ءورت 19 ماۋسىم كۇنى تۇستەن كەيىن ورال ستانتسياسىنداعى جەلىلىك پوليتسيا ءبولىمىنىڭ اكىمشىلىك عيماراتىنىڭ جانىنداعى 5 قاباتتى تۇرعىن ۇيلەردىڭ بىرىندە بولدى. وسى ءۇيدىڭ ءبىر تۇرعىنى جوعارعى قاباتتان ءتۇتىندى بايقاپ, پوليتسەيلەردەن كومەك سۇرادى, دەپ حابارلايدى Egemen.kz.
جەلىلىك ءبولىمنىڭ ءۇش قىزمەتكەرى وقيعا ورنىنا دەرەۋ كەلىپ, پوليتسيا ءبولىمىنىڭ ءورت سوندىرگىشتەرىن پايدالانىپ, ادامداردى ەۆاكۋاتسيالاپ, ءورتتى ءسوندىرۋدى جەدەل باستاپ كەتتى. ءورت وشاعى ءبىرىنشى جانە بەسىنشى قاباتتارداعى ەلەكتر قالقانىنان شىققان ەكەن.
كولىك ساقشىلارى, اتاپ ايتقاندا, پوليتسيا اعا لەيتەنانتتارى قايسار يسكەنديروۆتىڭ, جانعالي تۋرەكەشوۆتىڭ جانە قاتارداعى پوليتسيا قىزمەتكەرى ميرلان يششانوۆتىڭ ءورت سوندىرۋشىلەر كەلگەنگە دەيىن جاساعان جەدەل ءارى دۇرىس ارەكەتتەرىنىڭ ارقاسىندا بارلىق تۇرعىندار امان-ەسەن ەۆاكۋاتسيالاندى, زارداپ شەككەندەر جوق. سونداي-اق پوليتسەيلەردىڭ وڭتايلى ءىس-قيمىلدارى قىزىل جالىندى ورشىتپەي, ونى تولىعىمەن سوندىرۋگە مۇمكىندىك بەردى.
«پودەزدىڭ ىشىنە كىرە المايسىڭ, قاپ-قاراڭعى, ءتۇتىن. ءۇش بالا كەلىپ, باستارىن جاۋىپ, ۇستىندەگى كيىمدەرىن شەشىپ كىرىپ كەتتى. جۇگىرىپ, قارتتاردى, بالالاردى سىرتقا شىعاردى. كوپ راقمەت! بالالارعا زور دەنساۋلىق, قىزمەتتە تابىس تىلەيمىن», دەدى ءۇي تۇرعىندارىنىڭ ءبىرى شەكسىز العىسىن ءبىلدىرىپ.
الداعى ۋاقىتتا كولىكتەگى پوليتسيا دەپارتامەنتىنىڭ باسشىلىعى جوعارىدا اتالعان قىزمەتكەرلەردى ازاماتتاردى قۇتقارۋدا كورسەتكەن ەرلىگى ءۇشىن ماراپاتتايدى.
قىرمىزى جۇماعاليقىزى,
ەۇۋ ستۋدەنتى