بۇل كۇندەرى كۇللى جانكۇيەر نازارى – نيۋ-يوركتە. اتلانت مۇحيتىنىڭ جاعالاۋىندا ورنالاسقان اسەم شاھاردا «ۇلكەن دۋلىعا» ساناتىنداعى تۋرنيرلەردىڭ ءبىرى US Open دوداسى باستالدى. جۇلدە قورى رەكوردتىق 75 ملن دوللاردى قۇراعان جارىستا جەر-جاھاننىڭ بارلىق مىقتى تەننيسشىلەرى ونەر كورسەتەدى.
وتكەن اپتادا اقش-تىڭ اشىق بىرىنشىلىگىنىڭ ىرىكتەۋ ءتۋرنيرىن تاماشالادىق. توپ تەننيسشىلەردىڭ قاتارىنا ەنبەگەندەر ءوزارا شەبەرلىك بايقاسىپ, جارىستىڭ نەگىزى بولىگىندە ونەر كورسەتۋگە كىمدەردىڭ لايىق ەكەنىن انىقتادى. بۇل باسەكەلەردە ەلىمىزدىڭ بىرنەشە ويىنشىسى باق سىنادى. وكىنىشكە قاراي, تۇساۋكەسەر كەزدەسۋلەرىندە ميحايل كۋكۋشكين مەن دميتري پوپكو ارگەنتينالىق ماركو ترۋنگەلليتي مەن تياگو اگۋستينگە, زارينا دياس قىتايلىق ما ەسينگە جول بەردى. دەنيس ەۆسەەۆ العاشقى اينالىمدا ەكۆادورلىق الۆارو گيلەن مەسانى ۇتقانىمەن, ىلە-شالا نيدەرلاندىق يەسپەر دە يونگكە ەسە جىبەردى. تيموفەي سكاتوۆ پەن بەيبىت جۇقاەۆ تا جارىستى ءساتتى باستادى. العاشقىسى ارگەنتينانىڭ تاعى ءبىر وكىلى فاكۋندو باگنيستەن باسىم تۇسسە, ەكىنشىسى شۆەيتساريالىق مارك-اندرەا حيۋسلەرگە شاڭ قاپتىردى. سودان قوس جەرلەسىمىز ءبىر-بىرىنە قارسى وينادى. بۇل دەربي سكاتوۆتىڭ پايداسىنا شەشىلدى. شەشۋشى سايىستا ۇلىبريتانيالىق بيللي ءحارريستى قاپى قالدىرعان ول باستى دودادا كۇش سىناسۋ قۇرمەتىنە يە بولدى.
ال الەمدىك رەيتينگتە جوعارى ساتىلارعا جايعاسقان ءتورت تەننيسشىمىز US Open تۋرنيرىنە ەش الاڭسىز دايارلاندى. جارىستىڭ العاشقى كۇنى ەكى ويىنشىمىز كورتقا شىقتى. الەكساندر بۋبليك (№27) تسزيۋنچەن شانمەن (№72) كەزدەستى. وسىنداي ءدۇبىرلى دوداعا العاش رەت قاتىسىپ وتىرعانىنا قاراماستان, قىتايلىقتىڭ قارقىنى كۇشتى بولدى. بەس سەتتىك باسەكەدە شان 6:4, 3:6, 5:7, 6:3, 6:4 ەسەبىمەن باسىم ءتۇستى. كوپ كەشىكپەي الەكساندر شەۆچەنكو (№61) مەن گەرمانيالىق دومينيك كەپفەر (№80) كۇش سىناستى. بۇل كەزدەسۋدە جەرلەسىمىزدىڭ ۇستەمدىگى ەش كۇمان تۋعىزعان جوق – 6:3, 7:5, 5:7, 6:2. ەندى شەۆچەنكو امەريكالىق فرەنسيس تيافومەن (№20) شەبەرلىك بايقاسادى.
ەلەنا رىباكينا (الەمنىڭ № 4 راكەتكاسى) اۋستراليالىق دەستاني اياۆانى (№180) وڭاي ەڭسەردى – 6:1, 7:6. ەكىنشى كەزەڭدە ەلەنا فرانتسيالىق دجەسسيكا پونشەنىڭ (№143) الەۋەتىن بايقاپ كورەدى. يۋليا پۋتينتسەۆا (№32) چەحيالىق ليندا نوسكوۆادان (№25) باسىم ءتۇستى – 7:6, 6:4. جەرلەسىمىزدىڭ كەلەسى قارسىلاسى – قىتايلىق ۆان سينيۋ (№40). ىرىكتەۋ سىنىنان ىركىلمەي وتكەن تيموفەي سكاتوۆ (№188) بىردەن وتە مىقتى قارسىلاسقا تاپ بولدى. تۇساۋكەسەر كەزدەسۋىن ول الەمنىڭ جەتىنشى راكەتكاسى حۋبەرت حۋركاچقا قارسى وتكىزەدى. ءبىرىنشى سەتتە پولشانىڭ ءدۇلد ۇلى 6:3 ەسەبىمەن جەڭىسكە جەتسە, قالعان ەكەۋى تاي-برەيكە دەيىن ۇلاستى. دەسەك تە ازۋلى تەننيسشىگە وتانداسىمىزدىڭ ءالى جەتپەدى – 7:6, 7:6.