قازىر الماتى وبلىسىندا 13 ءورت ءسوندىرۋ ءبولىمى جۇمىس ىستەيدى. بىراق ونىڭ جەتكىلىكسىز ەكەندىگىن رايىمبەك اۋدانىنىڭ حالقىمەن كەزدەسۋىندە وبلىس اكىمى مارات سۇلتانعازيەۆ ايرىقشا اتاپ ءوتتى. بۇگىندە تاعى 18 ءورت ءسوندىرۋ بولىمىنە قاجەتتىلىك تۋىنداپ وتىر. شەتىن ماسەلە شەتىنەن شەشىم تابا باستادى. وعان دالەل – اۋدان ورتالىعى نارىنقول اۋىلىنان ءورت ءسوندىرۋ ءبولىمىنىڭ اشىلۋى.
رايىمبەك اۋدانى تاۋلى, نۋلى ايماق. سوندىقتان توتەنشە جاعدايلار قىزمەتى مەن ءورت ءسوندىرۋ بەكەتتەرى اۋاداي قاجەت. جالپى, وبلىستا مامانداندىرىلعان بولىمشەلەرمەن قاتار, سالا ماماندارىنا دا سۇرانىس جوعارى. تاپشىلىق بار. الماتى وبلىسىندا 474 توتەنشە جاعدايلار قىزمەتكەرى جۇمىس ىستەيدى. ال قاجەتتىلىك مىڭنان اسادى. نارىنقولداعى ءورت ءسوندىرۋ ءبولىمىنىڭ اشىلۋىندا وبلىس باسشىسى وسىنداي ستاتيستيكانى اتاپ ءوتتى. ەكى ەسەلىك جۇكتەمەمەن قىزمەت ەتىپ جۇرگەن ازاماتتارعا العىس ءبىلدىردى.
«ەلىمىزدىڭ 80 پايىز اۋماعىندا تابيعي ءورتتىڭ قاۋىپتىلىگى جوعارى. سوندىقتان ءورت قاۋىپسىزدىگى ەڭ ءبىرىنشى كەزەكتە تۇرعان ماسەلە. ءارى بارشامىزعا ورتاق. شىنى كەرەك, رەسپۋبليكادا ءدال وسىنداي 121 دەپو قاجەت. ال الماتى وبلىسىنا 18 نىسان سالۋىمىز كەرەك. الماتى وبلىسى اكىمدىگى مەن اپپاراتى بۇل ىسكە ءارى قاراي دا قولداۋ كورسەتەتىنىنە سەنەمىز», دەگەن توتەنشە جاعدايلار مينيسترلىگىنىڭ كوميتەت توراعاسى راميل كامالوۆ بولىمشەلەردىڭ اشىلۋىنا ىقپال ەتكەن وبلىس باسشىلىعىنا ريزاشىلىعىن جەتكىزدى.
جاڭا اشىلعان نىسان 288 ملن تەڭگەگە سالىنىپ, جاساقتالعان. مۇندا ءورت ءسوندىرۋشى ماماندارعا قاجەتتىڭ ءبارى بار. سۋ جاڭا نىساندا 17 قىزمەتكەر ەڭبەك ەتەدى.
الماتى وبلىسى