پاۆلوداردا سۋارۋ جۇيەلەرى قايتا جاڭعىرتىلادى

مينيسترلىكتىڭ مالىمەتىنشە, 2025 جىلدىڭ سوڭىنا دەيىن پاۆلودار وبلىسىندا 97 گيدروتەحنيكالىق جانە 132 سۋ وتكىزۋ قۇرىلىسى جوندەلەدى.

سوىنمەن قاتار, مينيستر ماي اۋدانىندا قاراتەرەك جانە مايتۇبەك اۋىلدارىنداعى سۋارۋ جەلىلەرىن رەكونسترۋكتسيالاۋ بارىسىمەن تانىسقان. سۋارۋ جەلىسى 5700 گا ەگىس القابىن سۋمەن قامتاماسىز ەتە الاتىندىعى اتاپ ءوتىلدى.

ەكى جوبا دا اياقتالۋعا جاقىن. نۇرجان نۇرجىگىتوۆ جۇمىستى مەرزىمىنەن كەشىكتىرمەي اياقتاۋدى تاپسىرعان. جەرگىلىكتى شارۋا قوجالىقتارى مينيسترگە وڭىردە سۋ ۇنەمدەۋ تەحنولوگيالارى قالاي ەنگىزىلىپ جاتقانىن كورسەتتى.

ودان كەيىن نۇرجان نۇرجىگىتوۆ كولباي ليماندى سۋارۋ الابىنا باردى. پاۆلودار وبلىسىنىڭ مال شارۋاشىلىعىن قاجەتتى جەم-ءشوپ قورىمەن قامتاماسىز ەتەتىن شابىندىقتاردى سۋارۋ جۇيەلەرىن رەكونسترۋكتسيالاۋ جوسپارىمەن تانىستى. جوبا بىرنەشە كەزەڭنەن تۇرادى. ءبىرىنشى كەزەڭدە باياناۋىل جانە ماي اۋداندارىندا قايتا جاڭعىرتۋ جۇمىستارى جۇرگىزىلەدى.

ماسەلەن, ماي اۋدانىندا كولباي الابىنا كىرەتىن 38 گيدروتەحنيكالىق جانە 6 سۋ وتكىزۋ قۇرىلىسى جوندەلەدى. باياناۋىل اۋدانىندا 59 گيدروتەحنيكالىق جانە 126 سۋ وتكىزۋ قۇرىلىسى بار. بۇل جۇمىستاردى 2025 جىلى اياقتاۋ جوسپارلانىپ وتىر.

ايتا كەتەيىك, كولباي الابىنىڭ اۋماعى 14,6 مىڭ گا, ونىڭ 6,7 مىڭ گەكتارى باياناۋىل اۋدانىندا.

سونداي-اق, مينيستر ماي اۋدانىن اۋىز سۋمەن قامتاماسىز ەتەتىن ماي توپتىق سۋ قۇبىرىنىڭ تازارتۋ ستانتسياسىنا بارىپ, تازارتىلعان سۋدىڭ ساپاسىن تەكسەرگەن.

اقتوعاي اۋدانىنىڭ اۋەلبەك اۋىلىندا مينيستر 1063 گا سۋارمالى ۋچاسكەگە ارنالعان ينجەنەرلىك جەلىلەر قۇرىلىسىنىڭ بارىسىمەن تانىستى. جوبا پاۆلودار جانە شىعىس قازاقستان وبلىستارىنداعى «قازسۋشار» فيليالدارىنىڭ بىرلەسكەن كۇش-جىگەرىمەن جۇزەگە اسىرىلىپ جاتىر. نىسان بيىل پايدالانۋعا بەرىلەدى.

ءارى قاراي نۇرجان نۇرجىگىتوۆ ۇزىندىعى 12,5 شاقىرىم بولاتىن «ەرتىس-ۋسپەن» كانالىن رەكونسترۋكتسيالاۋ بارىسىن باقىلادى. كانالداعى جۇمىستار 5 كەزەڭگە بولىنگەن. قايتا جاڭعىرتۋ جۇمىستارىن كەلەسى جىلى اياقتاۋ جوسپارلانىپ وتىر. مينيستر شارۋالاردى ۋاقىتىلى سۋارمالى سۋمەن قامتاماسىز ەتۋ ءۇشىن بارلىق جۇمىستاردى 2025 جىلدىڭ سۋارۋ كەزەڭى باستالعانعا دەيىن اياقتاۋدى تاپسىرعان.

سۋ شارۋاشىلىعى نىساندارىن ارالاعاننان كەيىن نۇرجان نۇرجىگىتوۆ جەرگىلىكتى «قازسۋشار» فيليالىنا بارىپ, مەكەمە قىزمەتكەرلەرىمەن جۇمىس جاعدايى تۋرالى سويلەسكەن.

«جەرگىلىكتى شارۋا قوجالىقتارى سۋدان تارىقپاۋى ءۇشىن بارلىق جوبالاردى مەرزىمىندە اياقتاۋ ماڭىزدى. ءبىز ءوز تاراپىمىزدان وبلىستىڭ ەگىس القاپتارىنا, شابىندىقتارى مەن تابيعي جايىلىمدارىنا سۋ بەرۋدى قامتاماسىز ەتەمىز. سونداي-اق كەلەسى جىلدىڭ سۋ تاسقىنى كەزەڭىنە دايىندالۋ كەرەك. ءوڭىردىڭ بارلىق سۋ شارۋاشىلىعى نىساندارى ەرىگەن قار سۋىن قابىلداۋعا جانە قاۋىپسىز وتكىزۋگە دايىن بولۋى ءتيىس», دەپ قورىتىندىلادى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.