قاي ءوڭىردىڭ دە ءوسىپ-وركەندەۋى ءتيىمدى جۇمىس كۇشىنىڭ ءتيىستى دەڭگەيدە جەتكىلىكتى بولۋىمەن تىكەلەي بايلانىستى. بۇل رەتتە مامان تاپشىلىعى قاتتى سەزىلەتىن ايماقتارعا بەلگىلى ءبىر سالادا بىلىكتىلىگى بار ازاماتتاردىڭ قونىس اۋدارۋىنا جاعداي جاساۋدىڭ ماڭىزى زور. وسى ماقساتتان تۋعان كوشتە ىلگەرىلەۋ بايقالادى.
بيىلعى 1 شىلدەدەگى دەرەككە سۇيەنسەك, ەرىكتى قونىس اۋدارۋ اياسىندا جۇمىس كۇشىنىڭ ۇتقىرلىعىن ارتتىرۋ ءۇشىن ءبىراز وڭىرگە 4 869 ادام كوشىپ باردى. بۇل قونىستانۋشىلاردىڭ 1 891-ءى شەت مەملەكەتتەردەن كەلگەن قانداستارىمىز ەكەنىن اتاپ وتكەن ءجون. بارلىق قونىس اۋدارۋشىعا مەملەكەتتىك قولداۋ شارالارى كورسەتىلدى. وسى باعىتتاعى ءىس-شارانى ءارى قاراي قارقىندى جالعاستىرىپ, جىل سوڭىنا دەيىن 9 483 ادامدى كوشىرۋ جوسپارلانىپ وتىر.
جۇمىس كۇشى تاپشى وڭىرلەرگە ورنالاسۋ كورسەتكىشىن كەلتىرسەك, پاۆلودار وبلىسىنا – 2 036 ادام, سولتۇستىك قازاقستان وبلىسىنا – 1 163 ادام, قوستاناي وبلىسىنا – 540 ادام, شىعىس قازاقستان وبلىسىنا – 402 ادام, اباي وبلىسىنا – 362 ادام, اقمولا وبلىسىنا – 285 ادام, قاراعاندى وبلىسىنا – 43 ادام, ۇلىتاۋ وبلىسىنا 38 ادام قونىس اۋداردى.
ال قونىستاندىرۋ ايماقتارىنا كوشكەن قانداستارىمىزدىڭ ۇلەس سالماعىنا توقتالساق, وزبەكستاننان – 631 ادام, موڭعوليادان – 616 ادام, قحر-دان – 472 ادام, رەسەيدەن – 110 ادام جانە باسقا ەلدەردەن 62 ادام كەلگەن.
سونىمەن, 1 491 ەڭبەككە قابىلەتتى قونىس اۋدارۋشى مەن 944 قانداستىڭ 1 288-ءى جۇمىسقا ورنالاستىرىلدى, 111 ادام كاسىپكەرلىك قىزمەتپەن اينالىسادى, 1 ادام بيزنەس اشۋ ءۇشىن گرانت الدى. قونىس اۋدارعان ازاماتتار دەنساۋلىق ساقتاۋ, اۋىل شارۋاشىلىعى, ءبىلىم بەرۋ جانە ونەركاسىپ سالالارىنا جۇمىسقا تۇردى.
وسىنداي نيەتپەن جاڭا جەردەن ورىن تەپكەن وتانداسىمىزدىڭ ءبىرى – كوپباەۆ وتباسى. اباي ەلىنە قونىس اۋدارعان ولار ومىرىندە وڭ وزگەرىستەر بولىپ جاتقانىن جەتكىزدى.
ء«بىز وڭىرلىك قونىس اۋدارۋ كۆوتاسىنا 2024 جىلى قوسىلدىق. جەتىسۋ وبلىسىنىڭ تالدىقورعان قالاسىنان اباي وبلىسىنىڭ اياگوز قالاسىنا كوشىپ كەلدىك», دەدى راۋان كوپباەۆ.
راۋان ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن «قارجى جانە نەسيە» ماماندىعى بويىنشا بىتىرگەن. جاڭا تۇرعىلىقتى جەرىنە كەلگەننەن كەيىن ول مەملەكەتتىك مەكەمەگە باس بۋحگالتەر بولىپ جۇمىسقا ورنالاستى.
راۋاننىڭ جۇبايى بۇرىن «باستاۋ مەكتەبى» جشس-دە وفيس-مەنەدجەر بولىپ جۇمىس ىستەگەن ەكەن, ال قازىر دەكرەتتىك دەمالىستا. ول «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋدان ءوتىپ, ءوزىنىڭ بيزنەس-جوباسىن ءساتتى قورعادى. ءوز ءىسىن اشۋدى كوزدەگەن كوپباەۆ وتباسى جازدا جاڭا بيزنەس-يدەيالاردى ىسكە اسىرۋعا ارنالعان گرانت يەگەرى اتانىپ, 1 ملن 476 مىڭ 800 تەڭگە كولەمىندە قارجى الدى.
ء«بىز كوپتەن بەرى بودەنە ءوسىرۋ كاسىبىن جولعا قويۋدى ويلاستىرىپ جۇرگەنبىز. ەندى مىنە, ويىمىز جۇزەگە اسقالى وتىر. بولىنگەن قاراجاتقا ينكۋباتور, برۋدەر, اۋا باپتاعىش, توڭازىتقىش, مۇزداتقىش جانە جەلدەتۋ جۇيەسىن ساتىپ العالى وتىرمىز. ءبىز مەملەكەت تاراپىنان وسىنداي قولداۋ شارالارى كورسەتىلىپ جاتقانىنا ءدان ريزامىز», دەپ راۋان اعىنان جارىلدى.
ەرىكتى قونىس اۋدارۋ اياسىندا قونىس اۋدارۋشىلارعا مەملەكەتتىك قولداۋدىڭ بىرقاتار شاراسى ۇسىنىلادى. اتاپ ايتساق, بۇل – وتاعاسىنا جانە وتباسىنىڭ ءاربىر مۇشەسىنە 70 اەك مولشەرىندە كوشۋگە ارنالعان بىررەتتىك سۋبسيديا; وتباسى مۇشەلەرى سانى مەن ەلدى مەكەنگە بايلانىستى 15-تەن 30 اەك-كە دەيىنگى مولشەردە 12 اي ىشىندە تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە اي سايىنعى سۋبسيديالاۋ; قىسقامەرزىمدى كاسىپتىك وقىتۋعا جولداما; جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ; ەكونوميكالىق ۇتقىرلىق سەرتيفيكاتتارىن بەرۋ.
بۇعان قوسا وڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە تۇرعىن ۇيمەن قامتاماسىز ەتىلگەن جانە كەمىندە 2 جىل مەرزىمگە تۇراقتى جۇمىسقا قابىلدانعان ءاربىر قىزمەتكەر ءۇشىن 400 اەك مولشەرىندە جۇمىسقا ورنالاسۋعا بىرجولعى سۋبسيديا بەرىلەدى.