قاڭتار وقيعاسى كەزىندە بيلىگىن اسىرا پايدالانىپ, قارۋ قولدانعان اسكەري ارمان جۇماننىڭ ءىسى قايتا قارالدى, دەپ جازادى Egemen.kz kaz.inform.kz-كە سىلتەمە جاساپ.
بۇعان دەيىن الماتى گارنيزونى اسكەري سوتى ارمان جۇمانعا ۇكىم شىعارىپ, ونى اقتاعان ەدى. الايدا اسكەري پروكۋراتۋرا قاڭتار وقيعاسى كەزىندە 4 جاسار ايكوركەمدى ءولتىردى دەپ ايىپتالعان ارمان جۇمانعا شىققان ۇكىممەن كەلىسپەيتىنىن جەتكىزىپ, اپپەلياتسيالىق سوتقا شاعىمدانعان.
سوتتىڭ وسى ساتىسىندا ول قايتا ايىپتالدى.
سوتتالۋشىنىڭ كىناسى ءىس بويىنشا جينالعان دالەلدەمەلەرمەن, ياعني جابىرلەنۋشىلەر مەن كۋاگەرلەردىڭ ايعاقتارىمەن, سوت ساراپتاماسىنىڭ قورىتىندىسى جانە زاتتاي ايعاقتارمەن دالەلدەندى.
اسكەري سوتتىڭ سوت القاسى اقتاۋ ۇكىمىنىڭ كۇشىن جويىپ, جاڭا ۇكىم شىعاردى.
جاڭا ۇكىمگە سايكەس قىلمىستىق كودەكستىڭ 451-بابى 2-بولىگىنىڭ 1-تارماعى بويىنشا ا.جۇمان كىنالى دەپ تانىلىپ, 7 جىلعا باس بوستاندىعىنان ايىرىلدى.
اپەللياتسيالىق ۇكىم زاڭدى كۇشىنە ەندى.
قىلمىستىق ءىس جابىق سوت وتىرىسىندا «قۇپيا» بەلگىمەن قارالدى.