قوستاناي وبلىسى ارقالىق قالاسىنداعى دالا ولكەسى تاريحى مۋزەيىندە اسا كورنەكتى اقىن, مەملەكەتتىك سىيلىقتىڭ لاۋرەاتى سىرباي ماۋلەنوۆتىڭ بىرقاتار جەكە قولجازباسى جانە ارىپتەس قالامگەرلەرمەن جازىسقان حاتتارى ساقتالعان. سونداي قۇندى جادىگەردىڭ ءبىرى – بەلگىلى جازۋشى, قاراعاندى قالاسىنىڭ قۇرمەتتى ازاماتى جايىق بەكتۇروۆتىڭ سىراعاڭا جازعان حاتى. وندا جايىق اقساقال «قازاق ادەبيەتىن» باسقارىپ وتىرعان سىرباي ماۋلەنوۆكە سىيلاساتىن جولداسى ءارى گازەت وقىرمانى رەتىندە ءوز ۇسىنىسىن ايتىپتى. ەندەشە, حاتتى وقىپ كورەلىك.
«قازاق ادەبيەتى» گازەتىنىڭ باس رەداكتورى سىرباي ماۋلەنوۆ جولداسقا!
اسا قادىرلى سىرباي!
جاڭا قونىس-تۇعىرىڭىز قۇتتى بولسىن! ءسىز ءۇشىن بۇل ءتور جاڭا دا ەمەس قوي, اۋەلگى, 1955 جىلى قايتا شىققانداعى وسى گازەتتىڭ العاشقى شاڭىراق يەسى دە ءوزىڭىز ەمەس پە ەدىڭىز؟ ونداعىداي ەمەس, ەندى ورنىعىپ كوپ وتىرىڭىز.
ءبىز, بۇل گازەتتىڭ ەرتەدەن بەرگى وقۋشىلارى, شامامىز كەلگەنشە گازەتتى جۇرتشىلىققا كوپ تاراتۋعا كۇش سالىپ باعامىز. بۇعان سەنەرسىز عوي.
ەندىگى ءبىر جولداستىق, وقۋشىلىق تىلەك, اۋەلى ءوز قابىرعاڭىزعا سالىپ كورەتىن ۇسىنىسىم بار. «ليتەراتۋرنايا گازەتا» ءوزىنىڭ ءبىر شەكەسىنە – ا.پۋشكيننىڭ, ەكىنشى شەكەسىنە – م.گوركيدىڭ بەينەسىن سالىپ شىعاراتىنىن جاقسى بىلەسىز. بۇل ورىس تاريحىنىڭ ەكى داۋىردەگى كوشباسشىسىن ادەبيەت لەگىنە دە, ادەبيەت بەلەسىندە دە قادىر-قۇرمەت تۇتقانى عوي. ال ءسىز مىنا باسىنىڭ تاعىلۋىن وزگەرتكەن وسى ءوزىمىزدىڭ «قازاق ادەبيەتىنىڭ» الدىڭعى شەكەسىنە – ابايدى, ەكىنشى جاعىنا – ساكەندى سالىپ شىعاراتىن بولساڭىز قايتەر ەدى؟ بۇعان جوعارى جاقتىڭ قاۋلىسى كەرەك بولا قويماس, اسسا جازۋشىلار وداعى باسقارماسى سەكرەتارىنىڭ, قالسا ءوز القاڭىزدىڭ ۇيعارىندىسى جەتەر. مۇقاڭ ايگىلى جازۋشى عوي, بىراق نارىق تۇرعىسىنان, العاشقى كەڭەستىك كوشباسشىلىعى جاعىنان ساكەن اعاڭىز قولايلى بولار. ارتىق ءسوزىم بولسا كەشىرىم سۇرايمىن.
قۇرمەتپەن
جايىق بەكتۇروۆ.
22.05.1971 جىل».