قاي سالادا بولسىن ءبىلىمدى, باسەكەگە قابىلەتتى مامانعا ءتاۋىر جالاقىسى بار جۇمىس تابىلادى. ول ءۇشىن تاجىريبەلى مامان بولدىم, تولدىم دەمەي, ۇدايى داعدىسىن جەتىلدىرىپ وتىرۋى ءتيىس. بۇل – مەملەكەتتىڭ ەمەس, ەڭبەك نارىعىنىنىڭ تالابى. مۇعالىمدەرگە بالا وقىتۋدىڭ جاڭاشا, وزىق ءادىس-تاسىلدەرىن ۇيرەتىپ جۇرگەن اينۇر احمەتچەەۆا دا ءبىزدىڭ پىكىرىمىزدى قۇپتايتىنىن اڭعارتتى.
«ماعان جاقسى مۇعالىم بارىنەن قىمبات, ويتكەنى مۇعالىم مەكتەپتىڭ جۇرەگى» دەگەن ى.التىنسارين. مەكتەپتىڭ جاڭا, جايلى بولعانى ارينە جاقسى. بىراق, ودان دا ماڭىزدىسى مۇعالىمنىڭ تالانتتى, مىقتى بولعانى. اينۇر احمەتچەەۆا مەكتەپ جاسىندا ۇزدىك ۇستازداردان ءتالىم العان سوڭ, سولار جۇرگەن سوقپاققا ءتۇسۋدى ويلاپتى. مەكتەپ تابالدىرىعىن يمەنە اتتاعان وقۋشىلاردىڭ قاناتىن قاتايتىپ, جول سىلتەۋدى ارمانداپتى. وقۋدا وزات اينۇر سول باعىتىنان جاڭىلماي, ىزدەگەنىن تاپقان.
ء–وزىم الماتى وبلىسى بالقاش اۋدانىنداعى باقباقتى اۋىلىنىڭ تۋماسىمەن. سونداعى ورتا مەكتەپتە ءبىلىم الدىق. نەگە ەكەنىن بىلمەدىم, بىراق, سول كەزدەن ليدەرلىككە ۇمتىلىپپىن. اركەز ءبىرىنشى بولۋعا تالپىناتىنمىن. بالكىم ول دا كەرەك قاسيەت شىعار. مەكتەپ جاستان اعىلشىنعا قىزىعىپ, وليمپيادالاردان قالمايتىنبىز. ءالى ەسىمدە, 1998 جىلى اعىلشىن تىلىنەن دارىندى بالالارعا ارنالعان شامشىراق دەگەن بايقاۋعا قاتىسقانىم بار. سول بايقاۋدا توبە كورسەتكەن سوڭ, شەت تىلىنە قىزىعۋشىلىعىم ارتقانداي بولدى. ءسويتىپ ءجۇرىپ مەكتەپتى ۇزدىك اتتەستاتپەن اياقتادىم. 2002 جىلى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنە مەملەكەتتىك گرانتپەن وقۋعا ءتۇستىم. ۋنيۆەرسيتەتتە بەلسەندى بولىپ, قوعامدىق جۇمىستارعا ارالاستىق. پرەزيدەنتتىك ستەپەنديا يەگەرى اتاندىم. قۋانى قاراي ۋنيۆەرسيتەتتى, ىزىنشە, سول ۋنيۆەرسيتەتتىڭ ماگيستراتۋراسىن قىزىل ديپلوممەن تامامدادىم, – دەيدى اينۇر.
اينۇر سەرىكقىزى شەت ءتىلى ماماندىعىندا وقىپ ءجۇرىپ «شىنايى مىسالدار ارقىلى اعىلشىن ءتىلىن وقىتۋ» تاقىرىبىنا قىزىعىپ, زەرتتەپتى. كەيىپكەرىمىز قانىگى ساباقتى مۋلتفيلم, جاھانعا تانىمال فيلمدەر ارقىلى وقىتۋدى ۇسىنعان. ويتكەنى, بىلىكتى ماماننىڭ ايتۋىنشا, ساباقتى مۋلتفيلم ارقىلى مەڭگەرگەن بالا, سول ەلدىڭ ءتىلىن ۇيرەنىپ قانا قويمايدى, مادەنيەتىنەن دە حاباردار بولادى دەپ سانايدى. اينۇر كەيىن ماگيستراتۋراعا دا گرانتقا ءتۇسىپ, وقۋىن جالعاستىرادى. مۇندا ول اۋەلدەن ءوزى زەردەلەپ جۇرگەن «ستۋدەنتتەردىڭ فونەتيكالىق داعدىلارىن قالىپتاستىرۋ» تاقىرىبىن ودان ءارى تەرەڭىرەك زەرتتەۋگە كىرىسەدى. ءتۇرلى ەڭبەكتەردى اقتارىپ, قازاق ءتىلىنىڭ اعىلشىنعا ۇقساس تۇستارىن ىزدەنەدى, ستۋدەنتتەردىڭ فونەتيكالىق داعدىلارىن قالىپتاستىرۋ ءادىس-تاسىلىنە ءمان بەرەدى. اينۇر سەرىكقىزى ماگيستراتۋرادان سوڭ, ءوزى وقىعان ماماندىق بويىنشا ستۋدەنتتەرگە ءدارىس وقي باستاعان.
تالاپتى ۇستازدىڭ ەڭبەگى باعالانىپ, 2011 جىلى نازارباەۆ ۋنيۆەرسيەتىنە گرانت ۇتىپ العان. عىلىمعا دەن قويعان مامان وندا دا قاراپ جۇرمەي, ءتۇرلى زەرتتەۋمەن اينالىسقان. ۇلىبريتانيا, اقش-تان كەلگەن مۇعالىمدەرىمەن تىزە قوسىپ ەڭبەك ەتكەن. وسى كەزەڭنەن باستاپ اينۇر سەرىكقىزى ورتا مەكتەپ, جوعارى وقۋ ورىندارىندا ساباق بەرەتىن مۇعالىمدەرگە اعىلشىن ءتىلىن ۇيرەتۋدىڭ تىڭ ءادىس-تاسىلدەرىنە يەك ارتقان. قازىر دە مەكتەپتەن-مەكتەپكە بارىپ, سەمينار وتكىزىپ جۇرگەن جايى بار. جاقىن بەرىدەن اينۇر نازارباەۆ زياتكەرلىك مەكتەبىندە جۇمىس ىستەيدى. جۋىردا ول ەكىنشى دەڭگەيلى كۋرس جۇرگىزىپ, نازارباەۆ زياتكەرلىك مەكتەبىنىڭ مۇعالىمدەرىنە ساباق بەرىپتى. كەمبريدج ۋنيۆەرسيتەتىنەن 2-ءشى دەڭگەيلى ترەنەر سەرتيفيكاتىن الىپ ۇلگەرگەن. بولاشاققا ناقتى جوسپار قۇرىپ, سول جوسپاردان اينىماي ءبىلىم الۋعا ۇمتىلعان كەيىپكەرىمىزدىڭ ەڭبەك جولى ءسىز بەن بىزگە قىزىق, ۇستازدىققا بەت بۇرعان تۇلەكتەرگە ۇلگى دەپ ويلايمىز.