قازاقتان شىققان عۇلاما, قازاق كسر عىلىم اكادەمياسىنىڭ نەگىزىن قالاۋشى ءھام تۇڭعىش پرەزيدەنتى, مينەرالوگيا عىلىمدارىنىڭ دوكتورى, كسرو مەملەكەتتىك سىيلىعىنىڭ لاۋرەاتى قانىش ساتباەۆتىڭ دومبىراسى الماتى قالاسىنداعى مەملەكەتتىك ورتالىق مۋزەي قورىندا «كپ 16730/1» رەتتىك نومىرمەن ساقتاۋلى تۇر.
اسپاپتىڭ پوشىمى – ءتورت قىرلانعان سوپاقشا شارشى ىسپەتتى. مويىنتۇراعىنىڭ ۇزىندىعى 58 سم, شاناعىنىڭ ۇزىندىعى 28 سم, كولدەنەڭى 17 سم. تۇتاس اعاشتان ويىلىپ جاسالعان. شاناعى ۇزىنشا ءتورتبۇرىش. موينى شالقاق. ءۇش بۋىندى. بەت قاقپاعى جۇقا تاقتايشادان جاسالعان. ون ءتورت پەرنەلى, ىشەگى قاراپايىم ءجىپ.
قولىمىزدا بار اقپاراتقا جۇگىنسەك, بۇل دومبىرانى قانىش يمانتاي ۇلى 1920 جىلداردىڭ باسىندا توم پوليتەحنيكا ينستيتۋتىندا وقىپ جۇرگەن جىلدارى جانىنان تاستاماي الىپ جۇرگەن دەيدى.
جۋىقتا جەزقازعاندىق وتەگەن احمەت اتتى شەبەر ءدال وسى مۋزەيدە تۇرعان دومبىرانىڭ دالمە-ءدال كوشىرمەسىن ەكى دانا جاساپ, ءبىرىن عالىمىنىڭ تۋعان جەرى باياناۋىلداعى, ەكىنشىسىن ءوسىپ-ونگەن ولكەسى جەزقازعان قالالىق مۋزەيىنە تاپسىرعان ەكەن.
«دومبىرانىڭ تاريحى تۋرالى ناقتى دەرەك جوق. قانىش يمانتاي ۇلى ونى ارنايى تاپسىرىسپەن جاساتۋى دا مۇمكىن. سەبەبى مۇنداي ءپىشىندى دومبىرا ەل ىشىندە كوپ كەزدەسە بەرمەيدى ەكەن. ونىڭ كوشىرمەسىن جاساۋداعى ماقساتىم –ۇلتتىق اسپاپتىڭ سيرەك كەزدەسەتىن ءتۇرىن ناسيحاتتاۋ» دەيدى قولونەر شەبەرى.