بۇگىن ارىس قالاسىنداعى اسكەري ءبولىم اۋماعىندا كارىز جۇيەسىنە قىزمەت كورسەتۋ مەن تازالاۋ جۇمىستارىن جۇرگىزۋ كەزىندە كارىز گازىمەن ۋلانۋ سالدارىنان ءۇش ادام قازا تاپتى. بۇل تۋرالى قورعانىس مينيسترلىگى حابارلادى, دەپ جازادى Egemen.kz.
قازا تاپقانداردىڭ ىشىندە ەكى ازاماتتىق تۇلعا جانە ءبىر كەلىسىمشارت بويىنشا اسكەري قىزمەتشى بار.
قايعىلى وقيعا جۇمىس بارىسىندا ابايسىزدا قۇدىققا قۇلاپ كەتكەن شىمكەنت اۋداندىق پايدالانۋ ءبولىمىنىڭ جۇمىسشىسىن قۇتقارۋ كەزىندە بولدى. وعان كومەككە كەلگەن تاعى ەكى جۇمىسشى مەن كەلىسىمشارت بويىنشا ەكى اسكەري قىزمەتشى دە جاعدايدىڭ ناشارلاۋىنا بايلانىستى جوعارى جاققا كوتەرىلىپ شىعا المادى. ناتيجەسىندە ءۇش ادام سول جەردە قازا تاپتى. تاعى ءبىر جۇمىسشى مەن اسكەري قىزەتشى ارىس قالاسىنىڭ اۋرۋحاناسىنا جەتكىزىلدى. قازىرگى تاڭدا ولاردىڭ جاعدايى تۇراقتى-اۋىر دەپ باعالانىپ وتىر.قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قازا تاپقانداردىڭ وتباسىلارىنا بارلىق قاجەتتى كومەك كورسەتىلەتىنىن مالىمدەدى.«اتالعان فاكتى بويىنشا قر ءىىم ءاتب شىمكەنت بولىمىمەن قر قك 156-بابى 4-بولىگى بويىنشا سوتقا دەيىنگى تەرگەپ-تەكسەرۋ باستالدى (ەڭبەكتى قورعاۋ ەرەجەلەرىن بۇزۋ)», دەلىنگەن مينيسترلىك حابارلاماسىندا.