قازىر ەلىمىزدە تسيفرلاندىرۋ سالاسى دامۋدىڭ نەگىزگى فاكتورىنا اينالىپ وتىر. اسىرەسە ەكونوميكانىڭ ءتۇرلى سالاسىنا جاساندى ينتەللەكتىنى ەنگىزۋ بەلسەندى قولعا الىندى. وسى باعىتتاعى وزىق تەحنولوگيالاردى دامىتۋدا ستارتاپ جوبالارىنىڭ ءرولى جوعارى. بۇل تاراپتا ەلىمىزدەگى ءار سالا بويىنشا جوسپارلانعان ستارتاپ جوبالارىنا, رەزيدەنت كومپانيالارعا, ءبىلىم بەرۋ سالاسىنا, بيزنەس-باعدارلامالارعا قاتىسۋشىلارعا, اقپاراتتىق قولداۋدى قاجەت ەتەتىن پەرسپەكتيۆالى جوبالاردىڭ ىلگەرىلەۋىنە كومەكتەسىپ جۇرگەن ەلورداداعى Astana Hub تەحنوپاركىنىڭ اتقارىپ وتىرعان قىزمەتى زور.
ماسەلەن, اتالعان تەحنوپاركتىڭ قىزمەتكەرى ازامات كۇلەنباەۆ ستارتاپ جوبالاردىڭ ەلىمىزدە جىلدام دامۋىنا نارىق قانا ەمەس, ادامدار دا دايىن بولۋى كەرەكتىگىن ايتادى.
«شىنىمەن دە ونى قوعام مەن نارىققا ەنگىزۋ دايىندىعى ماڭىزدى. الدىمەن ينتەرنەت جۇيەسىنە ءار سالا بويىنشا اقپارات ەنگىزۋ, ىزدەنۋشىنىڭ جۇمىسىن جەڭىلدەتۋ ءۇشىن مالىمەتتەردى كوبەيتۋ كەرەك. قازىر تەحنولوگيا ءداۋىرى دەسەك تە, ءبارى دە ادام قولىمەن, ويىمەن جاسالادى. سوندىقتان دا ينتەرنەت جۇيەسىن بايىتۋىمىز كەرەك», دەدى ول. ال ستارتاپ جوبالارىنىڭ مەنەدجەرى رۋفينا حانىم قازىر ەلىمىزدە جاساندى ينتەللەكت ءارتۇرلى ستارتاپتارعا ەنگىزىلە باستاعانىن جەتكىزدى.
«مىسالى نارىقتىڭ دامۋ زامانىندا, ينۆەستورلاردىڭ جۇمىسىن جەڭىلدەتۋ ءۇشىن دە «AI» كومەكشى بولا الادى. بەلگىلى ءبىر ءماتىندى وڭدەۋدە دە, وقۋدا دا جاساندى ينتەللەكتىنى پايدالانسا جۇمىس جەڭىلدەيدى. ايتالىق, وقۋشىلاردىڭ, ستۋدەنتتەردىڭ ءبىلىم الۋ قابىلەتىن ارتتىرۋ ءۇشىن, پەداگوگتەر, عالىمدار ارنايى وقۋ باعدارلاماسىن قۇراستىرىپ ەنگىزسە, دارىگەرلەر ناۋقاسپەن كوزبە-كوز كەزدەسپەي, بەلگىلى ءبىر باعدارلامالار ارقىلى جاساندى ينتەللەكت نەگىزىندە العاشقى مەديتسينالىق نۇسقاۋ بەرە الادى. جاساندى ينتەللەكتى باعدارلاماسى بىزدە جوق دەپ ايتا المايمىز. سەبەبى ءبىز كارانتين كەزىندە جاپپاي ونلاينعا كوشىپ, ونىڭ العاشقى جولىن ۇيرەندىك. قازىر ونى تەك دامىتۋ قاجەت», دەدى بىلىكتى مەنەدجەر.
قىسقاسى, ستارتاپتار مەن يننوۆاتسيالىق جوبالاردى جەتىلدىرۋ ارقىلى ەلىمىز جاساندى ينتەللەكتىنى پايدالانۋ مەن دامىتۋدا كوشباسشى بولا الارى انىق. باستىسى, ونى قولداساق, ەكونوميكامىز ودان ءارى دامىپ, ازاماتتاردىڭ ءومىر ءسۇرۋ ساپاسى جاقسارا تۇسەدى دەپ ويلايمىن.
دۋلاتي ەڭسەنوۆ,
Astana IT ۋنيۆەرسيتەتى جۋرناليستيكا فاكۋلتەتىنىڭ 3-كۋرس ستۋدەنتى