كونستيتۋتسيا كۇنى قارساڭىندا الماتى وبلىسىنىڭ اكىمى مارات سۇلتانعازيەۆ 85 وتباسىعا «Sun City» تۇرعىن ءۇي كەشەنىنەن جاڭا پاتەر كىلتتەرىن تابىس ەتتى. باسپانا 10 جىلدان اسا ۋاقىت ءۇي كەزەگىندە تۇرعان وتباسىلارعا بەرىلدى.
پاتەرلەر قالانىڭ كوممۋنالدىق تۇرعىن ءۇي قورىنان باسپانا ساتىپ الۋ باعدارلاماسى اياسىندا تابىستالدى. جارىق تا جايلى پاتەرلەر «KazSMU» جشس-نىڭ 360 پاتەرلى كەشەنىنەن ساتىپ الىندى.
«پرەزيدەنت قاسىم-جومارت توقاەۆ تۇرعىن ۇيمەن قامتاماسىز ەتۋ مەملەكەتتىك الەۋمەتتىك ساياساتتاعى باسىمدىق ەكەنىن, بۇل ماسەلە ءجىتى نازارىندا بولاتىنىن ايتتى. وسى باعىتتا الماتى وبلىسىندا دا بەلسەندى جۇمىس جۇرگىزىلىپ جاتىر. بيىل الەۋمەتتىك وسال توپتارعا ارنالعان 1 304 پاتەردى ساتىپ الۋ جوسپارلانعان. ونىڭ 55-ءى بۇگىندە ساتىپ الىندى. وبلىس ورتالىعىندا قوسىمشا 145 پاتەر ساتىپ الىنىپ, الەۋمەتتىك وسال توپقا جاتاتىن ازاماتتارعا بەرىلەدى. جالپى, وبلىس بويىنشا 61 كوپپاتەرلى تۇرعىن ءۇي (1 618 پاتەر) قۇرىلىسى جۇرگىزىلىپ جاتىر. جىل سوڭىنا دەيىن 3 مىڭعا جۋىق وبلىس تۇرعىنى جاڭا باسپاناعا يە بولادى دەپ كۇتىلىپ وتىر», دەدى مارات ەلەۋسىز ۇلى.
جاڭا پاتەرگە يە بولعانداردىڭ ءبىرى – انار المۇراتوۆا. كۇمىس القا يەگەرى بەس قىز, ءبىر ۇل تاربيەلەپ وتىر. ول ون جىلدان بەرى قوناەۆ قالالىق اۋرۋحاناسىندا مەدبيكە بولىپ جۇمىس ىستەيدى.
«قوناەۆتا تۇرىپ جاتقانىمىزعا ون جىل بولدى. 2012 جىلى كوشىپ كەلدىم. كونستيتۋتسيا كۇنى قارساڭىندا ءۇي بەرىپ جاتىر, بالاپاندارىمىز وسى جەردەن ساباققا بارادى. ەكى بولمەلى ءۇي, 78 شارشى مەتر, ءىشى ۇلكەن», دەدى قۋانىشتان ءجۇزى بال-بۇل جانعان ا.المۇراتوۆا.
«Sun City» تۇرعىن ءۇي كەشەنى قالانىڭ جايلى ءارى قولايلى بولىگىندە ورنالاسقان. عيماراتتىڭ قۇرىلىسى ەكى جىل بۇرىن باستالىپ, بيىل پايدالانۋعا بەرىلدى. 12 قاباتتى نىساننىڭ اۋلاسى تولىق اباتتاندىرىلعان. بالالارعا ارنالعان سپورتتىق, ويىن-ساۋىق الاڭدارى دا ورناتىلىپتى.
«قوناەۆ قالاسىندا باسپانا كەزەگىندە 1 834 ادام تۇر. ولاردىڭ اراسىندا كوپبالالى انالار, جەتىم بالالار جانە مۇگەدەكتىگى بار ادامدار بار. جىل سوڭىنا دەيىن 165 پاتەردى ۇكىمەت تاراپىنان بەرۋ جوسپارلانىپ وتىر», دەدى قوناەۆ قالاسىنىڭ اكىمى اسحات بەردىحانوۆ.
كونستيتۋتسيا كۇنى الماتى وبلىسىندا كەڭىنەن اتالىپ ءوتتى. اتا زاڭىمىز ارداقتالعان مەرەيلى مەرەكە اياسىندا بارلىعى 45 مىڭنان اسا ادامنىڭ قاتىسۋىمەن 230 ءىس-شارا ۇيىمداستىرىلدى. ءوڭىردىڭ ءار تۇكپىرىندە وسى اتاۋلى كۇنگە ارنالعان سالتاناتتى جيىن, مەرەكەلىك كونتسەرت, كورمە, فلەشموب, مادەني ءىس-شارا, سپورتتىق جارىس ءوتتى. سونىمەن قاتار تاقىرىپتىق كەزدەسۋلەر مەن كونفەرەنتسيا ۇيىمداستىرىلدى. وندا كونستيتۋتسيالىق نورمالاردى ىسكە اسىرۋعا بايلانىستى جەتىستىك تالقىلاندى. بۇل ءىس-شارالاردا جاستار ەرەكشە بەلسەندىلىك تانىتتى.
كونستيتۋتسيا كۇنىن مەرەكەلەۋ اياسىندا وبلىس ورتالىعىندا «اتا زاڭىم – ايبىنىم!» اتتى مەرەكەلىك جيىن ءوتىپ, وندا وبلىس اكىمى م.سۇلتانعازيەۆ ءوڭىر جۇرتشىلىعىنا جىلى لەبىزىن جولدادى. سالتاناتتى ءىس-شارادا قوعامدىق ۇيىمدار مەن شىعارماشىلىق ۇجىمداردىڭ وكىلدەرى ءسوز سويلەپ, كونستيتۋتسيانىڭ مەملەكەتىمىزدىڭ نەگىزى رەتىندەگى ماڭىزىن اتاپ ءوتتى, ونىڭ قاعيداتتارى نەگىزىندە ەلدىڭ ودان ءارى دامۋىنا سەنىم ءبىلدىردى. مەرەكەلىك ءىس-شارا بارىسىندا ءوڭىردىڭ ءتۇرلى سالاسى مەن قوعامدىق ءومىرىنىڭ دامۋىنا ەلەۋلى ۇلەس قوسقان ازاماتتار ماراپاتتالىپ, بىرقاتارىنا مەملەكەتتىك ناگرادالار تابىس ەتىلدى. ولاردىڭ ىشىندە بەلگىلى اكتەر بەكجان تۇرىس تا بار. ونەر مايتالمانىنا «الماتى وبلىسىنىڭ قۇرمەتتى ازاماتى» اتاعى بەرىلدى.
الماتى وبلىسى