كولىك مينيسترلىگى تەمىرجول جانە سۋ كولىگى كوميتەتى تەمىرجول باعىتىندا قىزمەت كورسەتەتىن كومپانيالارعا تالاپتى كۇشەيتپەك. جولاۋشىلارعا قىزمەت كورسەتۋ ساپاسى, پوەزداردىڭ جاي-كۇيى مەن تازالىعى جانە تالاپقا ساي ستاندارتتىق نورمالارعا بايلانىستى سۋبسيديا بەرۋ ماسەلەسىن قاراستىرۋ جوسپارعا ەنگىزىلدى, دەپ حابارلايدى Egemen.kz
مينيسترلىكتىڭ حابارلاۋىنشا, اتالعان كوميتەت وكىلدەرى جولاۋشىلار پويىزىنا كەزەكتى تەكسەرۋ جۇمىستارىن جۇرگىزگەن.
«بۇل جولعى نىسان «تۇركسىب-استانا» جشس قىزمەت كورسەتەتىن قوستاناي – الماتى باعىتىنداعى №43/44 الەۋمەتتىك ماڭىزى بار جولاۋشىلار پويىزى. تەكسەرۋ بارىسىندا 14 ءتۇرلى زاڭ بۇزۋشىلىقتار انىقتالدى. جولاۋشىلار ۆاگوندارىنىڭ ىشكى جانە سىرتقى كەلبەتىنىڭ نورمالارىنا سايكەس كەلمەۋى, كونديتسيونەرلەرى قاراستىرىلعان بىراق سول جەلدەتكىشى ىستەن شىققان ۆاگونداردىڭ قاتىناۋى جانە سانيتارلىق تالاپتارعا ساي كەلمەۋى نەگىزگى زاڭ بۇزۋشىلىقتار رەتىندە تىركەلدى», دەپ حابارلادى كولىك مينيسترلىگىنىڭ ءباسپاسوز قىزمەتى.
تەكسەرىس جۇمىستارىنىڭ ناتيجەلەرى بويىنشا ءتيىستى اكت جاسالعان. ءوز كەزەگىندە تاسىمالداۋشى كومپانياعا 10 كۇنتىزبەلىك كۇن ىشىندە تەكسەرۋ ناتيجەسىندە انىقتالعان زاڭ بۇزۋشىلىقتاردى جويۋ جانە ولاردىڭ ودان ءارى ورىن الۋىنا جول بەرمەۋ جونىندە شارالار قابىلداۋ تاپسىرىلعان.
ايتا كەتەيىك, ەلىمىزدە الەۋمەتتىك ماڭىزى بار تۇراقتى 110 پويىز قاتىنايدى. جولاۋشىلاردى تاسىمالداۋ قاعيدالارىنىڭ تالاپتارىن قاتاڭ ساقتاۋ كوميتەت نازارىندا. جاز سوڭىنا دەيىن جاۋاپتى كوميتەت قىزمەتكەرلەرى كەستە بويىنشا قالعان جولاۋشىلار پويىزدارىنا دا تەكسەرۋ جۇمىستارىن جۇرگىزەدى.