پرەزيدەنتتىڭ اقتوبە, اتىراۋ, باتىس قازاقستان جانە ماڭعىستاۋ وبلىستارىنىڭ الەۋمەتتىك-ەكونوميكالىق دامۋىنىڭ شۇعىل شارالار توپتاماسىن ازىرلەۋ جونىندەگى تاپسىرماسىن ورىنداۋ اياسىندا ۆيتسە-پرەمەر قانات بوزىمباەۆ اتالعان ءتورت ءوڭىر اكىمدەرىنىڭ جانە بارلىق مينيسترلىك وكىلىنىڭ قاتىسۋىمەن كەڭەس وتكىزدى.
ۇلتتىق ەكونوميكا مينيسترلىگىنىڭ اعىمداعى احۋالدى تالداۋ دەرەكتەرى بويىنشا باتىستاعى وڭىرلەر ءۇشىن سىن-تەگەۋرىن – مۇناي ءوندىرۋدىڭ تومەندەۋى جاعدايىندا ەكونوميكانى ءارتاراپتاندىرۋ.
دەگەنمەن باتىستا حالىق سانىنىڭ تۇراقتى ءوسۋى بايقالادى. بولجامدارعا سايكەس 2030 جىلعا دەيىن ونداعى حالىق سانى 10%-عا – 3,1 ملن-نان 3,4 ملن ادامعا دەيىن وسەدى. بۇل ءۇردىس جاڭا جۇمىس ورىندارىن قۇرۋ قاجەتتىلىگىن تۋعىزادى. 2024–2030 جىلدار كەزەڭىندە ەڭبەك نارىعىنا شامامەن 138 مىڭ ادام شىعادى دەپ كۇتىلىپ وتىر. پرەمەر-ءمينيستردىڭ ورىنباسارى ولاردى جۇمىسپەن قامتاماسىز ەتۋ جونىندە ءتيىستى تاپسىرمالار بەردى.
سونىمەن قاتار كەڭەس بارىسىندا بەيىندى مينيسترلىكتەر ءوز باعىتتارى بويىنشا, ونىڭ ىشىندە وڭىرلىك ينفراقۇرىلىمدى دامىتۋ بويىنشا جۇرگىزىلىپ جاتقان جۇمىس تۋرالى ەسەپ بەردى. ونەركاسىپ جانە قۇرىلىس مينيسترلىگىنىڭ دەرەكتەرى بويىنشا 2025 جىلعا دەيىن وڭىرلەردى سۋمەن قامتاماسىز ەتۋ ماسەلەسى تولىعىمەن شەشىلەدى. قازىرگى تاڭدا كارىز-تازارتۋ قۇرىلىستارى بويىنشا جوبالار ىسكە اسىرىلىپ جاتىر.
سالالىق مينيسترلىكتەر مەن اكىمدىكتەر قابىلداپ جاتقان شارالارعا قاراماستان, وسى باعىتتاعى جۇمىستى كۇشەيتۋ قاجەتتىگى بايقالادى.
ۆيتسە-پرەمەر اتاپ وتكەندەي, سۋمەن قامتاماسىز ەتۋدى, سۋ بۇرۋدى, ەلەكترمەن جانە جىلۋمەن جابدىقتاۋدى قارجىلاندىرۋ, سونداي-اق وڭىرلەردە جول سالۋ ماسەلەلەرى باسىم سيپاتقا يە بولۋعا ءتيىس.
«بىزگە ورال جانە اتىراۋ قالالارىنىڭ اۋەجايلارى ءۇشىن اشىق اسپان مارتەبەسىن كەڭەيتە وتىرىپ, رەيستەر سانىن ۇلعايتۋ قاجەت. ەڭ جوعارى جۇكتەمە كەزەڭىندە ۆاگونداردىڭ ماۋسىمدىق تاپشىلىعىن جويۋ, حالىقارالىق اۋەجايلاردى, تەمىرجول ۆوكزالدارى مەن ستانسالاردى جاڭعىرتۋ قاجەت. ال اۋىلدىق جولداردىڭ ساپا دەڭگەيىن 90%-عا دەيىن جەتكىزۋ كەرەك», دەپ تاپسىردى ۆيتسە-پرەمەر.
سونداي-اق قانات بوزىمباەۆ باتىس وڭىرلەردەگى ەكولوگيالىق پروبلەمالاردى شەشۋگە ەرەكشە نازار اۋدارۋدى تاپسىردى. دەنساۋلىق ساقتاۋ سالاسىندا سۇرانىسقا يە ماماندار ءۇشىن تۇرعىن ۇيگە جەڭىلدىكپەن نەسيە بەرۋدىڭ وڭىرلىك باعدارلاماسىن ازىرلەۋ تاپسىرىلدى.
«مەملەكەتتىك ورگاندار مەن اكىمدىكتەرگە پروبلەمالاردى جەدەل جانە ساپالى شەشۋ ءۇشىن جۇيەلى شارالار مەن جاڭا باستامالار بويىنشا ناقتى ۇسىنىستار بەرۋدى تاپسىرامىن. ءبىز ەلىمىزدىڭ باتىس ءوڭىرىنىڭ تۇرعىندارىنىڭ ءال-اۋقاتىن جاقسارتۋ ءۇشىن ءبىر اي ىشىندە شۇعىل شارالار توپتاماسىن ازىرلەۋىمىز كەرەك», دەدى ق.بوزىمباەۆ.