ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى كەزەكتى پلەنارلىق وتىرىسىندا ون جەتى ماسەلە قارالسا, سونىڭ الدىڭعى جەتەۋى كەدەن وداعىنىڭ ەرەجەلەرىن ايقىندايتىن زاڭدىق قۇجاتتار بولدى. باياندامانى قارجى ءمينيسترى بولات جامىشەۆ جاسادى. دەپۋتاتتار بىرىڭعاي كەدەندىك كەڭىستىكتىڭ 1 شىلدەدەن باستاپ كۇشىنە ەنەتىنىن ەسكەرىپ, زاڭ جوبالارىن ءبىراۋىزدان ماقۇلدادى.
“قازاقستان رەسپۋبليكاسىنىڭ ۇكىمەتى مەن فرانتسۋز رەسپۋبليكاسىنىڭ ۇكىمەتى اراسىنداعى جەردى قاشىقتىقتان زوندتاۋدىڭ عارىش جۇيەسى مەن عارىش اپپاراتتارىن قۇراستىرۋ-سىناۋ كەشەنىن قۇرۋ جانە پايدالانۋ شارتتارى تۋرالى كەلىسىمدى راتيفيكاتسيالاۋ تۋرالى” جانە “قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى “بايقوڭىر” كەشەنىندە بولۋ ءتارتىبى تۋرالى كەلىسىمدى راتيفيكاتسيالاۋ تۋرالى” زاڭ جوبالارى بويىنشا باياندامانى ۇلتتىق عارىش اگەنتتىگى ءتوراعاسىنىڭ ورىنباسارى مەيىربەك مولدابەكوۆ جاسادى. ول اتالعان عارىشتىق جۇيە الەۋمەتتىك-ەكونوميكالىق دامۋ ماسەلەلەرىن, قورعانىس پەن قاۋىپسىزدىك جانە جەردى پايدالانۋ, كارتوگرافيا, بيولوگيا, جىلجىمايتىن م ۇلىك مونيتورينگى جانە وزگە دە مىندەتتەردى قامتيدى. سونداي-اق كەلىسىم وتاندىق عارىش اپپاراتتارىن وندىرۋگە, جوبالاۋعا, جيناۋعا جانە سىناۋعا مۇمكىندىك بەرەدى. بۇل ءۇشىن كەدەندىك جەڭىلدىكتەر قاراستىرىلعان. جوبا 2012 جىلعا دەيىن جۇزەگە اسۋى ءتيىس.
ۆلاديمير نەحوروشەۆتىڭ سۇراعىنا وراي جاۋابىندا بايانداماشى جوعارى تەحنولوگيالىق عارىش اپپاراتتارىنىڭ 60 پايىزدىق جۇمىسى جيناقتاۋعا ارنالسا, قالعان 40 پايىزى جۇيەلى جوبالاۋ مەن ماتەماتيكالىق قامتاماسىز ەتۋ باعدارلاماسىن ازىرلەۋمەن بايلانىستى ەكەندىگىن ەرەكشە اتاپ ءوتتى. وسى تۇرعىدان كەلگەندە, قازاقستاندىق عالىمدار سوڭعىسىنا قازىردىڭ وزىندە دايىن, دەيدى مەيىربەك مولدابەك ۇلى. ەكىنشى كەلىسىم بويىنشا “بايقوڭىر” عارىش ايلاعىنداعى بىرقاتار نىسانداردى پايدالانۋ مەرزىمىنىڭ اياقتالۋىنا نەمەسە رەسەي اسكەري كونتينگەنتىنىڭ كەتۋىنە بايلانىستى ول جالعا بەرۋ قۇرامىنان شىعارىلعان. مىنە, وسى جانە “بايتەرەك” زىمىران عارىش كەشەنىن قۇرۋعا قاجەت ءبىرقاتار نىساندار دا قازاقستان تاراپىنا قايتارىلىپ وتىر. وسىعان وراي نىساندارعا بارۋ ءۇشىن رۇقسات بەرۋ ەرەجەلەرىنە دە ءوزگەرىستەر ەنگىزىلگەنى بەلگىلى بولدى. قازاقستاندىق نىساندارعا رۇقسات “قازعارىش”, ال رەسەيلىكتەر ءۇشىن “روسكوسموس” پەن “بايقوڭىر” قالاسى اكىمدىگى تاراپىنان بەرىلەتىن بولادى. شەتەلدىكتەر ءوتىنىمى 45 كۇن ىشىندە شەشىلسە, قازاقستاندىقتار ءۇشىن بۇل 5 كۇنگە دەيىن قىسقارتىلىپتى.
دەپۋتاتتار اتالعان زاڭدىق قۇجاتتاردىڭ ەلىمىز ءۇشىن ماڭىزدى ەكەندىگىن ەسكەرىپ, ماقۇلداۋدى ۇيعاردى.
اسقار تۇراپباي ۇلى.