قازاقستان پرەزيدەنتى اكىمشىلىگىنىڭ كەلىسىمىمەن جانە سقو اكىمىنىڭ وكىمىمەن ءجۇسىپ جۇماعۇلوۆ سولتۇستىك قازاقستان وبلىسى اكىمىنىڭ ورىنباسارى بولىپ تاعايىندالدى. جاڭا لاۋازىمدا ول ىشكى ساياسات, مادەنيەت, ءبىلىم, ءدىن جانە جۇمىسپەن قامتۋ ماسەلەلەرىنە جەتەكشىلىك ەتەدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى, دەپ جازادى Egemen.kz.
ءجۇسىپ جۇماعۇلوۆ 1992 جىلى 30 قىركۇيەكتە الماتىدا دۇنيەگە كەلگەن. ول قازاقستاندىق مەنەدجمەنت, ەكونوميكا جانە بولجاۋ ينستيتۋتىن (KIMEP), Maqsut Narikbayev University (MNU) جانە نازارباەۆ ۋنيۆەرسيتەتىن بىتىرگەن, پرەزيدەنتتىك جاستار كادر رەزەرۆىنىڭ مۇشەسى.
ەڭبەك جولىن «استانا – جاڭا قالا» ارنايى ەكونوميكالىق ايماعىن اكىمشىلەندىرۋ باسقارماسىندا قوعامدىق قىزمەتكەر رەتىندە باستادى. 2016 جىلدان 2019 جىلعا دەيىن ء«دىن پروبلەمالارىن زەرتتەۋ ورتالىعى» كمم باسشىسىنىڭ ورىنباسارى جانە ەلوردانىڭ قوعامدىق دامۋ ىستەرى باسقارماسى باسشىسىنىڭ ورىنباسارى قىزمەتتەرىن اتقاردى. 2020 جىلى استانا اكىمى اپپاراتى باسشىسىنىڭ ورىنباسارى بولدى. 2022 جىلدىڭ اقپان ايىنان باستاپ سارىارقا اۋدانىنىڭ اكىمى, ال 2023 جىلدىڭ ءساۋىر ايىندا استانا قالاسى نۇرا اۋدانىنىڭ اكىمى بولىپ تاعايىندالدى.