«كوگىلدىر بەرەتتەر» بولىمشە قۇرامىندا ارەكەت ەتۋ داعدىلارىن شىڭدادى. پراكتيكالىق ساباقتار الماتى, قوناەۆ جانە جەتىسۋ گارنيزونىنداعى بارلىق وقۋ پوليگوندارىندا ۇيىمداستىرىلدى. ءۇش كۇن ىشىندە اسكەري قىزمەتشىلەر دالا جاعدايىندا ماشىقتانىپ, بولىمشەلەردىڭ ۇيلەسىمدىلىگىن جەتىلدىردى. اتىستار كۇندىزگى جانە تۇنگى ۋاقىتتا جاۋىنگەرلىك جاعدايدا جۇرگىزىلدى.
رايىمبەك باتىر اتىنداعى الماتى دەسانتتىق-شابۋىلداۋ بريگاداسىنىڭ اسكەري قىزمەتشىلەرى «ىلە» وقۋ ورتالىعىندا جاتتىعۋ قيمىلدارىن جۇرگىزۋ داعدىلارىن پىسىقتادى. جاۋىنگەرلىك اتىستاردىڭ الدىندا ەكى اپتالىق دايىندىق بولىپ, ونىڭ بارىسىندا مەرزىمدى قىزمەت ساربازدارى اتىستىڭ قاراپايىمنان كۇردەلى تۇرىنە دەيىن تاكتيكالىق جانە ارنايى دايىندىق بويىنشا نورماتيۆتەردى شىڭدادى. ودان بولەك, ءارتۇرلى جاعدايدا جاۋىنگەرلىك تاپسىرمانى ورىنداۋ ادىستەرى مەن تاسىلدەرىن ۇيرەندى.
– بولىمشەلەردى دايىنداۋ بارىسىندا ءاربىر اسكەري قىزمەتشى بولىمشەدەگى ءوز ورنىن, ءرولى مەن مىندەتتەرىن جەتە ءتۇسىندى. جاۋىنگەرلىك اتىس كەزەڭىندە جەكە قۇرام, ءبىرتۇتاس مەحانيزم رەتىندە ارەكەت ەتەدى, – دەيدى 61993 اسكەري ءبولىمى دەسانتتىق-شابۋىلداۋ روتاسىنىڭ كومانديرى, اعا لەيتەنانت الىشەر ەدەنوۆ.
بىراق جاۋىنگەرلىك دايىندىق كەزىندە باستى ءرول كومانديرلەردى وقىتۋعا باعىتتالعان. ولار قاجەت كەزدە شەشىم قابىلداپ, ءار جاۋىنگەردىڭ ماقساتتارى مەن مىندەتتەرىن انىقتايدى, جەكە قۇرامنىڭ ارەكەتتەرىن ۇيلەستىرۋگە جاۋاپ بەرەدى. بۇعان قوسا جاۋىنگەرلىك تاپسىرمانىڭ ورىندالۋىن باقىلايدى.
بولىمشەلەردى دايارلاۋ بارىسىندا كومانديرلەر جاۋىنگەرلىك ءىس-قيمىلداردى ساۋاتتى جوسپارلاۋدى, جاۋىنگەرلىك اتىس جوسپارلارىن ازىرلەۋدى, جەر بەدەرى, اۋا رايى جاعدايلارى جانە جاۋىنگەرلىك تاپسىرمالار سياقتى ءارتۇرلى فاكتورلاردى ەسكەرۋدى ۇيرەنەدى. ولار ۇرىس الاڭىنداعى جاعدايدى تەز جانە ءدال باعالاۋ, شەكتەۋلى ۋاقىت جاعدايىندا شەشىم قابىلداۋ داعدىلارىن جەتىلدىرەدى.
جازعى وقۋ كەزەڭىندە دەسانتتىق-شابۋىلداۋ اسكەرلەرىندە بارلىعى 500-دەن استام بولىمشە دايىندىعى جوسپارلانعان. بولىمشەلەردىڭ جاۋىنگەرلىك اتىستارى ءبىلىم مەن ۇيىمشىلدىقتى جەتىلدىرۋ ماقساتىندا جۇرگىزىلەدى.