ەلوردادا العاشقى ءىرى كرەاتيۆتى حاب ءوز جۇمىسىن باستادى. شىعارماشىلىق كەڭىستىك مەملەكەت باسشىسى قاسىم-جومارت توقاەۆتىڭ تاپسىرماسىمەن اشىلدى. پرەزيدەنت ۇلتتىق قۇرىلتايدىڭ ءۇشىنشى وتىرىسىندا بۇل سالا ەلىمىزدىڭ ەكونوميكاسىن وركەندەتۋگە تىڭ سەرپىن بەرەتىنىنە سەنىم بىلدىرگەن ەدى.
كرەاتيۆتى حابتىڭ اشىلۋ سالتاناتىنا مادەنيەت جانە اقپارات ءمينيسترى ايدا بالاەۆا, سەنات دەپۋتاتى اندرەي لۋكين مەن استانا قالاسىنىڭ اكىمى جەڭىس قاسىمبەك قاتىستى. قوناقتار ساندىك-قولدانبالى ونەر شەبەرلەرىمەن تانىسىپ, ۇلتتىق بولمىستى ساقتاۋدا قازاقتىڭ ءداستۇرلى ويۋ-ورنەگىن قاستەرلەپ, ناسيحاتتاۋدىڭ ماڭىزى زور ەكەنىن ايتتى.
اۋدانى 1,5 مىڭ شارشى مەتردى قۇرايتىن ۇشقاباتتى عيمارات نەتۆوركينگ جاساپ, كرەاتيۆتى يندۋستريا جوبالارىن جۇزەگە اسىرۋ الاڭىنا اينالماق. حاب بىرنەشە باعىتتاعى ايماقتارعا بولىنگەن. اتاپ ايتقاندا, كىتاپ دۇكەنى مەن وتاندىق باسپالاردىڭ ونىمدەرىنە ارنالعان وقۋ زالى, ەتنو-مۇراجاي, قولونەر شەبەرحانالارى, زاماناۋي ونەر قويىلىمدارى, مۋزىكالىق جانە ادەبي كەشتەر الاڭى, سونىمەن قاتار «Smart nomad games» جوباسى مەن زاماناۋي ونەر گالەرەياسى بار.
«ÓzgeEpic» حابىنا بىرەگەي ەتنو-مۋزەي مەن قولونەر شەبەرحاناسى كىرەدى. مۇندا حاب اۋماعىندا وتاندىق باسپالاردىڭ ونىمدەرىن ساتۋعا ارنالعان كىتاپ دۇكەنى بار. استاناداعى كرەاتيۆتى حابتىڭ ماقساتى – باسەكەگە قابىلەتتى زاماناۋي ونەردى دامىتۋ جانە قوعامنىڭ مادەني ساناسىن ارتتىرۋ, سونداي-اق دارىندى جانە ينتەللەكتۋالدى جاستاردى قولداۋ ءارى تالىمگەرلىك ەتۋ», – دەپ ەلوردا اكىمى Instagram پاراقشاسىندا جازدى.
مۇنداي حابتاردى ەلىمىزدىڭ بارلىق ايماعىنان اشۋ جوسپارلانىپ وتىر. بۇل شىعارماشىلىق جوبالاردى ىسكە اسىرۋعا جانە كوممەرتسيالاندىرۋعا, سونداي-اق شىعارماشىلىق نارىققا جۇزدەگەن مامان قوسۋعا ىقپال ەتەدى.