سۋ تاسقىنىنىڭ سالدارى توسىن تابيعي اپاتتارعا دايىن ەمەس ەكەنىمىزدى ۇعىندىردى. تاسقىن سۋ اسىرەسە مەملەكەتتىك قىزمەتشىلەردى ابدەن ابىگەرگە ءتۇسىردى. ەندىگى كەزدە ءوڭىر اكىمدەرى مالايزيالىق ارىپتەستەرىنەن تاجىريبە جيناقتاپ, توسىننان كەلگەن تابيعي قۇبىلىستارعا توتەپ بەرمەك.
مالايزيا – تابيعي اپات كەزىندە, ودان كەيىن مەملەكەتتىك قىزمەتشىلەردىڭ ءىس-قيمىل الگوريتمدەرىن ءجىتى قۇراستىرعان بىردەن-ءبىر ەل. ويتكەنى بۇل مەملەكەتتە جاۋىن-شاشىن مەن سۋ تاسقىنى ءجيى بولادى. قۇرال-جابدىقتارىمەن قاتار اكىمشىلىك قىزمەتكەرلەرى ءار كەزدە ساقاداي ساي تۇرادى. وسى سالادا جىلدار بويى جيناعان تاجىريبەلەرىن مالايزيا قازاقستاننىڭ مەملەكەتتىك قىزمەتكەرلەرىمەن بولىسۋگە دايىن.
«سۋ تاسقىنىن باسقارۋ – وتە ماڭىزدى ءىس. قازاقستان مۇنداي اۋقىمدى سەلدى كۇتپەگەنىن تۇسىنەمىز, بىراق الەمدە كليماتتىق وزگەرىستەرگە بايلانىستى نوسەر جاۋىننان تۋىنداعان سۋ تاسقىنى الداعى ۋاقىتتا دا قايتالانا بەرمەك. ءبىز تابيعي اپات كەزىندە جانە ودان كەيىن مەملەكەتتىك قىزمەتشىلەردىڭ ءىس-قيمىل الگوريتمدەرىن جەتىلدىرۋ ءۇشىن قازاقستانمەن تاجىريبە الماسۋعا دايىنبىز. مالايزيا مەملەكەتتىك باسقارۋ اكادەمياسى تاراپىنان مەملەكەتتىك قىزمەتشىلەردىڭ بىلىكتىلىگى مەن كوممۋنيكاتيۆتىك داعدىلارىن ارتتىرۋ بويىنشا وقىتۋ كۋرستارىن ۇيىمداستىرۋعا ءازىرمىز. داعدارىس كەزىندە جۇمىس ىستەيتىن مامانداردىڭ بىلىكتىلىگى جوعارى بولۋى جانە حالىقتىڭ مۇڭ-مۇقتاجىن تۇسىنە الۋى كەرەك», دەدى پرەزيدەنت جانىنداعى مەملەكەتتىك باسقارۋ اكادەمياسىندا وتكەن كەزدەسۋدە مالايزيا پارلامەنتى سەناتى توراعاسىنىڭ مىندەتىن اتقارۋشى نۋر دجازلان موحامەد.
مالايزيا – قازاقستاننىڭ وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى. سوندىقتان الداعى ۋاقىتتا ءتۇرلى داعدارىس كەزىندە وزدەرى تاجىريبەدەن وتكىزىپ, ازىرلەگەن داعدىلارىمەن بولىسۋگە نيەتتى. ال كەزدەسۋ بارىسىندا نۋر دجازلان موحامەد مەملەكەتتىك قىزمەتشىلەر جۇمىسىنىڭ تيىمدىلىگىن ارتتىرۋ, مەملەكەتتىك باسقارۋدى تسيفرلاندىرۋ جانە مەملەكەتتىك سەكتور جۇمىسىندا جاساندى ينتەللەكتىنى پايدالانۋدىڭ ارتىقشىلىقتارىن ايتتى. اكادەميا رەكتورى ەرلان ءابىل مالايزيا وكىلىنىڭ ۇسىنىسىن قابىل الىپ, ارىپتەستىك بايلانىس ورناتۋعا شاقىردى.