋدەنتتەر. ولار ءۇشىن پلاتفورما سۇرانىسقا يە ماماندىقتار, جوعارى وقۋ ورىندارىنا تۇسۋشىلەرگە قويىلاتىن تالاپتار جانە گرانتتار الۋ مۇمكىندىكتەرى تۋرالى اقپارات كوزى بولا الادى. سونداي-اق تاڭدالعان ماماندىقتىڭ بولاشاعىن باعالاۋ, تاعىلىمدامادان ءوتۋ جانە بولاشاق جۇمىستى ىزدەۋ ءۇشىن مالىمەت بەرەدى», دەپ اتاپ ءوتتى ەردو ۆيتسە-پرەزيدەنتى شالقار بايقۇلاقوۆ.
سونىمەن قاتار پورتال ماماندىعىن وزگەرتكىسى كەلەتىن ادامدار ءۇشىن دە ءوز پايداسىن تيگىزبەك.