«Samruk-Kazyna Trust» الەۋمەتتىك جوبالاردى دامىتۋ قورىنىڭ ينكليۋزيا باعىتىنداعى بىرەگەي جوباسى – «All Ability Camp» سپورت-موتيۆاتسيا لاگەرى بيىل ەلىمىزدىڭ تۇكپىر-تۇكپىرىنەن 200-دەن اسا بالا مەن ولاردىڭ اتا-انالارىن قابىلدادى. قور جوبانى ەكىنشى جىل قاتارىنان قولداپ كەلەدى. بيىل يگىلىكتى ءىس پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن بىرگە ىسكە اسىرىلدى.
وسىلايشا, ەرەكشە بالالار مەن جاسوسپىرىمدەردى سپورتقا تارتىپ, ولاردىڭ قوعامعا الەۋمەتتىك بەيىمدەلۋىنە جاردەم كورسەتىلىپ كەلەدى. ماسەلەن, پاراليمپيادالىق فەدەراتسيالاردىڭ تاجىريبەلى جاتتىقتىرۋشىلارىنىڭ جەتەكشىلىگىمەن بوچچا, ءجۇزۋ, جەڭىل اتلەتيكا, ۇستەل تەننيسى جانە ت.ب. بەيىمدەلگەن سپورت تۇرلەرىمەن تانىستىرىپ قانا قويماي, تاجىريبە جۇزىندە مەڭگەرۋىنە سەپ بەرەدى. جوبانىڭ ەرەكشەلىكتەرىنىڭ ءبىرى – مۇگەدەكتىگى بار بالالارعا عانا ەمەس, ولاردىڭ اتا-انالارىنا دا باعىتتالۋى. اتاپ ايتقاندا, ترەنينگتەر مەن سەمينارلار, بەلسەندى دەمالىس ۇيىمداستىرۋ ارقىلى ولاردىڭ ومىرگە ىنتا-جىگەرىن ارتتىرۋ. اتا-انالارمەن جۇمىس ەرەكشە بالالارمەن جۇمىس ىستەۋدىڭ نەگىزگى ارقاۋى سانالادى. ۇيىمداستىرىلعان سەسسيالار بارىسىندا اتا-انالار تيۋتەرلەر مەن ەرىكتىلەردىڭ سۇيەمەلدەۋىمەن سان الۋان شىعارماشىلىق, تانىمدىق, دامىتاتىن ءىس-شارالارمەن, ارت-تەراپيامەن جانە مۋزىكالىق تەراپيامەن قامتىلدى.
ء«بىزدىڭ ەرەكشە جوبامىز بالالار مەن اتا-انالاردى ءبىر سەرپىلتىپ, بولاشاق ومىرگە دايىنداۋعا كومەكتەسەدى. جالپى, قورىمىزدىڭ قىزمەتى ينكليۋزيۆتى قوعامدى دامىتۋعا باعىتتالعان. قازىرگى ۋاقىتتا قور كومپانيالارى توبى اتىنان 42 وڭالتۋ ورتالىعى اشىلىپ, 23 قالادا مىڭنان اسا بالا اينالىساتىن بەيىمدەلگەن سپورت سەكتسيالارى جۇمىس ىستەيدى. جاقىندا ينكليۋزيا سالاسىنداعى 100-دەن اسا ساراپشىنى وقىتۋدى اياقتادىق. سونداي-اق 180 مۇمكىندىگى شەكتەۋلى ادام وقىتۋدان ءوتىپ, سۇرانىسقا يە IT ماماندىقتاردى مەڭگەرەدى. مەكتەپتەردە ينكليۋزيانى قولداۋ كابينەتتەرىن قۇرۋدى جوسپارلاپ وتىرمىز. بۇل جوبالاردىڭ بارلىعى ءبىرىن-ءبىرى تولىقتىرىپ جاتىر», دەپ اتاپ ءوتتى «Samruk-Kazyna Trust» قورىنىڭ باس ديرەكتورى, ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى الفيا اديەۆا.
ءار ماۋسىم سايىن لاگەردە تانىمال پاراليمپياداشىلار, ولاردىڭ اراسىندا جەڭىل اتلەتيكادان قازاقستان چەمپيونى ايدانا سيازوۆا جانە جۇزۋدەن پاراسپورتشى يۆان گلازىرين بولىپ, جەكە تابىس وقيعالارى ارقىلى قاتىسۋشىلاردى شابىتتاندىردى. لاگەر اياسىندا جاسوسپىرىمدەر مەن ستۋدەنتتەردەن قۇرالعان ەرىكتىلەر ەرەكشە جاندارعا قولعابىس جاسادى.
«وسىنداي ەرەكشە لاگەرگە قاتىسقانىمىزعا مىڭ العىس. بالالار مەن اتا-انالاردىڭ رۋحى كوتەرىلىپ قالدى. ويتكەنى بالالارىمىزدىڭ كوبى ۇيدە وتىرادى, ال وسىنداي تىسقارى جەردە ءوز قاتارلاستارىمەن سىرلاسىپ, سپورت تۇرلەرىن مەڭگەرۋىنە نە جەتسىن؟ ماماندار كەڭەستەرىمەن ءبولىسىپ, ەرەكشە بالالاردىڭ پسيحولوگياسى مەن قاجەتتىلىكتەرى تۋرالى تىڭ اقپارات الدىق. مۇنداي لاگەرلەردىڭ ەلىمىزدە كوپتەپ اشىلعانىن تىلەيمىن», دەيدى ەكىباستۇز قالاسىنان كەلگەن ايدانا ەسىمدى ەرەكشە قىزدىڭ اناسى قارلىعاش ءۇسىنوۆا.
ينكليۋزيۆتى سپورت لاگەرى تەك دەمالىس ورنى عانا ەمەس, مۇندا ەرەكشە قاجەتتىلىكتەرى بار بالالار ءوزىنىڭ فيزيكالىق الەۋەتىن دامىتىپ, پسيحولوگيالىق كەدەرگىلەردى جەڭۋگە, ءوز قابىلەتىنە دەگەن سەنىمدىلىكتى تابۋعا ۇيرەندى. جوبا ءار بالا ءوزىنىڭ ەرەكشەلىكتەرىنە قاراماستان ءوسىپ, دامىپ, الداعى بولاشاعىنا ارمان قۇراتىن جارقىن ورتاعا اينالدى. ەڭ ماڭىزدىسى دا وسى.