جۋرناليستەردى اككرەديتتەۋ ءتارتىبى وزگەرەدى. باق وكىلدەرىن ءىس-شارالارعا تىركەۋ قاعيدالارى «ماسس-مەديا تۋرالى» قازاقستان رەسپۋبليكاسى زاڭىنىڭ 28-بابىنىڭ 1-تارماعىنا سايكەس ازىرلەندى. قاۋلى جوباسى «اشىق نقا» پورتالىندا جاريالاندى. مادەنيەت جانە اقپارات ءمينيسترى ايدا بالاەۆا جاڭا تارتىپكە قاتىستى تۇسىنىكتەمە بەردى.
قاۋلى جوباسى بيىلدىڭ 1 تامىزىنا دەيىن قوعام تالقىسىنا ۇسىنىلىپ وتىر. قۇجاتقا سايكەس جۋرناليستەردى اككرەديتتەۋدىڭ وڭايلاتىلعان ءتارتىبى بىرىڭعاي مەديا پلاتفورما ارقىلى جۇزەگە اسىرىلادى. سونداي-اق مەديا پلاتفورمادا قازاق جانە ورىس تىلدەرىندە اككرەديتتەۋدى جۇرگىزۋگە وتىنىشتەردى قابىلداۋدى باستاۋ تۋرالى حابارلاندىرۋ جۇكتەلەدى. باق وكىلدەرىنە ۋاكىلەتتى ورگان ايقىندايتىن تارتىپپەن اككرەديتتەۋ كارتالارى بەرىلەدى.
– جالپى اتالعان قۇجات جوباسى قولدانىستاعى ەرەجەلەرمەن سالىستىرعاندا اسا كوپ وزگەرمەگەن. مىسالى, اككرەديتتەۋدەن باس تارتۋ نەگىزدەرى تۋرالى ەرەجەلەرگە توقتالساق. بۇل باق-تىڭ جۇمىس ىستەۋىن ۋاقىتشا توقتاتۋ نەمەسە مۇلدەم جابۋ جانە رەسمي رەەستردە تىركەلمەگەنى تۋرالى سوت شەشىمى كۇشىنە ەنگەن جاعدايدا ىسكە اسادى, – دەپ جازدى ايدا بالاەۆا Facebook پاراقشاسىندا.
مينيستر جۋرناليستەردىڭ اراسىندا ەڭ كوپ ساۋال تۋدىرعان باق وكىلدەرى قانداي تالاپتاردى ساقتاۋى كەرەك دەگەن ەرەجەنىڭ 10-تارماعىنا توقتالدى.
– بىرىنشىدەن, كەز كەلگەن جۋرناليست قاي باق اتىنان اككرەديتاتسيادان وتسە, سول رەداكتسياعا عانا اقپاراتتى جيناپ, جاريالاي الادى. الايدا جۋرناليسكە بىردەن بىرنەشە باق اتىنان اككرەديتاتسيا الۋعا ەشكىم تىيىم سالمايدى.
ەكىنشىدەن, بۇل تالاپ بەلگىلى ءبىر وقيعاعا/ىس-شاراعا قاتىستى جۋرناليستەردىڭ جەكە پىكىرلەرى مەن ۇستانىمدارىن الەۋمەتتىك جەلىلەردەگى جەكە اككاۋنتتارىندا بىلدىرۋگە قاتىسى جوق.
ۇشىنشىدەن, رەگلامەنت ماسەلەسىنە كەلەتىن بولساق, قولدانىستاعى ەرەجەلەردە قازىردىڭ وزىندە ءىس-شاراعا قاتىسۋشىلاردىڭ تاقىرىپتى, ۋاقىت ءتارتىبىن, قوعامدىق ءتارتىپتى ساقتاۋىن جۇرگىزۋشى (ياعني ءىس-شارا مودەراتورى) قامتاماسىز ەتەتىنى قاراستىرىلعان, دەدى ول.
ايتا كەتەرلىگى, اقش پەن ەۋروپالىق وداقتىڭ جانە حالىقارالىق ۇيىمداردىڭ تاجىريبەسى كورسەتكەندەي, بەلگىلەنگەن ەرەجەلەردى, سونداي-اق زاڭنامانى بۇزعان جاعدايدا جۋرناليست ءىس-شارالارعا قاتىسۋ قۇقىعىنان جانە اككرەديتاتسيادان ايىرىلادى. مىسالى, ەۋروپارلامەنتتەگى باق قىزمەتىن رەتتەيتىن ەرەجەدە تۇسىرىلىمگە رۇقسات ەتىلگەن ارنايى ورىندار قاتاڭ تۇردە بەلگىلەنگەن.
– تورتىنشىدەن, ەرەجەدە ءاربىر مەملەكەتتىك ورگاننىڭ نەمەسە ۇيىمنىڭ بەلگىلى ءبىر ءىس-شارانىڭ رەگلامەنتىن ءوزى بەكىتەتىندىگى كورسەتىلگەن. بۇل رەتتە مينيسترلىك ۋاكىلەتتى ورگان رەتىندە اقپاراتقا قولجەتىمدىلىك قاعيداتىن جانە جۋرناليستەردىڭ ەرەكشە مارتەبەسىن ساقتاۋ ماسەلەلەرى بويىنشا اتالعان رەگلامەنتتى ازىرلەۋ بويىنشا ءتيىستى ۇسىنىستارىن جىبەرەتىن بولادى.
بەسىنشىدەن, ەرەكشە ماڭىزدى مەملەكەتتىك وبەكتىلەرگە كىرۋ جانە سول مەكەمەلەردەگى رەجىمدەردى ۇستانۋ دا قولدانىستاعى زاڭنامانى ساقتاۋ مەن قاۋىپسىزدىكتىڭ اينىماس بولىگى بولىپ ەسەپتەلەدى. قورىتىندىلاي كەلە, اقپاراتقا قولجەتىمدىلىكتى قامتاماسىز ەتۋ مەن جۋرناليستەردىڭ مارتەبەسىن ارتتىرۋ – ارقاشان مينيسترلىك قىزمەتىنىڭ باستى باسىمدىعى ەكەنىن تاعى دا جەتكىزگىم كەلەدى, دەدى مادەنيەت جانە اقپارات ءمينيسترى.
ەسكە سالا كەتسەك, مەملەكەت باسشىسى قاسىم-جومارت توقاەۆ بيىل 19 ماۋسىمدا «ماسس-مەديا تۋرالى» زاڭعا قول قويعان ەدى. جاڭا قۇجات 20 تامىزدا, كەيبىر نورمالارى 2025 جىلدىڭ 1 قاڭتار ايىنان باستاپ كۇشىنە ەنەدى.