مەملەكەتتىك ماڭىزى بار «تالدىقورعان – وسكەمەن» اۆتوجولى تولىقتاي اشىلدى. بۇرىن ابىگەرگە تۇسەتىن تۋريستەر مەن ەل تۇرعىندارى وبلىس ورتالىعىنان 2-3 ساعاتتا شيپالى كولگە جەتىپ بارادى. ونىڭ ۇستىنە بيىل 300-دەن اسا دەمالىس ورنى قىزمەت كورسەتۋگە دايىن. ولاردىڭ 2 ملن-عا جۋىق دەمالۋشىنى قابىلداپ الۋعا مۇمكىندىگى بار. قازىر الاكولدە كۇن ىستىق, سۋعا شومىلۋشىلار جاعالاۋدا ءجۇر.
الدىمەن جولدىڭ جايىنا ۇڭىلسەك. جالپى, «تالدىقورعان – قالباتاۋ – وسكەمەن» جولىنىڭ قۇرىلىسى مەملەكەت باسشىسىنىڭ نازارىنان تىس قالعان ەمەس. 2022 جىلى جەتىسۋعا ساپارىندا دا وسى ماسەلەنى تەزىرەك شەشىپ, تۋريستەردى مولىنان تارتۋ كەرەكتىگىن ناقتىلاپ ايتقان ەدى. جول ەلىمىزدىڭ ءۇش ءوڭىرىن جەتىسۋ, اباي جانە شىعىس قازاقستان وبلىستارىن بايلانىستىرادى. بۇگىندە ۇزىندىعى 768 شاقىرىمدى قۇرايتىن جولعا تولىعىمەن اسفالت توسەلدى. جاقىندا كولىك ءمينيسترى مارات قاراباەۆ ءوزى تەكسەرىپ, ساپاسىنا باعا بەردى.
«ماماندار 40 كوپىر مەن 6 وتكەل قۇرىلىسىن اياقتادى. بىرقاتار ۋچاسكە بيىل جازدا پايدالانۋعا بەرىلەدى. جوبا اياسىندا قويلىق, بالاپان, شىنقوجا ەلدى مەكەندەرى مەن اياگوز قالاسىنىڭ اينالما جولدارى سالىندى. جولدىڭ 16 ۋچاسكەسىندە 1 مىڭعا جۋىق مامان مەن 600 بىرلىك ارنايى تەحنيكا جۇمىلدىرىلعان. ءۇشارال قالاسىنىڭ ماڭىنداعى كولىك ايرىعىنداعى قۇرىلىس جۇمىستارى دا اياقتالۋعا جاقىن», دەدى مينيستر.
الاكول كولىنە وڭتۇستىك جاعىنان بارۋ ءۇشىن «تالدىقورعان – وسكەمەن» اۆتوموبيل جولىنان جەتىسۋ وبلىسىنداعى ءۇشارال كەنتىنە جەتىپ, سودان كەيىن ىرگەلەس جاتقان ء«ۇشارال – دوستىق» جولىنا ءوتۋ قاجەت. كول جاعاسىمەن جەتىسۋ وبلىسىنىڭ دوستىق اۋلىنا قاراي وتەتىن بۇل ۋچاسكەنىڭ ۇزىندىعى 180 شاقىرىمدى قۇرايدى.
ال «تالدىقورعان – وسكەمەن» اۆتوموبيل جولىنان الاكولدىڭ سولتۇستىك جاعالاۋىنا بارۋ ءۇشىن رەسپۋبليكالىق ماڭىزى بار «تاسكەسكەن – باقتى» اۆتوموبيل جولىنا ءوتۋ كەرەك. ۇزىندىعى 133 شاقىرىمدى قۇرايتىن بۇل ۋچاسكە اباي وبلىسىنىڭ ماقانشى اۋلىنا اپارادى. ودان ءارى ماقانشى اۋلىنان كولگە جەتۋ ءۇشىن وبلىستىق ماڭىزى بار «ماقانشى – جالاڭاشكول» اۆتوموبيل جولىمەن جۇرۋگە بولادى.
ايتا كەتەرلىگى, الاكول كولىنە جولاۋشىلار رەسپۋبليكالىق ماڭىزى بار «تالدىقورعان – وسكەمەن» اۆتوموبيل جولى ارقىلى قاتىنايدى. جالپى, نىساندى تولىق اياقتاپ, حالىق يگىلىگىنە تاپسىرۋ 2024 جىلدىڭ سوڭىنا جوسپارلانعان. قازىر شيپالى كولگە دەمالۋشىلار وسى جول ارقىلى ءجۇرىپ جاتىر. بۇگىندە 100 مىڭنان اسا ادام دەمالعان.
وڭىرلىك ءباسپاسوز قىزمەتىنىڭ مالىمەتىنشە, بيىل الاكول جاعالاۋىندا ءبىر جولعى سىيىمدىلىعى 16,2 مىڭ توسەكتىك ورىن بولاتىن 302 تۋريزم نىسانى ورنالاسقان. وسى جىلى جەكە ينۆەستيتسيالار ەسەبىنەن 1,4 ملرد تەڭگەگە تاعى
8 نىساندى ىسكە قوسۋ جوسپارلانىپ وتىر. وتكەن جىلى الاكولگە شامامەن 1,6 ملن ادام كەلسە, بيىل 2 ميلليون تۋريست كەلەدى دەپ كۇتىلەدى.
وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ دەرەگىنشە, الاكول باعىتىنا جازعى ماۋسىمدا اپتاسىنا 28 رەت استانا, الماتى, تالدىقورعان قالالارىنان 3 اۆيارەيس بارعان. ونىڭ ىشىندە «الماتى – ءۇشارال» جانە «تالدىقورعان – ءۇشارال» رەيستەرى سۋبسيديالانادى. 1 كوممەرتسيالىق «استانا – ءۇشارال» رەيسى بار. وعان قوسا الماتى, استانا قالالارىنان, شىعىس قازاقستان جانە اباي وبلىستارىنان 12 تەمىرجول رەيسى, ونىڭ ىشىندە «استانا – دوستىق» باعىتىندا «تالگو» پويىزى جۇرەدى. جازعى ۋاقىتتا «الماتى قالاسى – اقشي اۋىلى – كوكتۇما اۋلى», «تالدىقورعان قالاسى – اقشي اۋلى – كوكتۇما اۋلى» باعىتتارى بويىنشا 50 ورىندىق اۆتوبۋس مارشرۋتتارى تۇراقتى تۇردە قىزمەت كورسەتەدى.
الاكول كولىندە وقىس جاعدايلاردىڭ الدىن الىپ, جەدەل دەن قويۋ ءۇشىن تجد قۇتقارۋ بولىمشەسى سۇڭگۋىر جابدىقتارىنىڭ 21 جيىنتىعىن, جاڭا قوزعالتقىشتارمەن جابدىقتالعان 7 موتورلى قايىق, 2 رەزەڭكە قايىق, 2 ۋاز, نيۆا, كاماز جانە امبەباپ «ترەكول» اۆتوماشينالارىن دايىندادى. اقشي مەن كوكتۇما اۋىلدارىندا ءورت قاۋىپسىزدىگىن قامتاماسىز ەتۋ ءۇشىن ۋاقىتشا ءورت ءسوندىرۋ بەكەتتەرى ۇيىمداستىرىلدى.
اتالعان ەلدى مەكەندەرگە جازعى ماۋسىم كەزەڭىندە تاۋلىك بويى كەزەكشىلىك ەتۋ ءۇشىن جەدەل جاردەم دارىگەرلەرىنىڭ ەكى بريگاداسى جىبەرىلدى. كولىكتىك باقىلاۋ ينسپەكتسياسى ءجۇزۋ قۇرالدارىن باقىلاۋدى جۇزەگە اسىرۋ ءۇشىن قايىق ساتىپ الىپ, ەندى بيىل سۋداعى قوزعالىس قاۋىپسىزدىگىن ەكى ينسپەكتور باقىلايدى. جاعالاۋدىڭ تازالىعىن قامتاماسىز ەتۋ ءۇشىن 120 قوقىس كونتەينەرى مەن باك, 24 سانيتارلىق-گيگيەنالىق توراپ جانە 10 بيوتۋالەت ورناتىلعان.
جەتىسۋ وبلىسى