وليمپيادا دەگەن ءسوزدى ەستىگەن ساتتە كوز الدىڭىزعا نەنى ەلەستەتەسىز؟ ارينە, ءبىر-بىرىمەن ايقاسا بايلانىسقان ءتۇرلى-ءتۇستى بەس دوڭگەلەكتى. سول بەس شەڭبەردىڭ تۇستەرى بىلاي ورنالاسقان: كوك – ەۋروپا, سارى – ازيا, قارا – افريكا, جاسىل – اۋستراليا, قىزىل – امەريكا.
ءدال وسى مالىمەت حالىقارالىق وليمپيادا كوميتەتىنىڭ رەسمي انىقتامالىعىندا 1951 جىلعا دەيىن تۇردى. الايدا بۇل تۇسىنىكتەمە كەيىن الىنىپ تاستالدى. ويتكەنى 1913 جىلى اتالعان تاڭبانى ويلاپ تاپقان پەر دە كۋبەرتەننىڭ ەڭبەكتەرىندە مۇنداي دەرەك كەزدەسپەيدى. ونىڭ يدەياسى باسقاشا بولعان. ياعني مۇنداعى بەس ءتۇستىڭ كەم دەگەندە بىرەۋى كەز كەلگەن مەملەكەتتىڭ تۋىندا بولاتىنداي ەتىپ تاڭدالعان.