قوقىس سۇرىپتاۋ الاڭى سالىنادى

قورشاعان ورتانىڭ تازالىعىن ساقتاۋعا با­عىتتالعان جوبا بۇ­گىندە «تازا بەيسەنبى» ەكواكتسياسىنا ۇلاسىپ, وڭىرلەردە تازارتۋ جۇمىستارى جالعاسىپ جاتىر. بۇل ناۋقاندا «Amanat» پارتياسىنىڭ مۇشەلەرى دە بەلسەندىلىك تانىتىپ كەلەدى. وتكەن بەيسەنبىدە پارتيا مۇشەلەرى جامبىل اۋدانىنداعى قاستەك وزەنىنىڭ جاعاسىن تۇر­مىستىق قالدىقتاردان تازارتتى. ەكولوگيالىق ءىس-شاراعا بارلىق دەڭگەيلى ءماسليحات دەپۋتاتتارى, باستاۋىش پارتيا ۇيىمدارىنىڭ مۇشەلەرى, اۋىل تۇرعىندارى قاتىستى. ءسويتىپ, اكتسياعا اتسا­لىسقان 100-گە جۋىق ادام تۋعان ولكەنىڭ تازالىعىن ساقتاۋعا ءوز ۇلەسىن قوستى. جينالعان 1,5 توننا قوقىس ارنايى پوليگونعا جىبەرىلدى.

«جازعى ۋاقىتتا ازاماتتاردىڭ كوبى وزەن-كولدى جاعالايدى. سونىڭ ءبىرى ادام اياعى ارىلمايتىن قاستەك وزەنىنىڭ جاعاسىن تازا ۇستاۋ – نەگىزگى ماقساتىمىز. بۇگىنگى تازالاۋ جۇمىستارى بارىسىندا بۇرىننان قالىپ قالعان تۇرمىستىق قالدىقتار, پوليەتيلەن پاكەتتەر مەن پلاستيك بوتەلكەلەر, باسقا دا تۇرمىستىق كۇل-قوقىستار شىعارىلىپ, پوليگونعا جونەلتىلدى. ەلدى مەكەندەردە ۇيىمداستىرىلىپ جاتقان «تازا بەيسەنبى» ەكواكتسيا­سى اياسىندا تابيعاتىمىز تازارىپ, ءتارتىپ ورناپ جاتىر. ءاربىر ازامات ءوزىنىڭ تۋعان جەرىن تازا ۇستاۋعا داعدىلانىپ, ونى وزگەگە كورسەتە ءبىلۋى كەرەك دەپ ويلايمىن. سوندىقتان بۇل باستاما جالعاسىن تابادى», دەيدى «Amanat» پارتياسى جامبىل اۋداندىق فيليالىنىڭ توراعاسى ىقىلاس امالبەك.

ال الماتى وبلىستىق ءماس­ليحات دەپۋتاتى مەرۋەرت مولدا­شەۆانىڭ ايتۋىنشا, ەكولو­گيا­لىق ماسەلەلەردى شەشۋ – «Amanat» پار­تياسىنىڭ سايلاۋالدى باع­دار­لاماسىندا قامتىلعان ما­ڭىزدى باسىمدىقتاردىڭ ءبىرى.

«اماناتتىقتار تابيعاتتى ايالاۋ ءىسىن ءارى قاراي جالعاستىرۋعا نيەتتى. پارتيانىڭ وڭىرلىك سايلاۋالدى باعدارلاماسى اياسىندا 2027 جىلعا دەيىن بارلىق اۋدان ورتالىعىنداعى جانە قوناەۆ قالاسىندا رۇقسات ەتىلمەگەن قوقىس ۇيىندىلەرىن جويۋ مىندەتى تۇر. ونىمەن قوسا وڭىردە پوليگون جانە كەشەندى قوقىس تيەۋ مەن سۇرىپتاۋ ءتورت الاڭى سالىنادى. سونداي-اق اۋىلداردا قوقىستى بولەك سۇرىپتاۋعا جانە قۇرامىندا سىناپ بار قالدىقتاردى جيناۋعا ارنالعان كەمىندە 1 مىڭ كونتەينەر ورناتىلادى», دەيدى وبلىستىق ءماسليحات دەپۋتاتى.

الماتى وبلىسى