بەس ايدا ەلىمىزدە 8 مىڭنان اسا جول-كولىك وقيعاسى تىركەلىپ, 767 ازامات مەرت بولدى. 10 190 ادام زارداپ شەكتى. بۇل بىلتىرمەن سالىستىرعاندا, 85 پايىزعا جوعارى. جالپى, رەسپۋبليكادا كولىك جۇرگىزۋشىنىڭ دە, جاياۋ جۇرگىنشىنىڭ دە جول ءتارتىبى تومەن. وعان اسەر ەتەتىن فاكتور دا سان قيلى. كۇرمەۋلى پروبلەما باس پروكۋراتۋرادا وتكەن جول قاۋىپسىزدىگى ماسەلەلەرى جونىندەگى ۆەدومستۆوارالىق جۇمىس توبىنىڭ كەزەكتى وتىرىسىندا تالقىلاندى.
قاتەلىكتى كەشىرمەيتىن جول قاتىناستارىنا قاتىستى دەرەكتەرگە ۇڭىلسەڭ, توبە شاشىڭىز تىك تۇرادى. بيىل جارتى ايعا جەتپەيتىن ۋاقىتتا جول-كولىك وقيعاسىنان الماتى قالاسىندا 1 037 ادام, شىمكەنتتە 878 ازامات زارداپ شەككەن. اسىرەسە جامبىل, الماتى, ماڭعىستاۋ وبلىستارىندا جول اپاتى ءجيى ورىن الاتىن كورىنەدى. بۇعان وتانداستارىمىزدىڭ ەرەجەنى ەسكەرمەگەنىنەن بولەك, توراپتاردىڭ ينفراقۇرىلىمى سەكىلدى فاكتورلار دا اسەر ەتىپ وتىر. جيىندا الدىمەن سالدارمەن ەمەس, سەبەپپەن كۇرەسۋدە قولعا الىنعان ءىس-شارالار ايتىلدى.
– جول قاۋىپسىزدىگى ماسەلەلەرى جونىندەگى ۆەدومستۆوارالىق جۇمىس توبىنىڭ جۇرگىزگەن تالداۋى زەردەلەندى. جۇرگىزۋشى كۋالىگىن الۋ ەمتيحانىنا ءوزىن-ءوزى دايارلاۋ توقتاتىلدى جانە «اۆتومەكتەپ» اقپاراتتىق جۇيەسى ازىرلەندى. «كولىك قۇرالىن باسقارۋعا رۇقسات الۋ تۋرالى انىقتاما بەرۋ» مەملەكەتتىك قىزمەتى ەلەكتروندىق فورماتقا اۋىستىرىلدى. سونداي-اق كولىك قۇرالدارىنا گاز باللون جابدىعىن قاۋىپسىز ورناتۋدى باقىلاۋ جونىندەگى ءىس-شارالار جوسپارى ازىرلەنىپ جاتىر. كولىك مينيسترلىگى تاكسيلەردىڭ «ياندەكس» جانە «يندرايۆ» ءىرى اگرەگاتورلارىمەن ىنتىماقتاستىق تۋرالى مەموراندۋم جاسادى. ونىڭ اياسىندا ەڭبەك جانە دەمالىس رەجىمىن, تاكسي جۇرگىزۋشىلەرىنىڭ دەنساۋلىق جاعدايىن, سونداي-اق ءاۆتوموبيلدىڭ تەحنيكالىق جاي-كۇيىن باقىلاۋ جۇزەگە اسىرىلاتىن بولادى. تراسسالىق مەديتسينالىق-قۇتقارۋ پۋنكتتەرىن ورنالاستىرۋ جانە قايتا ورنالاستىرۋ بويىنشا ورىنداردى بەلگىلەۋ ادىستەمەسى ازىرلەندى. وعان سايكەس جكو ورىندارى مەن جولداردىڭ اپاتتىق-قاۋىپتى ۋچاسكەلەرى كوميتەتتىڭ اپاتتىلىق كارتاسىندا بەينەلەنگەن, – دەدى باس پروكۋراتۋرا قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ توراعاسى ءسابيت نۇرلىباي.
باسقوسۋعا ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى, وڭىرلەر اكىمدەرىنىڭ ورىنباسارلارى, مينيسترلىكتەردىڭ بەيىندى ۆەدومستۆولارىنىڭ جاۋاپتى بولىمشەلەرى, جەرگىلىكتى اتقارۋشى ورگانداردىڭ اۋماقتىق بولىمشەلەرى, پوليتسيا دەپارتامەنتتەرى, وبلىستىق پروكۋراتۋرالار, كوميتەتتىڭ اۋماقتىق دەپارتامەنتتەرى, «قازاۆتوجول» ۇك اق-نىڭ باسشىلارى, سونداي-اق IT-كومپانيالاردىڭ وكىلدەرى قاتىستى. وتىرىس بارىسىندا ۆاجت قاتىسۋشىلارىنىڭ ۇسىنىستارىن ەسكەرە وتىرىپ, قالىپتاستىرىلعان جول قاۋىپسىزدىگى دەڭگەيىن ارتتىرۋ بويىنشا ۇسىنىمداردىڭ جاڭا پاكەتى ساراپقا سالىندى. ءىىم اكىمشىلىك پوليتسيا كوميتەتىنىڭ توراعاسى قايسار سۇلتانبەكوۆ جول قاۋىپسىزدىگى سالاسىنداعى پروبلەمالىق جانە كەشەندى شارالار قابىلداۋدى قاجەت ەتەتىن ماسەلەلەر تۋرالى كەڭىنەن ايتىپ بەردى.
– جول-كولىك وقيعاسىنىڭ الدىن الۋ, اپاتتاردىڭ سالدارىن بارىنشا ازايتۋ ماقساتىندا رەسپۋبليكالىق تراسسالار مەن جەرگىلىكتى اۆتوجولداردا قاۋىپسىز جول ينفراقۇرىلىمىن قۇرۋ جونىندە بىرقاتار شارالار ۇسىنىلدى. اتاپ ايتقاندا, ۋاكىلەتتى ورگاندارمەن بىرلەسىپ اۆتوجولداردى تەكسەرۋ, جول قوزعالىسىن ۇيىمداستىرۋدى وزگەرتۋ جونىندەگى جۇمىستى جۇيەلەۋ, رەكونسترۋكتسيالاۋ جانە جوندەۋ جۇرگىزىلىپ جاتقان بارلىق جولداردا دايىن ۋچاسكەلەردى اشۋ بويىنشا جۇمىستى جەدەل جۇرگىزۋ, تۇنگى ۋاقىتتا تراسسالاردا اپاتتاردى ازايتۋ ءۇشىن يننوۆاتسيالىق «جارىق بەرەتىن» جول بەلگىسىن پايدالانۋدا شەتەلدىك تاجىريبەنى قولدانۋدى پىسىقتاۋ, سونداي-اق جەرگىلىكتى ماڭىزى بار جولدارعا قاتىستى باعدارلاما قابىلداۋ. ماسەلەن, اتىراۋ قالاسىنىڭ سىرتىنداعى تراسسالاردا بۇزۋشىلىقتاردى زاماناۋي فوتوبەينەتىركەۋ جۇيەلەرىمەن جابدىقتالعان سايكەستەندىرۋ بەلگىلەرى جوق پوليتسيانىڭ قىزمەتتىك اۆتوماشينالارمەن پاترۋلدەۋ جۇمىسى ءساتتى سىناقتان ءوتتى. وسىنداي قۇقىق بۇزۋشىلىقتار تۋرالى اقپارات اۆتوماتتى تۇردە بپ قسجاەك ءاىبت-ءنىڭ پروتسەسسينگ ورتالىعىنا جىبەرىلەدى, ال قۇقىق بۇزۋشىعا ايىپپۇل تۋرالى حابارلاما كەلەدى,– دەدى ول.
باسقوسۋدا مۇنداي تاجىريبەنى تولىق رەسپۋبليكادا سىناقتان وتكىزۋ, سونداي-اق قسجاەك-پەن بىرلەسىپ, جولدارداعى بۇزۋشىلىقتاردىڭ الدىن الۋ جانە جول-كولىك وقيعالارىنىڭ سحەماسىن جاساۋ كەزىندە «درونداردى» قولدانۋ, دەنساۋلىق ساقتاۋ مينيسترلىگىنە توتەنشە جاعدايلار مينيسترلىگىمەن جانە ءىىم اكىمشىلىك پوليتسيا كوميتەتىمەن بىرلەسىپ جكو-دان زارداپ شەككەن ادامدارعا ۋاقتىلى مەديتسينالىق كومەك كورسەتۋ ءۇشىن جەدەل ۆەدومستۆوارالىق ءوزارا ءىس-قيمىل ماسەلەسىن پىسىقتاۋ ۇسىنىلدى.
قاتىسۋشىلار وتىرىستى تۇيىندەي كەلە, بارلىق مۇددەلى مەملەكەتتىك جانە جەرگىلىكتى اتقارۋشى ورگاندار وزدەرىنىڭ قۇزىرەتتەرىنە ساي, رەسپۋبليكالىق جانە وبلىستىق دەڭگەيلەردە اپات دەڭگەيىن تومەندەتۋگە باعىتتالعان ناقتى ءارى ەگجەي-تەگجەي ءىس-شارالاردى ازىرلەۋدە بىرلەسە جوسپار قۇرۋعا ۋاعدالاستى. ال كوميتەتتىڭ جەتەكشىلىگىمەن ۆەدومستۆوارالىق جۇمىس توبى تۋىنداعان ماسەلەلەردى شەشۋگە مۇمكىندىك بەرەتىن ورتالىق رەتىندە بەكىتىلدى.