قوناەۆ قالاسىنىڭ مادەنيەت ۇيىندە ۆەتەريناريا سالاسى قىزمەتكەرلەرى كۇنىنە ارنالعان سالتاناتتى ءىس-شارا ۇيىمداستىرىلدى. بۇل كۇنى سالا ارداگەرلەرى مەن جاس ماماندارعا قۇرمەت گراموتالارى مەن العىسحاتتار تابىستالدى. ءىس-شارا بارىسىندا 4 وبلىستىق, 11 اۋداندىق جانە قالالىق ۆەتەرينارلىق ستانسالارعا 15 جاڭا اۆتوكولىكتىڭ كىلتىن سالتاناتتى تۇردە تابىستاۋ ءراسىمى ءوتتى.
«ۆەتەرينارلاردىڭ جۇمىسى ايماقتىڭ ازىق-ت ۇلىك قاۋىپسىزدىگىن قامتاماسىز ەتۋدە ماڭىزدى ءرول اتقارادى. ۆەتەرينار ماماندارعا اۋىل شارۋاشىلىعى ونىمدەرىنىڭ تازالىعى ءۇشىن ۇلكەن جاۋاپكەرشىلىك جۇكتەلگەن. وبلىستا ۆەتەرينارلىق مەديتسينا سالاسىنا كوپ كوڭىل بولىنەدى. اتاپ ايتساق, شتاتى
1 071 قىزمەتكەرى بار وبلىستىق ۆەتەرينارلىق ستانسا قۇرىلدى, جۇقپالى اۋرۋلارعا قارسى ۆاكتسيناتسيا جانە سەرولوگيالىق زەرتتەۋلەر جۇرگىزىلۋدە. جانۋارلار مەن ادامنىڭ جۇقپالى اۋرۋلارىنىڭ الدىن الۋ ءۇشىن وڭىردە 1 500-گە جۋىق ۆەتەرينارلىق قىزمەتكەر بىرلەسىپ جۇمىس ىستەيدى. جىل باسىنان بەرى وبلىستا جانۋارلار مەن قۇستاردىڭ 16 ءتۇرلى اسا قاۋىپتى اۋرۋىنا قارسى ۆەتەرينارلىق-پروفيلاكتيكالىق ءىس-شارالار 89 پايىزعا ورىندالدى. بيىل ەپيزووتياعا قارسى ءىس-شارالارعا جۇمسالاتىن شىعىندار
4 ميلليارد 997 ميلليون تەڭگەنى قۇرايدى, بۇل وتكەن جىلمەن سالىستىرعاندا 26 پايىزعا ارتىق», دەپ اتاپ ءوتتى وبلىس اكىمىنىڭ ورىنباسارى الماس باتانوۆ.
بيىل ەپيزووتياعا قارسى ءىس-شارالارعا 5 ملرد تەڭگە جۇمسالادى. جىلدان-جىلعا ۆەتەرينارلىق-سانيتارلىق وبەكتىلەردى سالۋعا اقشالاي قاراجات ۇلعايۋدا. ۆەتەرينارلىق ماماندارعا جالاقىنى كوتەرۋ ءۇشىن قوسىمشا قاراجات ءبولىنىپ, جالاقى 20 پايىزعا كوبەيدى. جالاقىنى كوتەرۋ ەسەبىنەن شالعاي اۋىلداردا ۆەتەرينارلىق مامانداردى جۇمىسقا ورنالاستىرۋ, ولاردىڭ تۇرعىن ءۇي جاعدايلارىن جاقسارتۋ, ەڭبەك ونىمدىلىگىن ارتتىرۋ كوزدەلگەن.
كاسىبي مەرەكەگە وراي بالقاش اۋدانى قۇيعان اۋىلدىق وكرۋگى ۆەتەرينارلىق پۋنكتىنىڭ مەڭگەرۋشىسى, 38 جىل جۇمىس ءوتىلى بار ايگۇل دۇيسەنبەكوۆا پرەمەر-مينيستردەن العىسحات الدى.
«بۇگىن ءبىز العاش رەت كاسىبي مەرەكەمىزدى اتاپ وتۋدەمىز. بۇل ۆەتەرينارلاردىڭ مارتەبەسىن كوتەرۋمەن قاتار ەڭبەككە قىزىعۋشىلىعىن ارتتىرارى انىق», دەدى ماراپات يەسى ايگۇل دۇيسەنبەكوۆا.
الماتى وبلىسى