الماتى وبلىسىندا جاڭا ينۆەستورلاردى تارتۋ, ءوڭىردىڭ ينۆەستيتسيالىق تارتىمدىلىعىن ارتتىرۋ بويىنشا تۇراقتى جۇمىستار جۇرگىزىلىپ كەلەدى. اتاپ ايتساق, اگروونەركاسىپ كەشەنىن دامىتۋ, كولىك جانە لوگيستيكا, تۋريزم, بالامالى ەنەرگەتيكا جانە ونەركاسىپ, سونىڭ ىشىندە جەر قويناۋىن پايدالانۋدى دامىتۋ – نەگىزگى ستراتەگيالىق باعىتتار.
«2026 جىلعا دەيىن نەگىزگى كاپيتالعا 4,1 ترلن تەڭگە ينۆەستيتسيا جانە 1,5 ملرد دوللار تىكەلەي شەتەلدىك ينۆەستيتسيا تارتۋ جوسپارلانىپ وتىر. 2024 جىلدىڭ ءبىرىنشى جارتىجىلدىعىندا وبلىسقا كەلگەن ينۆەستيتسيا 21 پايىزعا ءوسىپ, 331,1 ملرد تەڭگەگە جەتتى. ينۆەستورلار ءۇشىن ەڭ تارتىمدى سەكتور وڭدەۋ ونەركاسىبى بولىپ قالا بەرەدى, وعان 2023-2027 جىلدار ارالىعىندا 835 ملن دوللاردان استام ينۆەستيتسيا سالۋ جوسپارلانعان», دەدى وبلىس اكىمىنىڭ ورىنباسارى رۋستام يساتاەۆ.
بيىل 6 ايدا 331,1 ملرد تەڭگە كولەمىندە ينۆەستيتسيا تارتىلىپ, وتكەن جىلدىڭ سايكەس كەزەڭىمەن سالىستىرعاندا ءوسىم 21 پايىزدى قۇراعان. 2024 جىلعا ارنالعان جوسپار – 1 تريلليون 20 ميلليارد تەڭگە. بۇگىنگى تاڭدا وبلىس وڭدەۋ ونەركاسىبىنە سالىنعان ينۆەستيتسيا كولەمى بويىنشا وتكەن جىلمەن سالىستىرعاندا 36 پايىزعا وسىممەن وڭ ديناميكا كورسەتتى, بۇل 40,2 ملرد تەڭگەدەن اسادى. اتاپ ايتقاندا, وڭدەۋ ونەركاسىبىنە سالىنعان ينۆەستيتسيانىڭ 20 پايىزى تاۋ-كەن ونەركاسىبى مەن كارەرلەردى يگەرۋدەن كەلەدى. نەگىزگى كاپيتالعا سالىنعان ينۆەستيتسيانىڭ نەگىزگى ۇلەسىن شاعىن جانە ورتا بيزنەس الادى, بۇل جالپى نەگىزگى كاپيتال ينۆەستيتسياسىنىڭ 81 پايىزىن قۇرايدى.
وسى جىلدىڭ I توقسانىنىڭ قورىتىندىسى بويىنشا الماتى وبلىسىنا تىكەلەي شەتەلدىك ينۆەستيتسيانىڭ جالپى اعىنى 140,7 ملن دوللار بولدى. وڭدەۋ سەكتورىنداعى تىكەلەي شەتەلدىك ينۆەستيتسيا ۇلەسى 69 پايىز نەمەسە 96,8 ملن دوللارعا جەتتى.
بۇل رەتتە ايماققا ترانسۇلتتىق كومپانيالاردى (تۇك) تارتۋ جۇمىستارى بەلسەندى جۇرگىزىلىپ جاتىر. قازىر وبلىستا 5 ترانسۇلتتىق كومپانيا جوبالاۋ مەن قۇرىلىستىڭ بەلسەندى كەزەڭىنە ءوتتى.
تارقاتىپ ايتساق, امەريكالىق «PepsiCo» كومپانياسى قۇنى 200 ملن دوللار بولاتىن قىتىرلاق كارتوپ ءوندىرۋ جوباسىن قولعا السا, «Focus Logistics» رەسەيلىك «Ozon»-مەن بىرلەسىپ, 151 ميلليون دوللارعا دەيىنگى سوماعا ا كلاسىنداعى قويمالاردى سالۋعا كىرىسپەك. بۇل جوبالار 2023-2027 جىلدار ارالىعىندا جۇزەگە اسىرىلىپ, 835 ميلليون دوللاردان استام قاراجات تارتادى دەپ كۇتىلەدى.
جالپى, ينۆەستيتسيا تارتۋ جانە ينۆەستورلاردى قولداۋ, سونداي-اق جاڭا جوبالاردى باستاۋ جۇمىستارى ۇزدىكسىز اتقارىلىپ جاتىر جانە ەرەكشە باقىلاۋدا.
وسى ورايدا تاماق ونەركاسىبىندە الكوگولسىز سۋسىندار مەن باسقا دا ازىق-ت ۇلىك ونىمدەرىن وندىرۋمەن تانىمال «PepsiCo» ترانسۇلتتىق كورپوراتسياسىنىڭ وڭىردە «Lays» كارتوپ چيپسى زاۋىتىن سالۋ جوباسىنىڭ تانىستىرىلىمىن وتكىزگەنىن ايتا كەتەيىك. جاڭا زاۋىتتىڭ ىسكە قوسىلۋى 2026 جىلعا جوسپارلانعان. جىلىنا 16 مىڭ توننا دايىن ءونىم ءوندىرۋدى كوزدەيدى.
«PepsiCo»-نىڭ بەلارۋس, كاۆكاز, ورتالىق ازياداعى جەتكىزۋ تىزبەگىن دامىتۋ جونىندەگى ديرەكتورى كونستانتين فەدورچۋك ءوز سوزىندە كومپانيا نەگىزىنەن جەرگىلىكتى شيكىزاتتى ساتىپ الۋعا نيەتتى ەكەنىن اتاپ ايتتى. وسى كۇنى وتاندىق فەرمەرلەرمەن كارتوپتىڭ سىناق پارتيالارىن جەتكىزۋگە كەلىسىمشارت جاساۋ جۇمىستارى باستالعان. بولجام بويىنشا 2026-2030 جىلدارى 66 مىڭ تونناعا دەيىن كارتوپ ساتىپ الىنباقشى.
الماتى وبلىسى