پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ قازاقستان رەسپۋبليكاسى پرەزيدەنتىنىڭ عىلىم جانە يننوۆاتسيالار جونىندەگى كەڭەسشىسى كۇنسۇلۋ زاكاريامەن كەزدەستى. جۇزدەسۋ بارىسىندا ەلىمىزدىڭ عىلىم سالاسىن دامىتۋ, عىلىم مەن يننوۆاتسيا جونىندەگى مەملەكەتتىك ساياساتتى ىسكە اسىرۋ, عىلىم قىزمەتكەرلەرىن قولداۋ جانە ىنتالاندىرۋ شارالارى, كادر دايارلاۋ سەكىلدى بىرقاتار وزەكتى ماسەلە تالقىلاندى.
كەزدەسۋدە نۇرتورە ءجۇسىپ سەنات دەپۋتاتتارى وتاندىق عىلىمدى دامىتۋعا ارقاشان باسا نازار اۋدارىپ وتىرعانىن اتاپ ءوتتى. ول پارلامەنت قابىلداعان زاڭدار مەن سەسسيا بارىسىندا عىلىمنىڭ دامۋىنا جانە ەلىمىزدەگى يننوۆاتسيالىق پروگرەسكە اسەر ەتەتىن ماسەلەلەردى شەشۋ شارالارىنا كەڭەسشىنىڭ نازارىن اۋداردى.
– پرەزيدەنت قاسىم-جومارت توقاەۆ وتاندىق عىلىمدى دامىتۋ ماسەلەسىنە ەرەكشە نازار اۋدارىپ وتىرعانى بارشاعا بەلگىلى. عىلىم جانە تەحنولوگيا جونىندەگى ءساۋىر ايىندا وتكەن ۇلتتىق كەڭەستە سويلەگەن سوزىندە عىلىمنىڭ تەتىكتەرى مەن مۇمكىندىكتەرىن تەحنوگەندىك جانە تابيعي اپاتتاردى بولجاۋعا, كليماتتىڭ وزگەرۋىنە قارسى كۇرەسكە تارتۋ كەرەك ەكەنىن اتاپ وتكەن بولاتىن. ويتكەنى جىلدار بويى توتەنشە جاعدايدىڭ الدىن الۋدا كوپتەگەن پروبلەما جۇيەسى قوردالانىپ قالعان. پرەزيدەنت ەنەرگەتيكالىق ىركىلىستەر مەن ەپيدەميالاردى, قۇرعاقشىلىقتى بولجاۋ جانە الدىن الۋ مىندەتتەرىنىڭ ماڭىزىنا دا توقتالدى. مەملەكەت باسشىسىنىڭ بارلىق تاپسىرماسىن ساپالى ورىنداۋ ماقساتىندا پارلامەنت پەن ۇكىمەتپەن قوسا بارلىق بيلىك ورگاندارى وسى باعىتتا ۇيلەستىرىلگەن جانە كەشەندى جۇمىس جۇرگىزۋگە ءتيىس دەپ سانايمىز, – دەدى نۇرتورە ءجۇسىپ.
ءوز كەزەگىندە كۇنسۇلۋ زاكاريا كۇن تارتىبىندەگى ماڭىزدى ماسەلەلەر تالقىلانعان وسى كەزدەسۋدى ۇيىمداستىرعانى ءۇشىن سەناتورعا العىسىن ءبىلدىردى. سونداي-اق پارلامەنت قابىلداعان زاڭدار مەن جالپى عىلىمدى دامىتۋعا باعىتتالعان شارالاردىڭ ماڭىزىنا توقتالدى.
– پارلامەنت – باستى مىندەتى ەلىمىزدىڭ ومىرىنە قاجەتتى اسا ماڭىزدى قۇجاتتاردى قابىلدايتىن مەملەكەتتىك ينستيتۋت بولدى جانە سولاي بولىپ قالا بەرەدى. پارلامەنت پەن ونىڭ دەپۋتاتتارى قازىرگى ۋاقىتتا «ادىلەتتى قازاقستاندى» قۇرۋداعى ماڭىزدى قۇرامداس بولىكتىڭ ءبىرى بولىپ سانالادى. ونىڭ نەگىزگى قۇندىلىعى – زاڭ ۇستەمدىگى مەن حالىقتىڭ ءال-اۋقاتى بولىپ تابىلادى, – دەدى كۇنسۇلۋ زاكاريا.