الماتى وبلىسىنىڭ ىلە اۋدانىنداعى 9 جەكەمەنشىك بالاباقشانىڭ قۇرىلتايشىلارى قاماۋعا الىندى. ءبىر ايدىڭ ىشىندە 29 جەكەمەنشىك بالاباقشا جابىلىپ, مەملەكەتكە 729,0 ملن شىعىن كەلتىرگەنى ءۇشىن تاعى بىرنەشە قۇرىلتايشىنىڭ ۇستىنەن قىلمىستىق ءىس قوزعالىپ جاتىر. بۇل جونىندە قوناەۆ قالاسىندا وتكەن تامىز كەڭەسىندە الماتى وبلىسىنىڭ اكىمى مارات سۇلتانعازيەۆ مالىمدەدى.
«جەكەمەنشىك بالاباقشالار كاسىپكەرلىك سۋبەكتىلەرگە تەكسەرىس جۇرگىزۋگە سالىنعان ءموراتوريدى پايدالانىپ, مەملەكەتتىك تاپسىرىسپەن بولىنگەن قارجىنى جىمقىرعان. وسى تۇستا بۇگىنگى تامىز كەڭەسىندە كوتەرىلىپ وتىرعان – ءبىلىم جۇيەسىنە تسيفرلىق تەحنولوگيالاردى ەنگىزۋ وتە ورىندى جانە قاجەتتى ءىس. تسيفرلىق تەحنولوگيا كوپ جاعدايدا ءبىلىم سالاسىنداعى جەمقورلىق تاۋەكەلدەرىن جويۋعا سەپتىگىن تيگىزەرى ءسوزسىز. بۇگىندە تسيفرلىق تەحنولوگيالار باسقارماسى ارقىلى اتالعان جاعدايلاردىڭ الدىن الۋ, جەمقورلىققا توسقاۋىل قويۋ ماقساتىندا بارلىق بالاباقشاعا مەنشىك تۇرىنە قاراماستان «بيومەتريا» اۆتوماتتاندىرىلعان جۇيەسى ەنگىزىلىپ جاتىر. مۇندا ءار بالانىڭ بالاباقشاعا كەلۋى جەكەلەي QR كود ارقىلى تابەلگە ەنگىزىلىپ, ەسەبى جۇرگىزىلىپ وتىرادى», دەدى ءوڭىر باسشىسى.
جەكەمەنشىك بالاباقشالارداعى تاعى ءبىر ماسەلە – تاربيەشى پەداگوگتەردىڭ ءبىلىمى مەن بىلىكتىلىگىنىڭ تومەندىگى. قازىرگى كەزدە جالپى رەسپۋبليكا بويىنشا جەكەمەنشىك بالاباقشالاردا تاربيەشىلەر مەن كىشى قىزمەتكەرلەردىڭ ءوز ىسىنە جاۋاپكەرشىلىگىنىڭ تومەندىگى, پسيحولوگيالىق تۇراقسىزدىعى سالدارىنان بالالارعا قاتىستى ءتۇرلى جاعداي تىركەلىپ جاتىر. سونداي-اق ءوڭىر باسشىسى جەكەمەنشىك بالاباقشالارعا پەداگوگتەردىڭ ءبىلىمى مەن جاۋاپكەرشىلىكتەرىن كوتەرۋ باعىتىنداعى جۇمىستاردى جۇرگىزۋدى تاپسىرعانىن اتاپ ايتتى.
الماتى وبلىسى