كولىك مينيسترلىگىنىڭ تەمىر جولدار جانە سۋ كولىگى كوميتەتىنىڭ قىزمەتكەرلەرى الەۋمەتتىك ماڭىزى بار باعىتتاردا قاتىنايتىن جولاۋشىلار پويىزدارىن تەكسەردى, دەپ حابارلايدى Egemen.kz.
اتالعان كوميتەت قىزمەتكەرلەرى جولاۋشىلاردى تاسىمالداۋ قاعيدالارى نورمالارىن ساقتاۋ بويىنشا استانا-الماتى, قىزىلوردا-پەتروپاۆل, استانا-شىمكەنت, قىزىلوردا-پاۆلودار, قىزىلوردا-كوكشەتاۋ, الماتى-جەزقازعان, الماتى-ساراتوۆ جانە ت.ب. الەۋمەتتىك ماڭىزداعى 20-دان استام جولاۋشىلار پويىزىن تەكسەردى.
تەكسەرىس بارىسىندا 284 كەلىسىم مىندەتتەمەلەرى بۇزىلعانى انىقتالعان. ونىڭ ىشىندە جولاۋشىلار ۆاگوندارىنىڭ ىشكى جانە سىرتقى كەلبەتىنىڭ نورماعا سايكەس كەلمەۋى, ۆاگونداردا كونديتسيونەرلەردىڭ بولماۋى جانە ەرەكشە قاجەتتىلىگى بار جانداردىڭ جاعدايى ەسكەرىلمەۋى, سانيتارلىق-تەحنيكالىق جاعدايدىڭ ساقتالماۋى جانە باسقا دا فاكتىلەر تىركەلدى.
ايىپپۇلداردىڭ جالپى سوماسى 10 ملن تەڭگەدەن استى. ايىپپۇلدار ۇلتتىق تاسىمالداۋشىعا دا, جەكە تاسىمالداۋشىلارعا دا سالىنادى.
ايتا كەتسەك, ەلىمىزدە 110 تۇراقتى الەۋمەتتىك ماڭىزى بار باعىت بويىنشا پويىزدار قاتىنايدى. جازدىڭ سوڭىنا دەيىن كوميتەت قىزمەتكەرلەرى قالعان جولاۋشىلار پويىزدارىن كەستەگە سايكەس تەكسەرەدى.