ماجىلىسمەن امانجول ءالتاي پلەنارلىق وتىرىستا اۋە كومپانيالارىنىڭ دومبىرا اسپابىن ۇشاققا كىرگىزبەۋ ماسەلەسى شەشىلمەي جاتقانىن سىنعا الدى. كولىك مينيسترلىگى بۇل ماسەلەنى تۇزەتۋگە ۋادە بەردى, دەپ حابارلايدى Egemen.kz.
ماجىلىسمەننىڭ ايتۋىنشا, ۇشاققا دومبىرا الىپ كىرۋگە تىيىم سالۋ - اۋە كومپانيالارىنىڭ ۇلتتىق رامىزگە, قۇندىلىقتارعا دەگەن مەنسىنبەۋشىلىكتىڭ كورىنىسى. سونداي-اق ول ءاربىر ونەر وكىلىنىڭ ۇشاققا دومبىرا الىپ كىرۋگە قۇقىعى بولۋى كەرەك دەپ ەسەپتەيتىنىن مالىمدەدى.
كولىك ۆيتسە-ءمينيسترى ءساتجان ابلاليەۆ ءوز جاۋابىندا اۋە كەمەلەرىنىڭ بورتىندا مۋزىكالىق اسپاپتاردى تاسىمالداۋ ولاردىڭ كولەمىنە بايلانىستى ەكەنىن ەسكە سالدى. كەيبىر قۇرالداردى زاماناۋي ۇشاقتاردىڭ سورەلەرىنە قويۋ مۇمكىن ەمەستىگىن, سوندىقتان وسىنداي تۇسىنبەۋشىلىك تۋىندايتىنىن تىلگە تيەك ەتتى.
«قازىرگى كۇنى اۋە كومپانيالارىمەن بىرلەسىپ, وسى شارۋانى قالاي شەشۋگە بولادى دەگەن ماسەلە تالقىلانىپ جاتىر. كەرەك بولعان جاعدايدا جۇكتى تاسىمالداۋ, قول جۇگىن تاسىمالداۋ شارتتارىنا وزگەرىس ەنگىزۋگە دايىندالىپ جاتىرمىز», دەدى ساتجان ابلاليەۆ.