وبلىس ورتالىعىنان شالعايدا جاتقان ەلدى مەكەندەردى ساقتاپ قالۋ ءۇشىن حالىققا قاجەتتى نىسانداردىڭ قالانعانى ءجون. سەبەبى سپورتقا اۋەس بالالار مەن قىزمەتكە بەيىم جاستار قاتارىنان قالعىسى كەلمەيدى. وسى رەتتە قاراتال اۋدانىنا قاراستى كوپبىرلىك اۋلىندا قوس عيمارات بوي كوتەردى. ءبىرى – اكىمشىلىك بولسا, ەكىنشىسى – زاماناۋي سپورت كەشەنى. ال اقسۋ اۋدانىنا قاراستى كوشكەنتال اۋلىندا كوپتەن كۇتكەن مادەنيەت ءۇيى ەل يگىلىگىنە بەرىلدى.
اۋەلى قىزىلبالىق اۋىلدىق وكرۋگىنە قاراستى كوپبىرلىك اۋلىندا ۇلان-اسىر توي بولدى. قوس بىردەي قۋانىشقا كەنەلگەن اۋىل تۇرعىندارىنىڭ مەرەيى تاسىدى. ءبىر عانا اۋىلدىڭ وزىندە اۋىز تولتىرىپ ايتاتىن جاڭالىق كوپ ەكەن. ماسەلەن, اۋدان ورتالىعىنان الىستا جاتقان اۋىلعا دەيىنگى تاسجول جوندەلىپ جاتىر. ەرتە كوكتەمدە باستالعان جول جاساۋ جۇمىستارى جىل اياعىنا دەيىن اياقتالاتىن ءتۇرى بار. سونىمەن قاتار اۋىلداعى اۋىزسۋ ماسەلەسى كوپ جىلدان بەرى شەشىمىن تاپپاي كەلە جاتقان ەدى. مىنە, وسى ءبىر كۇردەلى ءىستىڭ دە كۇرمەۋى شەشىلىپ, تازا اۋىزسۋمەن قامتىلىپ وتىر. وسىنداي ىلكىمدى ىسپەن قاتار اۋىلعا اكىمدىكتىڭ جاڭا عيماراتى سالىنىپ, لەنتاسى قيىلدى.
جاڭا نىساننىڭ سالتاناتتى اشىلۋ راسىمىنە قاراتال اۋدانىنىڭ اكىمى ۇلان دوسىمبەكوۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇل, قازاقستاننىڭ ەڭبەك سىڭىرگەن جاتتىقتىرۋشىسى, قازاقستان رەسپۋبليكاسىنىڭ قۇرمەتتى سپورت قايراتكەرى ەلسيار قاناعاتوۆ قاتىسىپ, تۇرعىنداردى قۋانىشتارىمەن قۇتتىقتادى.
«دەنە شىنىقتىرۋ مەن سپورت ارقىلى ۇلت ساۋلىعىن جاقسارتۋ باعىتىندا ەلىمىزدە بارلىق جاعداي جاسالىپ كەلەدى. بۇگىن اشىلىپ وتىرعان سپورت كەشەنى – سونىڭ ايقىن دالەلى. بۇل كەشەن جەرگىلىكتى تۇرعىنداردىڭ يگىلىگىنە قىزمەت ەتىپ, بولاشاق الەم چەمپيوندارى مەن جۇلدەگەرلەرىن تاربيەلەپ شىعاراتىنىنا سەنىمىم مول», دەدى اۋدان اكىمى ۇ.دوسىمبەكوۆ.
اۋدان باسشىسى جىل بويىنا ىستەلىپ جاتقان يگىلىكتى ىستەردى سارالاي كەلە, اۋىل تۇرعىندارى مەن عيماراتتى سالعان مەردىگەر كومپانياعا العىسىن ايتتى. بۇدان كەيىن اۋىلدىق اقساقالدار القاسىنىڭ توراعاسى نۇرعازى جاسانوۆ اق باتاسىن ارنادى. اجەلەر شاشۋ شاشىپ, سالتاناتتى ءىس-شارانىڭ شىرايىن ودان ءارى اسىردى. اكىمدىك عيماراتى بلوكتى-مودۋلدەن قۇراستىرىلعان. نەبارى ەكى ايدىڭ ىشىندە بوي كوتەرگەن نىسان اۋىلعا كورىك بەرىپ تۇر. ىشىندە اۋىل اكىمىنىڭ جەكە كابينەتىمەن قاتار مامانداردىڭ جەكە بولمەلەرى, كەلگەن تۇرعىنداردى قابىلدايتىن ارنايى بولمە جانە اۋىلدىق كىتاپحاناعا دا ورىن بار. وسىنداي جاعىمدى جاڭالىقتىڭ كۋاسى بولعان اۋىل حالقى ءدان ريزاشىلىقتارىن ءبىلدىرىپ, جاڭا عيماراتتىڭ ءىشىن ارالاپ كوردى.
جالپى, كوپبىرلىك اۋىلى اۋدان ورتالىعى ۇشتوبە قالاسىنان 180 شاقىرىم جەردە. قىزىلبالىق اۋىلدىق وكرۋگىنە قاراستى بۇل اۋىلدا 900-دەن استام حالىق تۇرادى. جەرگىلىكتى تۇرعىندار سپورت نىسانىنىڭ ىسكە قوسىلۋىن اسىعا كۇتكەن ەدى. مەردىگەر كومپانيا «Sheber Metall» جشس بۇل ەكىقاباتتى عيماراتتىڭ قۇرىلىسىن 2023 جىلى باستاپ, جۋىردا پايدالانۋعا بەردى. جوبانىڭ قۇنى 150 ملن تەڭگەنى قۇرايدى. قارجى وبلىستىق بيۋدجەتتەن بولىنگەن.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, جاڭا سپورت نىسانىنىڭ اۋماعى 240 شارشى مەتردى قۇرايدى. مۇندا بالالار مەن جاسوسپىرىمدەردىڭ دەنەشىنىقتىرۋ كلۋبى قۇرىلىپ, سپورتتىڭ كۇرەس, ۆولەيبول, باسكەتبول تۇرلەرىنەن سەكتسيالار جۇمىس ىستەيدى. سونداي-اق كەشەندە 11 شتاتتىق بىرلىككە سايكەس تۇراقتى جۇمىس ورنى اشىلىپ جاتىر. كەشەن زامان تالابىنا ساي جابدىقتالعان. ەندى مۇندا اۋىل جاستارى مەن جاسوسپىرىمدەرىنىڭ بوس ۋاقىتتارىن ءتيىمدى وتكىزىپ, سپورتپەن شۇعىلدانۋىنا بارلىق مۇمكىندىك بار.
اقسۋ جەرىندەگى قۋانىشتىڭ دا ورنى بولەك. كوشكەنتال اۋلىندا كوپتەن ەسىگى جابىق تۇرعان مادەنيەت ءۇيى كۇردەلى جوندەۋدەن ءوتىپ, پايدالانۋعا بەرىلدى. ىرگەتاسى 1958 جىلى قالانعان مادەني وشاقتا تالاي القالى جيىن وتكەن. 60-جىلدارى قاپال اۋدانىندا مال باسى مىڭعىرىپ ءوسىپ, استىق قامباعا سىيماي, ءوڭىردىڭ داڭقى دۇركىرەپ, وداققا تانىلعان. سول كەزدە كوشكەنتال اۋلىنداعى اتالعان مادەنيەت ءۇيى اۋدان كولەمىندە سابان توي, شوپان توي وتەتىن بولعان. سونداي-اق جالپاق جۇرت جىلدى قورىتىندىلاۋ ءۇشىن وسىندا جينالعان.
مۇندا پارتيا, كومسومول ۇيىمدارىنىڭ باسقوسۋلارى وتكەن. كەيىنگى بىرنەشە جىل بويى مادەنيەت ءۇيىنىڭ توزىعى جەتىپ, توبەسىنەن سۋ اعىپ, ەدەنى تەسىلىپ, جىلۋ قۇبىرى قيراپ, جارامسىز بولعان. سودان امالسىز اۋىل حالقى جاڭا عيماراتتىڭ سالىنۋىن كۇتكەن. ءسويتىپ, حالىقتىڭ تىلەگى بويىنشا نىساننىڭ كۇردەلى جوندەۋ جۇمىسىنا «اۋىل – ەل بەسىگى» باعدارلاماسى اياسىندا 310 ملن 909 مىڭ تەڭگە بولىنگەن. مەملەكەتتىك ساتىپ الۋ شارتى بويىنشا «مولىقباي بايساق ۇلى اتىنداعى اقسۋ اۋداندىق مادەنيەت ءۇيى» مكقك مەن «ازامات قۇرىلىس» جشس اراسىندا 2023 جىلعى 22 اقپاندا كەلىسىمشارت جاسالىنىپ, قۇرىلىس جۇمىسى باستالادى.
بۇگىندە كۇردەلى جوندەۋ تولىق اياقتالىپ, تەحنيكالىق ماتەريالدار ساتىپ الىنىپ, ادەمى عيمارات پايدالانۋعا دايىن تۇر. اۋىلداعى مادەنيەت ۇيىندە 5 ۇيىرمە جۇمىس ىستەيدى. مادەني وشاقتى بىرنەشە جىلدان بەرى باسقارىپ كەلە جاتقان سىرىم جولدىحانوۆ مەملەكەتتىك شارالاردى اتالعان عيماراتتىڭ الدىندا وتكىزەتىنىن جەتكىزدى.
«شىنى كەرەك, بۇل تىعىرىقتان شىعۋدىڭ جولى ەدى. اۋا رايى سان قۇبىلعاندا كيىز ءۇي تىگىپ, شاتىر تىككەن كۇندەر دە بولعان. ەندى قىزىل كىرپىشتەن سالىنعان, ەكىقاباتتى مادەنيەت ءۇيى اۋىلدىڭ مىڭنان اسا تۇرعىنىنا قىزمەت ەتەدى. مادەني وشاقتىڭ كىتاپحاناسى ۋاقىتشا باسقا جەرگە كوشىرىلگەن. قورىندا 16400 كىتابى بار كىتاپحانا جارىق, جىلى, كەبۋ زالعا قايتادان قونىس تەپتى. جاڭا عيماراتتا دابىلقاققىش, بەينەباقىلاۋ كامەرالارى بار. مۇمكىندىگى شەكتەۋلى تۇرعىندارعا ارنالىپ پاندۋس ورناتىلعان», دەيدى س.جولدىحانوۆ.
الىس اۋىلداردا وسىنداي جايدارمان جاڭالىقتار ءجيى بولسىن دەگەن تىلەگىن جولداعان حالىقتىڭ ءسوزى ورىندى. قازىر وڭىردە بولاشاعى جوق اۋىلدار كوبەيىپ كەلەدى. وسىنداي نىساندار سول اۋىلدى ساقتاپ قالۋ ءۇشىن جاسالعان تاعى ءبىر قادام دەپ ۇقتىق.
جەتىسۋ وبلىسى