Eurasian Resources Group (ERG) جانە «اقسۋ فەرروقورىتپا زاۋىتى» اق مەن «ERG Service» جشس قىزمەتكەرلەرى ءۇشىن «ارمانعا جول» اتتى فورۋم وتكىزىلدى. اتالعان كاسىپورىنداردا ەڭبەك ەتىپ جۇرگەن ازاماتتار وتباسى بانك ۇسىناتىن تۇرعىن ءۇي جاعدايلارىن جاقسارتۋعا باعىتتالعان يپوتەكالىق قارىز الۋ شارتتارى تۋرالى كەڭىرەك ماعلۇمات الدى.
وتكەن جىلدىڭ سوڭىندا Eurasian Resources Group (ERG) قۇرامىنداعى «ەۋروازياتتىق ەنەرگەتيكالىق كورپوراتسياسى» اق اقسۋ ەلەكتر ستانتسياسى ماماندارىنىڭ تۇرعىن ءۇي جاعدايلارىن جاقسارتۋعا باعىتتالعان جەڭىلدەتىلگەن باعدارلاما قولعا الىنعان ەدى. وعان قاتىسقان قىزمەتكەرلەرگە وتباسى بانك جىلدىق 5% ۇستەمەمەن (جتسم مولشەرى 5,2%-دان باستاپ 5,3%-عا دەيىن) زايم بەرەدى. قارىز الۋشىلاردان تالاپ ەتىلەتىن باستاپقى جارنا مەجەسى – بار بولعانى - 10%. بۇل پاۆلودار وبلىسى اكىمىنىڭ ورىنباسارى داۋرەن جامبايبەك, وتباسى بانك پاۆلودار وبلىستىق فيليالىنىڭ ديرەكتورى تالعات بايلوۆ جانە قازاقستانداعى ERG-ءدىڭ باس ديرەكتورىنىڭ قارجى جونىندەگى ورىنباسارى دانيار راحماتۋللاەۆتىڭ ءوزارا تۇسىنىستىك پەن ارىپتەستىك تۋرالى ۇشجاقتى مەموراندۋمعا قول قويۋىنىڭ ناتيجەسىندە جۇزەگە استى. وعان سايكەس باعدارلامانى ىسكە اسىرۋ ءۇشىن ءار تاراپ 300 ملن تەڭگەدەن بولەتىن بولىپ ۋاعدالاستى. ناتيجەسىندە باعدارلامانىڭ يپوتەكالىق قارجى قورى 900 ملن تەڭگەنى قۇرايدى. وتباسى بانكتىڭ شارتتارىنا سۇيەنە وتىرىپ, ءار پاتەردىڭ قۇنى شامامەن 17 ملن تەڭگە دەپ ەسەپتەسەك, بۇل قاراجات 52 وتباسىنىڭ جەڭىلدىكپەن پاتەر ساتىپ الۋىنا جەتكىلىكتى. جالپى مۇنداي يپوتەكالىق جوبا ERG-ءدىڭ وزگە دە كاسىپورىندارى ورنالاسقان اقتوبە مەن قاراعاندى وبلىستارىندا دا ءساتتى ىسكە اسىرىلىپ جاتقان كورىنەدى. ال پاۆلودار وبلىسىندا بيىل العاش رەت قولعا الىنعالى وتىر.
«ەۋروازياتتىق ەنەرگەتيكالىق كورپوراتسياسى» اق-نىڭ الەۋمەتتىك ماسەلەلەر جونىندەگى باسشىسى ايدوس اداي اتاپ وتكەندەي, ۇمىتكەرلەردى ىرىكتەۋ بارىسىندا اكتسيونەرلىك قوعامدا ارنايى قۇرىلعان تۇرعىن ءۇي كوميسسياسى اكىمدىكتىڭ كەزەگىنە تۇرعان ماماندارعا باسىمدىق بەرەدى. قىزمەتكەرلەر ساتىپ الاتىن پاتەردىڭ اقسۋ قالاسىندا جاڭا نەمەسە ەكىنشى نارىقتان بولارىن وزدەرى تاڭدايدى.
«بۇگىن اقسۋ ەلەكتر ستانتسياسىندا ءوتىپ جاتقان «ارمانعا جول» فورۋمىنا قاتىسقانىما قۋانىشتىمىن. سەبەبى, ءبىز ءوز قىزمەتكەرلەرىمىزدىڭ جايلى جاعدايدا جۇمىس ىستەپ قانا قويماي, جايلى باسپانادا تۇرۋىن قالايمىز. فورۋمعا قاتىسقان 200-دەن استام قىزمەتكەر وزدەرى ءۇشىن پايدالى اقپارات الدى دەپ ويلايمىن. ءىس-شاراعا «ERG Service» جشس-ءنىڭ دە وكىلدەرى قاتىستى. ازاماتتاردىڭ كەيبىرى جاڭادان ءۇي العىسى كەلسە, ەندى ءبىرى تۇرىپ جاتقان ءۇيىن كەڭەيتكىسى كەلەدى. ال تاعى ءبىرى بالالارىنىڭ كەلەشەگىن ويلاپ, دەپوزيت اشۋدى ارماندايدى. بالالارىمىزدىڭ جارقىن بولاشاعىنا نەگىزدەلگەن «Aqyl» دەپوزيتى, سونداي-ا «ۇلتتىق قور - بالالارعا» جوباسى جايىندا دا بانك وكىلدەرى وتە پايدالى ماعلۇماتتار بەردى. اسىرەسە, قىزمەتكەرلەر وتباسى بانكتە 18 اي بويى دەپوزيتكە قاراجات جيناپ, 20 پايىز العاشقى جارنانى قۇيۋمەن ەكىنشى نارىقتان پاتەر ساتىپ الۋعا بولاتىن مۇمكىندىك ءبىزدىڭ كومپانيا ماماندارىن قۋانتقانى بايقالادى. قاراپايىم جۇمىس ادامدارى كوبىنە مۇنداي باعدارلامالاردى بىلمەي جاتادى. سوندىقتان وتباسى بانك وكىلدەرى ارنايى كەلىپ, قىزمەتكەرلەرىمىزگە بارلىعىن ءتۇسىندىرىپ بەرىپ جاتقانى وتە ۇلكەن ارتىقشىلىق دەپ ويلايمىن. بۇل فورۋم - ERG كومپانياسى جانە وتباسى بانكتىڭ بىرلەسۋىمەن ۇيىمداستىرىلىپ وتىرعان جوبا. ءبىزدىڭ كاسىپورىندا 2 مىڭعا جۋىق ادام ەڭبەك ەتەدى. الداعى ۋاقىتتا ۇيىمدا تۇرعىن ءۇي كەزەگىنە مۇقتاج جانداردىڭ الەۋمەتتىك جاعدايى مەن كەزەگىن انىقتايتىن ارنايى اۆتوماتتى جۇيە قۇرىلادى. سول ارقىلى قىزمەتكەرلەرىمىزدىڭ قانشاسى باسپاناعا ءزارۋ ەكەنىن ءبىلىپ وتىراتىن بولامىز. قىزمەتكەر حالىققا قىزمەت كورسەتۋ ورتالىعىندا قۇجاتتارىن ءتيىستى ۇردە راسىمدەپ كەلگەن سوڭ, الگى جۇيەگە تىركەلەدى. ارنايى كوميسسيا ولاردى ىرىكتەۋدەن وتكىزىپ, ۇمىتكەرلەردى تاڭدايتىن بولادى. ەگەر پاتەر ساتىپ الۋدى قالايتىن ازاماتتارىمىزدىڭ سانى كوبەيەتىن بولسا بولاشاقتا باعدارلامانى قارجىلاندىرۋ كولەمىن ۇلعايتىپ, جوبا ءارى قاراي جالعاسا بەرەدى», دەپ اڭگىمەلەدى ايدوس اداي.
سوڭعى بەس جىلدا وتباسى بانكتىڭ باعدارلامالارىن قولدانۋ ناتيجەسىندە ERG كومپانياسىندا ەڭبەك ەتەتىن 600-دەن استام ادام باسپانالى بولعان. جالپى العاندا 2009 جىلدان بەرى ERG قىزمەتكەرلەرىنىڭ قاتارىنداعى 2 مىڭ وتباسى تۇرعىن ۇيمەن قامتىلعان.
«وتباسى بانك ERG كومپانياسىمەن 5 جىلدان استام ۋاقىت بويى ارىپتەستىك بايلانىستا جۇمىس ىستەپ كەلەمىز. اۋەل باستا ارەندالىق-جيناقتىق تەتىكپەن پاتەرلەردى بەرۋ جۇيەسىن بىرلەسە ەنگىزدىك. اتالعان كومپانيا ءوز بەتىمەن باسپانالار سالىپ, ولاردى جاس ماماندارعا, باعالى كادرلارىنا جالعا ۇسىندى. بۇل ازاماتتار اي سايىن پاتەردى جالداۋ اقىسىنان بولەك, باسپانانى تولىقتاي ءوز مەنشىگىنە ساتىپ الۋ ءۇشىن ارنايى شوتقا قاراجات جينادى. ارادا ءۇش جىل وتكەندە وزدەرى جيناپ كەلگەن قاراجاتتى العاشقى جارنا رەتىندە سالىپ, ءبىزدىڭ بانك جىلدىق سىياقى ۇستەمەسى نەبارى 5 پايىزبەن (جتسم 5,2%-دان باستاپ 5,3%-عا دەيىن) يپوتەكالىق نەسيە ۇسىندى. كومپانيا بارلىق قىزمەتكەرلەرىنە تۇرعىن ءۇي سالىپ بەرۋگە ۇلگەرمەيتىنىن بايقاعان سوڭ وزگە دە نەسيەلىك باعدارلامالارىمىزعا قاتىسۋعا نيەت تانىتتى. وسىلايشا ERG-ءدىڭ اقتوبە, پاۆلودار, قوستاناي وبلىستارىنداعى كاسىپورىندارىندا ەڭبەك ەتەتىن قىزمەتكەرلەر ءۇشىن العاشقى جارناسى 10 پايىز, جىلدىق مولشەرلەمەسى 5 پايىزبەن (جتسم 5,2%-دان باستاپ 5,3%-عا دەيىن) نەسيە ۇسىنۋدى باستادىق», دەيدى فورۋمعا ارنايى كەلىپ قاتىسقان «وتباسى بانك» اق باسقارما توراعاسىنىڭ ورىنباسارى نۇرلان اقشانوۆ.
فورۋمدا وتباسى بانكتىڭ وكىلدەرى «ناۋرىز», «وتاۋ», «ۇلتتىق قور - بالالارعا» باعدارلامالارى مەن «Aqyl» دەپوزيتى تۋرالى كەڭىرەك اقپارات ۇسىندى. قارجى ۇيىمىنان يپوتەكالىق قارىز الىپ, باسپانالى بولعان ازاماتتاردىڭ مىسالدارى كەلتىرىلدى. ماسەلەن تەرەڭكول اۋدانىندا ۇزاق جىل تۇرىپ, كەيىن اقسۋ قالاسىنان 12 ملن تەڭگەگە باسپانا ساتىپ العان زەينەتكەردىڭ تاجىريبەسى ايتىلدى. 57 جاسار ايەل ادام وتباسى بانكتەن دەپوزيت اشىپ, 6 جىل بويى العاشقى جارنا جيناعان. ناتيجەسىندە 63 جاسقا كەلگەندە بانكتىڭ كومەگىمەن اقسۋدان جايلى پاتەر ساتىپ العان. وتباسى بانك ارقىلى ارمانداعان باسپاناعا قول جەتكىزگەندەردىڭ قاتارىندا ERG كومپانياسىنا جاڭادان ورنالاسقان جاس ماماندار دا بارشىلىق. سولاردىڭ ءبىرى – ابىلايحان ديۋسەكوۆ.
«اتا-انام مەكتەپتە وقىپ جۇرگەن شاعىمدا وتباسى بانكىنەن دەپوزيت اشىپ, مەنىڭ اتىما اقشا جيناپ ءجۇردى. سونىڭ ارقاسىندا جاقىندا يپوتەكاعا 2 بولمەلى پاتەر الدىم. جاسىم 23-تە. وتباسى بانكىنىڭ ۇسىنىپ وتىرعان بارلىق مۇمكىندىكتەرى ءۇشىن العىس ايتقىم كەلەدى», دەيدى جاس مامان.
ال اقسۋ ەلەكتر ستانتسياسىنداعى ۋچاسكە باسشىسى داۋلەت ساعاندىقوۆ 2018 جىلى بانكتە دەپوزيت اشىپ, ارادا 3 جىل وتكەندە اڭساعان پاتەرىن ساتىپ العانىن باياندادى. ايتۋىنشا, اتا-اناسى زەينەتاقى قورىنداعى شەكتى مولشەردەن اسقان سومانى قوسىپ, ءۇيدى جىلدام ساتىپ الۋعا سەپتىگىن تيگىزگەن.
«وتباسى بانك ارقىلى پاتەر ساتىپ الۋدى ارمانداپ ءجۇرمىن. سەبەبى نەسيە شارتتارى ءبىز سياقتى ەڭبەك ادامدارى ءۇشىن ءتيىمدى. بۇرىن جاڭا باسپانا الۋ ءۇشىن بانكتە 50 پايىز جارناسىن جيناۋعا تۋرا كەلەتىن. ال قازىر حالىققا ءتيىمدى جاڭا باعدارلامالار بار ەكەنىن ءبىلىپ جاتىرمىز. اسىرەسە, «ناۋرىز» باعدارلاماسى ارقىلى 20 پايىزدىق العاشقى جارنانى قۇيساڭ, كەز كەلگەن قالادان قالاعان پاتەرىڭدى ساتىپ الۋعا بولادى ەكەن. وزگە بىرەۋدىڭ پاتەرىن جالداپ تۇرعانشا, ءوز پاتەرىڭ ءۇشىن تولەگەن الدەقايدا جاقسىراق. دەپوزيتىم جينالىپ تۇر, ەندى پاتەر تاڭداۋدامىن», دەپ ءوز پىكىرىن ءبولىستى فورۋم سوڭىنان اقسۋ ەلەكتر ستانتسياسىنداعى سورعى ستانتسياسىنىڭ جوندەۋ جونىندەگى ينجەنەرى دانيار توقسانباەۆ.
باسىندا ءۇيى بار ادامنىڭ ەرتەڭگە دەگەن سەنىمى ارتىپ, وتباسىندا تۇراقتىلىق پەن بەرەكە بولاتىنى ءمالىم. ەندەشە وتباسى بانك پەن ERG ۇسىنىپ وتىرعان جاڭا جوبا الداعى ۋاقىتتا جۇزدەگەن جانۇياعا باسپانا قۋانىشىن سىيلايدى دەگەن ويدامىز.
پاۆلودار وبلىسى
اقسۋ قالاسى