الماتىدا ءداستۇرلى ساداق اتۋدان ۇلتتىق قۇرامانىڭ كوشپەلى وقۋ-جاتتىعۋ جيىنى ءوتىپ جاتىر. ۇلتتىق قۇراما قىركۇيەكتە استانادا وتەتىن V دۇنيەجۇزىلىك كوشپەلىلەر ويىندارىنا قاتىسادى, دەپ حابارلايدى Egemen.kz.
وقۋ-جاتتىعۋ جيىنىنا 12 سپورتشى قاتىسادى: ىرىكتەۋدەن وتكەن 10 سپورتشى جانە تاعى 2 سپورتشى رەزەرۆتە بولادى. ونىڭ ىشىندە 6 ەر ادام, 4 قىز كوشپەلىلەر ويىندارىنىڭ ەرەجەلەرىنە سايكەس جارىستارعا قاتىسادى.
«جاتتىعۋلار وتە قارقىندى ءجۇرىپ جاتىر, V دۇنيەجۇزىلىك كوشپەلىلەر ويىندارىنا از قالدى. سوندىقتان ءبىز قازىر جاتتىعۋدى كۇشەيتىپ, جاڭا ادىستەردى ۇيرەنىپ جاتىرمىز. سپورتشىلارىمىز حالىقارالىق دەڭگەيدە جاقسى ناتيجە كورسەتىپ كەلەدى. بۇگىندە سپورتتىڭ وسى ءتۇرى بويىنشا كوشپەلىلەر ويىندارىنا قاتىسۋعا 35 ەل تىركەلگەن, بۇل دەگەن 300-گە جۋىق سپورتشى. بارلىعى ءبىزدىڭ سپورتشىلارمەن ءبىر ارەناعا شىعىپ, ءبىرىنشى ورىنعا تالاسادى. وسىنداي دايىندىق ارقىلى ءبىز جاقسى ناتيجەلەرگە قولجەتكىزە الامىز جانە سپورتشىلارىمىز تۇعىردا كوك تۋىمىزدى مىندەتتى تۇردە كوتەرەدى», دەدى ءداستۇرلى ساداق اتۋدان قازاقستان ۇلتتىق قۇراماسىنىڭ اعا جاتتىقتىرۋشىسى دياس احمەتوۆ.
دايىندىق بارىسى تۋرالى ءداستۇرلى ساداق اتۋدان ۇلتتىق قۇراما مۇشەسى ەربول تاپەنوۆ ايتىپ بەردى.
«مەن 5 جىلدان استام ۋاقىتتان بەرى ءداستۇرلى ساداق اتۋمەن اينالىسىپ كەلەمىن. بۇل ەرەكشە سپورت, ويتكەنى ول زەيىندى, شىدامدىلىقتى, توزىمدىلىكتى قاجەت ەتەدى. قازىر V دۇنيەجۇزىلىك كوشپەلىلەر ويىندارىنا دايىندىقتان ءوتىپ جاتىرمىز, ىرىكتەۋدەن وتتىك, ويىنعا قاتىسۋشىلار قۇرامىنا كىردىك. ءوزىمىزدى جوعارى دەڭگەيدە كورسەتەمىز دەپ ويلايمىن», دەدى سپورتشى.
ەستەرىڭىزگە سالا كەتەيىك, رەسپۋبليكالىق ساداق اتۋ فەدەراتسياسى ۇلتتىق سپورت تۇرلەرى قاۋىمداستىعىنىڭ قۇرامىنا كىرەدى. سونىمەن قاتار قاۋىمداستىق قۇرامىنا بايگە, كوكپار, اۋدارىسپاق, اسىق اتۋ, جامبى اتۋ, تەڭگە ءىلۋ, قۇسبەگىلىك, JORYQ فەدەراتسيالارى دا كىرەدى. ال قاۋىمداستىقتى بەلگىلى كاسىپكەر, مەتسەنات, Altyn Qyran Foundation قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.