سەنات دەپۋتاتى عالياسقار سارىباەۆ تالدىقورعان قالاسىندا «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ, قوعامدىق كەڭەستىڭ وكىلدەرىمەن جانە ءماسليحات دەپۋتاتتارىمەن كەزدەستى. باسقوسۋدا سەناتتىڭ زاڭ شىعارۋ قىزمەتى, جەرگىلىكتى دەپۋتاتتارمەن ءوزارا ءىس-قيمىل, سونداي-اق وڭىردەگى وزەكتى ماسەلەلەر تالقىلاندى.
سەناتور جاڭادان سالىنعان «جەتىسۋ ارەنا» سپورت كەشەنىندە بولدى جانە ۆولەيبول مەن ۇستەل تەننيسىنە ارنالعان وقۋ-جاتتىعۋ كەشەندەرىنىڭ قۇرىلىسىمەن تانىستى. تاپسىرىس بەرۋشىلەرمەن جانە مەردىگەرلەرمەن كەزدەسۋ بارىسىندا قۇرىلىستى ۋاقتىلى جانە ساپالى اياقتاۋ سپورتشىلاردىڭ جاقسى جاتتىعۋىنا, وڭىرگە كاسىبي بىلىكتى جاتتىقتىرۋشىلاردىڭ كەلۋىنە جانە وسىندا قونىستانۋىنا ىقپال ەتەتىنىنە نازار اۋداردى.
ع.سارىباەۆ وسى وڭىردە ورنالاسقان 5514 اسكەري بولىمدە دە بولدى. وندا اسكەري قىزمەتشىلەردىڭ قىزمەت ەتۋ جانە تۇرمىس جاعدايىمەن, ورىن الماستىرۋ جوسپارلانىپ وتىرعان جاڭا اۋماقتاعى نىساندار قۇرىلىسىمەن, سونداي-اق اسكەري تەحنيكا, اتىس قارۋى مەن جابدىقتاردىڭ ۇلگىلەرىمەن تانىستى. كەزدەسۋ بارىسىندا جاۋىنگەرلىك دايىندىقتى ارتتىرۋ, قاجەتتى جابدىقتارمەن قامتاماسىز ەتۋ جانە اسكەري قىزمەتشىلەر مەن ولاردىڭ وتباسىلارىن الەۋمەتتىك قولداۋ ماسەلەلەرى تالقىلاندى, اسكەري قىزمەت جاعدايىن جاقسارتۋ, وقىتۋ, كاسىبي دامۋ جانە ءبىلىم بەرۋ گرانتتارىن بەرۋ تاقىرىپتارى قوزعالدى. سەناتور ۇلاندارعا ادال قىزمەتى ءۇشىن العىسىن ءبىلدىرىپ, ولاردىڭ ءوڭىردىڭ قاۋىپسىزدىگى مەن تۇراقتىلىعىن قامتاماسىز ەتۋدەگى ءرولىنىڭ ماڭىزدىلىعىن اتاپ ءوتتى.