جۇمىسقا ورنالاسۋىنا سەپتەسەدى

جاستار پراكتيكاسى بويىنشا جۇ­مىس تاپقانداردىڭ باسىم بولىگى – ەلىمىزدىڭ وڭتۇس­تى­گىندەگى وڭىرلەردەن. اتاپ ايتقاندا, تۇر­كىس­تان وبلىسىنان – 2,9 مىڭ, جامبىل وبلىسىنان – 1,6 مىڭ, شىمكەنت قالاسىنان – 1,2 مىڭ جانە قىزىلوردا وبلىسىنان 1,1 مىڭ ادام جۇمىسقا تۇردى. سونىڭ ىشىندە جاستار پراكتيكاسىنا قاتىسقان ايەل­دەر­دىڭ ۇلەسى 9,3 مىڭ ادامدى (63,3%), اۋىل تۇر­عىن­دارىنىڭ ۇلەسى 8,6 مىڭ ادامدى (58,1%) قۇرايدى.

العان ماماندىعى بويىنشا باستاپقى جۇمىس تاجىريبەسىن الۋ ماقساتىندا ءبىلىم ۇيىمدارىنىڭ 35 جاستان اسپاعان جۇمىس­سىز تۇلەكتەرى جاستار پراكتيكاسىنا قاتىسا الادى. جاستار پراكتيكاسىنا قاتىسۋ ءۇشىن مانساپ ورتالىعىنا ءوتىنىش بەرۋ قاجەت. جۇمىس بەرۋشى جاستار پراكتيكاسىنا قاتىسۋشىلارعا كاسىبي ءبىلىم مەن جۇمىس تاجىريبەسىن بەرۋ ءۇشىن تالىمگەردى بەكىتەدى.

رەسپۋبليكا بويىنشا ورتاشا جالاقى مولشەرى – 109,5 مىڭ تەڭگەنى, اقتوبە وبلىسىندا ەڭ جوعارى كورسەتكىش 120,9 مىڭ تەڭگەنى قۇرادى. جاستار پراكتيكاسىن قارجىلاندىرۋدى «ەڭبەك» ءموبيلدى ورتالىعى «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى اي سايىنعى جالاقى تولەۋ ارقىلى جۇزەگە اسىرادى. جالاقىنى جۇمىس بەرۋشى ۇسىنعان مالىمەتتەر نەگىزىندە ەكىنشى دەڭگەيدەگى بانكتەردە اشىلعان قاتىسۋشىلاردىڭ كارتوچكالىق شوتتارىنا اۋدارادى.

جاستار پراكتيكاسى ارقىلى جۇمىسقا ورنالاستىرىلعاندار اراسىندا ەڭ كوپ سۇرانىسقا يە ماماندىقتارعا توقتالساق, 1 084 ادام – مەيىرگەر, 767-ءسى – زاڭگەر, 558-ءى – تاربيەشى, 541-ءى – باستاۋىش سىنىپ مۇعالىمى, 524-ءى – باعدارلاماشى.

جالپى, مەملەكەتتىك قولداۋدىڭ بۇل ءىس-شاراسىنا جاستار جاعى ريزاشىلىعىن ءبىلدىرىپ, اجەپتاۋىر يگىلىگىن كورىپ جاتىر. سولاردىڭ ءبىرى دانا احمەتوۆا كوللەدجدى بىتىرگەننەن جاستار پراكتيكاسى بويىنشا جۇمىسقا ورنالاستى.

«بيىل قوستاناي جوعارى مەدي­تسينالىق كوللەدجىن «فەلدشەر» مامان­دىعى بويىنشا ءبىتىردىم. ءوز بەتىنشە جۇمىس تابۋعا تىرىسقانىممەن, كوپتەگەن جۇمىس بەرۋشى جۇمىس تاجىريبەسى جوق جاس مامانداردى العىسى كەلمەيتىنىن ءتۇسىندىم. وزىمە ۇنايتىن جۇمىس ورنىن تابۋ ءۇشىن مانساپ ورتالىعىنىڭ كومەگىنە جۇگىندىم. بارلىق قاجەتتى اقپاراتتى الىپ, جاستار پراكتيكاسىنا قاتىسۋعا شەشىم قابىلدادىم. قازىرگى ۋاقىتتا قوستاناي قالاسىنىڭ تەمىرجول اۋرۋحاناسىندا ءوز ماماندىعىم بويىنشا جۇمىس ىستەيمىن», دەدى دانا.