ۇلتتىق قاۋىپسىزدىك كوميتەتى استانا جانە الماتى قالالارىندا ارنايى وپەراتسيا جۇرگىزىپ, 2 ميلليارد تەڭگەنىڭ ەسىرتكىسىن تاركىلەدى, دەپ حابارلايدى Egemen.kz.
انىقتالعانداي, استانا جانە الماتى قالالارىندا ۇلتتىق قاۋىپسىزدىك كوميتەتى پوليتسيا جانە پروكۋراتۋرامەن بىرلەسە وتىرىپ 3 ءىرى ەسىرتكى زەرتحاناسىنىڭ ارەكەتىن جويعان.
«قىلمىس جاسادى دەگەن كۇدىكپەن قازاقستاننىڭ 8 ازاماتى ۇستالىپ, سوت سانكتسياسىمەن قاماۋعا الىندى. ءتىنتۋ بارىسىندا 93 كگ-نان استام سينتەتيكالىق ەسىرتكى, كريستالدانۋ ساتىسىنداعى 70 ليتر مەفەدرون, سونداي-اق 255 كگ پرەكۋرسور مەن زەرتحانالىق جابدىقتار الىندى», دەلىنگەن حابارلامادا.
تاركىلەنگەن ەسىرتكىنىڭ قۇنى «قارا» نارىقتا 2 ملرد تەڭگەدەن اسادى. قىلمىستىق كودەكستىڭ 297-بابى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.